Ish kreu i UÇK-së,Rexhep Selimi: Nuk kam frikë nga drejtësia, por nga e kundërta. Thaçi, braktisi idealet e luftës

Selimi: Vrasjet politike në Kosovë ,luftë kundër shqiptarëve. Po përdoren ende, por nuk po zbardhen

 Nga Jonida Hitoveizi

Deputeti i Vetëvendosjes dhe njëri nga themeluesit e ish-krerët e UÇK-së, Rexhep Selimi në një intervistë për gazetën TemA, tregon rolin e tij gjatë luftës në Kosovë dhe pse sot është kundër Gjykatës Speciale. Një ndër personazhet e njohur të jetës politike në Kosovë, Selimi thotë se Gjykata Speciale njollos Kosovën dhe Shqipërinë, në një luftë kur krime ka kryer vetëm Serbia e Millosheviçit. “Jam krenar, thotë Selimi pasi isha pjesë e një ushtrie, e cila nuk ka në historinë e saj asnjë fëmijë serb të lënduar, por e kundërta ka ndodhur me shqiptarët”.

Selimi flet për vrasjet politike të ndodhura në Kosovë, për të cilat thotë se ato thjesht po përdoren, por nuk ka vullnet për tu zbardhur.

 Zoti Selimi keni qenë njëri nga themeluesit e parë të UÇK-së, cili ka qenë roli juaj gjatë asaj periudhe?

Përveç detyrave dhe aktiviteteve në themelim, strukturim, organizim, mobilizim dhe operim, unë gjatë luftës, pas strukturimit të UÇK-së në njësi operative dhe shtabore, kam qenë drejtues i Operacioneve në Shtabin e Përgjithshëm të UÇK-së dhe më vonë Inspektor Gjeneral i UÇK-së.

Po pasi mbaroi lufta?

Në Prill të vitit 1999, pra para se të përfundonte lufta, si rezultat i një marrëveshjeje interne të delegacionit shqiptar në Rambuje, në mes subjekteve politike të Kosovës dhe UÇK-së, e nënshkruar nga përfaqësuesit përkatës Thaçi, Rugova e Qosja, u morë vendimi për themelimin e Qeverisë së Përkohshme të Kosovës. Në kabinetin e kësaj qeverie kam qenë Ministër i Rendit Publik deri në shuarjen e mandatit të kësaj qeverie në Janar te vitit 2000.

Si komandant i UÇK-së, veç Çlirimit të Kosovës nga Serbia a kishte edhe një luftë mes shqiptarëve për fuqi politike pasi lufta të mbaronte?

Luftë në Kosovë ka patur vetëm në mes çlirimtarëve shqiptarë dhe pushtuesve, kushdo dhe kurdo që kanë pushtuar Kosovën. Është fat i mirë që shqiptarët kurrë nuk luftuan me njëri-tjetrin as mbi baza krahinore, fetare e as politike. Oponencat politike, mospajtimet dhe përplasjet politike në mes grupeve politike kanë ekzistuar dhe ekzistojnë edhe sot e kësaj dite. Madje edhe do të ekzistojnë, përderisa të ketë grupime, parti e subjekte politike që janë në garë me njëra-tjetrën për terren dhe pushtet politik. Por asnjëherë kjo nuk mund ta ketë emrin e një lufte në mes shqiptarëve. Pra nuk kishte luftë në mes shqiptarëve, por kishte përpjekje të grupeve politike për të përfituar terren politik në një realitet të krijuar pas luftës në Kosovë.

A ishte kjo luftë për pushtet, shkak i disa vrasjeve politike në Kosovë?

Vrasjet politike në Kosovë kanë ndodhur, por vrasësit nuk janë zbuluan kurrë. Sa më parë që të zbulohen aq më mirë do të jetë për Kosovën, për të tashmen dhe të ardhmen e shoqërisë sonë. Deri më tani pothuajse nuk është  zbuluar asnjë nga vrasjet të cilësuara si politike. Shumë personalitete të rëndësishme dhe të shquara në Kosovë janë vrarë dhe vrasësit nuk janë zbuluar kurrë. Por këto vrasje të personaliteteve politike nuk do të duhej të interpretoheshin si luftë në mes shqiptarëve në Kosovë, por si luftë kundër shqiptarëve dhe Kosovës.

Duke qenë kështu, ndoshta, të paktën edhe për një kohë të gjatë nuk do të zbulohen, por do të vazhdojnë vetëm të përdoren si të tilla. Nuk duket krejt e rastësishme moszbulimi, qoftë edhe i njërës nga vrasjet politike deri me tani. Për moszbulimin e asnjë prej tyre kanë përgjegjësi para së gjithash ata që e kishin detyrë, por që kurrë nuk e ngritën një sistem te mirëfilltë të drejtësisë,përkundrazi.

E sa i përket pyetjes suaj se a ishin vrasjet politike luftë për pushtet apo jo, mund t’i pyesni ata që e kanë pasur pushtetin, që nga pas lufta e deri më sot sesi e kanë marrë pushtetin ata.

Unë nuk kam qenë ndonjëherë në pushtet deri më tani që të mund t’ju pergjigjesha. Unë në garë politike jam futur në 2010 si kandidat për deputet i Lëvizjes VETËVENDOSJE! nga e cila unë kam marrë mandatin e parë si deputet në Kuvendin e Kosovës.

 Kosova i ka thënë PO themelimit të Gjykatës Speciale, ndërkohë ju keni qenë një nga zërat e fortë kundër themelimit të saj. Përse?

Gjykata Speciale në Kosovë është një padrejtësi dhe barrë e rëndë për Kosovën. Me anë të themelimit të kësaj gjykate, Kosovës dhe shqiptarëve iu vihen në ngarkim akuza për spastrim etnik kundër serbëve në Kosovë. (shih raportin e Kryeprokurorit te Task Forces Hetimore Speciale Z.Ëilliamson, kapitulli Te gjeturat e Pergjithshme).

Kujtojmë se raporti i kryeprokurorit të TFHS Ëilliamson mbështetet mbi raportin e Raportuesit Dik Marty, e raporti i Marty-t mbështetet mbi pretendimet e Serbisë për krime të UÇK-së dhe po ashtu edhe mbi të dhënat e prokurorisë serbe për ato pretendime. Kur kuptohet shtegëtimi i këtyre pretendimeve sesi kanë ardhur deri në Kuvendin e Kosovës, e po ashtu kur kuptohet edhe qëllimi për fajësi paragjykuese mbi baza etnike, atëherë e vetmja zgjidhje ka qenë refuzimi i Kosovës që t’i marrë përsipër krimet që nuk i ka bërë. Pra vota PËR në Kuvendin e Kosovës më 3 Gusht, ia vuri në barrë Kosovës dhe Shqipërisë një barrë që nuk iu takon, spastrimin etnik kundër serbëve në Kosovë. Mos të harrojmë se Dik Marty dhe Ëilliamsoni e përfshijnë edhe Shqipërinë si përgjegjëse në ato krime të pretenduara.

Pse mendoni se kjo është padrejtësi ndaj Kosovës?

Kosova ka qenë një vend i okupuar nga Serbia. Popullata shqiptare në Kosovë ka qenë e shtypur egërsisht nga të gjitha regjimet pushtuese, por sidomos nga ai i Milosheviçit. Pikërisht popullata shqiptare në Kosovë iu nënshtrua një shtypje sistematike, duke filluar nga burgosjet politike, dëbimet masive nga vendet e punës, helmimet e nxënësve nëpër shkolla, dëbimet e nxënësve dhe studenteve nga shkollat dhe Universiteti, vrasjet e shqiptarëve në shërbimin ushtarak të Armatës Popullore të Jugosllavisë, vrasjet nëpër demonstrata e deri tek masakrat dhe spastrimi etnik që iu bë shqiptarëve të Kosovës gjatë luftës 1998-1999. Janë rreth 12.000 shqiptarë të vrarë e të masakruar për vetëm 18 muaj në Kosovë, rreth 20.000 gra e vajza të përdhunuara, 1.600 fëmijë të vrarë e të masakruar, 120.000 shtëpi të djegura, e ndërkohe që ju nuk mund ta gjeni asnjë emër të një fëmije serb që është vrarë në luftë nga shqiptarët, e ju më pyesni mua se pse mendoj se kjo është padrejtësi ndaj Kosovës dhe luftës së saj.

E për këtë unë edhe ndjej dhimbje, por edhe krenari. Ndjej për ata që janë vrarë, por njëkohësisht jam krenar që i përkas një ushtrie siç ishte UÇK dhe një populli siç janë shqiptarët, nga të cilët nuk ka pësuar qoftë edhe një fëmijë.

Ja pse gjykimi i shqiptarëve për spastrim etnik është i padrejtë.

Si një nga krerët e UÇK-së, por dhe si dëshmitarë i atyre viteve, për çfarë krimesh mund të thirren ish-krerët e UÇK-së?

Unë nuk mund tani të shpik një krim që të them se ja për çfarë krimesh mund të akuzohen, siç thoni, ish-krerët e UÇK-së. Ish-krerët e UÇK-së iu kanë nënshtruar tre proceseve në Gjykatën Ndërkombëtare në Hagë dhe nga të treja këto procese kanë dalë të pafajshëm. Çfarë duhet të bëjmë tash ne, t'i nxjerrim gjithsesi të fajshëm? Jo. Këtu vetëm njëra palë është kriminale. Pra ose Serbia dhe Millosheviçi që e përgjakën gjithë ish- Jugosllavinë, ose ne shqiptarët që luftuam kundër Serbisë dhe Millosheviçit. Këtu s'ka vend për të dyja, as në fajësi as në pafajësi. Vetëm njëra është fajtore. E gjithë opinioni botëror e di dhe ka fakte kokëfortë për këtë, se regjimi i Millosheviçit qe përgjegjës dhe fajtor.

 Pavarësisht se Kosova po luftonte krah të drejtës, a e përjashtoni kategorikisht mundësinë që edhe UÇK të ketë kryer krime lufte në atë situatë?

UÇK-ja dhe luftëtarët e saj kanë bërë luftë çlirimtare. UCK-ja nuk ka hartuar, zhvilluar as përkrahur asnjë fushatë kundër civilëve as për t’i vrarë as për t’i dëbuar apo diçka që ka të bëjë me krime lufte. Ka 16 vite që ka përfunduar lufta dhe nuk po ndalet gjuetia për të gjetur mundësi të çfarëdoshme në ngritjen e akuzave për krime siç duan t'i quajnë të UCK-së. Edhe pas gjithë kësaj ende nuk është provuar një gjë e tillë.

Ju vet a frikësoheni se do të akuzoheni nga Gjykata Speciale ( pasi jeni një ndër emrat e lakuar së paku)?

Njëherë le t’i ndajmë gjërat. Kur bëhet fjalë për drejtësi, unë kurrë nuk i frikësohem asaj, madje dua të jem aleat i saj. Kurse kur bëhet fjalë për padrejtësinë, atëherë ajo gjithmonë gjuan padrejtësisht. Në këtë rast, unë nuk e kam hallin tim, ndonëse, siç thoni ju, qenkam nje emër i lakuar. Une kam merakun se do të jemi në vazhdimësi objektiv i padrejtësisë. E, ne shqiptarët kemi përvoja te hidhura sa herë jemi targetuar nga padrejtësia.

Ju thoni që jam nje emër i lakuar, në fakt une nuk e di nga kush konkretisht jam lakuar? Ajo çfarë di me siguri është se asnjëherë deri me tash nuk ka ndonjë proces gjyqësor ndaj meje për asnjë lloj aludimi a dyshimi pavarësisht se mund te kem qene i shenjestruar.

 Keni qenë Ministër i Brendshëm në qeverinë e Thaçit, kohë kur kanë ndodhur krime të rënda dhe janë vrarë rivalë politikë dhe pjesëtarë pakicash. Çfarë dini për këto ngjarje?

Në kohën e Qeverisë së Përkohshme të Kosovës, kur unë kam qenë Ministër i saj, pra në vitin 1999, kompetencat në fushën e sigurisë i kanë pasur KFOR/NATO dhe UNMIK/OKB. Asnjë kompetencë në fushën e sigurisë në atë kohë nuk na ishte e lejuar nga të përmendurit më lartë. Madje ata edhe janë kujdesur në vazhdimësi që të mos i kemi këto kompetenca.Pikërisht për këtë fakt, pra mospasjen e këtyre kompetencave, unë si Ministër i asaj qeverie jam angazhuar që në bashkëpunim me faktorin ndërkombëtar që i mbartte të gjitha përgjegjësitë për sigurinë me KFOR, UNMIK e OSBE që ta themelojmë dhe zhvillojmë së bashku Shërbimin Policor te Kosovës, që sot është Policia e sotme e Kosovës, gjë të cilën e kemi bërë me sukses. Në saj të atij bashkëpunimi Kosova ka njërën nga policitë më të zhvilluara në rajon, anipse çdo ditë e më shumë, grupe të caktuara politike e parapolitike  janë duke u përpjekur që edhe PK-në ta kenë në duart e tyre si të kapur ose të përdorshme për ta.

Prandaj është me rëndësi të njoftohemi me të gjitha adresat e përgjegjësit për situatën pas luftës në Kosovë. Pra të mësojmë kompetentet e atëhershëm dhe nga sistemi i tanishëm i drejtësisë se çfarë në të vërtetë ka ndodhur atëherë kur janë vrarë qytetarë dhe figura publike e politike.

 Duke qenë bashkëpunëtor me Hashim Thaçin, por edhe “shokë lufte”, çfarë ndodhi më vonë që u shkëputët prej tij dhe u bëtë pjesë e Vetëvendosjes së Albin Kurtit?

 Qenia “shok lufte” nuk është kontrate e përhershme ndaj së cilës ndiejmë obligim edhe pas luftës. Unë shoke lufte kam në të gjitha partitë dhe subjektet politike dhe  rrjedhimisht nuk mund të jem në të gjitha subjektet politike, pse aty kam shokë lufte. Hashim Thaçi është kryetar i Partisë Demokratike të Kosovës, anëtar i së cilës nuk kam qenë asnjëherë. Duke mos qenë anëtar i asaj partie s’kam pasur sesi të shkëputesha prej saj. Në kohën kur është themeluar PDK-ja unë kam qenë në Trupat Mbrojtëse të Kosovës (TMK) me detyrën Komandant i Akademisë së Mbrojtjes, me gradë ushtarake Gjeneralmajor. Ishin krejt kohë e rrethana të tjera që unë u shkëputa nga jeta ushtarake dhe u bashkëngjita në jetën politike. Por asnjëherë si PDK.

Pra në Lëvizjen VETËVENDOSJE! nuk kam ardhur si “i shkëputur” nga Thaçi, por i bindur se rruga dhe projekti i Lëvizjes VETËVENDOSJE është rruga dhe projekti me i drejtë politik në Kosovë.

 Cilat janë raportet tuaja me Thaçin aktualisht?

 Sot me Thaçin jemi oponent politik me bindje të ndryshme politike e konceptuale, siç kemi qenë pothuajse prej shumë kohësh. Unë nuk mund të kem raporte të afërta qoftë edhe me një “shok lufte” pikërisht kur një shok lufte shkel mbi luftën që kemi bërë dikur, kur nga një luftëtar kundër armikut kthehet në luftëtar kundër luftës së vet. Unë nuk mund të kem raporte e afërsi me një “shok lufte” ku nga një ushtar i atdheut, kthehet në një ushtar servil i marrëveshjeve kundër interesave të atdheut.

Ju kujtoi se ai nënshkroi marrëveshjet më të dëmshme të mundshme me Serbinë. Marrëveshjet e tilla e kanë larguar Kosovën nga Shqipëria dhe e kanë afruar Kosovën më afër Serbisë, për të mos thënë e kanë kthyer Kosovën në një shtet satelit të Serbisë.

Sot ai “shok lufte” ka hequr dorë nga flamuri me të cilin luftoi UÇK, ka hequr dorë nga bashkimi kombëtar për të cilin luftuan dhe ranë dëshmorët, ka hequr dorë nga betimi i ushtarit të UÇK-së, ka hequr dorë nga gjithçka për të cilën luftoi UÇK-ja.

Ne dikur, ndoshta edhe ishim bashkë shokë të një ideali, por sot ai është larg atij ideali. Sot, unë, në mes një shoku lufte pa ideal dhe një ideali pa një shok lufte kam zgjedhur të dytin.

Kjo që thash nuk vlen vetëm për Thaçin, por për të gjithë ata që dikur ishim bashkë në luftë e tash janë kthyer në shërbyes servil kundër interesave kombëtare.

Përse në protestat e Lëvizjes Vetëvendosje nuk jeni arrestuar ndonjëherë nga policia?

Pyetja do të duhej të bëhej se përse duhet të arrestohet një protestues. Në protestat që ka organizuar Lëvizja VETËVENDOSJE! janë arrestuar shumë qytetarë padrejtësisht. Jane rrahur dhe janë burgosur padrejtësisht. Janë arrestuar bashkë me qytetarët e tjerë edhe personalitete politike që mbajnë poste të larta publike të zgjedhur nga qytetarët. Janë arrestuar deputetë e aktivistë, është arrestuar dhe rrahur edhe nënkryetari i Kuvendit përderisa ai ishte bashke me qytetarët në protestë, është arrestuar edhe Kryetari i Prishtinës përderisa ishte bashkë me qytetarët në protestë. Pra, çështja nuk është se përse nuk jam arrestuar unë, por përse duhet të arrestohet Kryetari i Prishtinës gjatë një proteste? Përse duhet të arrestohen qytetarët që protestojnë, përse duhet të arrestohen deputetët që mbështesin qytetarët që protestojnë? Përse duhet të arrestohen nënkryetarët e Kuvendit? Kur t’më thoni ju se përse arrestohen ata, unë do t’ju përgjigjem se përse nuk arrestohem une.

Kurse në fakt, unë dua ta di se përse nuk arrestohen kriminelët, vrasësit, të korruptuarit në vendin tim.

 Në Kosovë ju lakojnë se nuk jeni transparent sa i përket pasurisë tuaj, është e vërtetë që jeni pronar firmash?

 Jo, nuk është e vërtetë që unë zotëroj, udhëheq apo jam pronar i ndonjë firme, kompanie, ndërmarrje apo biznesi. Të vetmet të ardhura, nga të cilat unë dhe familja ime përfitojmë dhe zotërojmë janë të ardhurat nga paga ime si deputet. Përveç kësaj unë jam i obliguar ligjërisht për transparencë të të ardhurave dhe deklaroj çdo vit gjendjen financiare prane Agjensisë Kundër Korrupsionit ku i kam të deklaruara të gjitha ato që i kam. Ato të dhëna janë publike dhe ju mund të keni qasje të papenguar.( http://www.akk-ks.org/sq/deklarimi-i-pasurise). Për të kundërtën unë mbaj përgjegjësi ligjore e penale.

TEMA