Kryebashkiaku i dënuar në Itali: Gabova si çdo emigrant…

Emri i kreut të bashkisë së Mallakastrës, Agron Kapllanaj u lakua në media si një ndër kryebashkiakët e dënuar nga drejtësia për vepra të ndryshme penale, kjo pas plotësimit të formularëve të vetë deklarimit në kuadër të zbatimit të ligjit të dekriminalizimit.

Duke e pranuar ndëshkimin që ka marrë nga drejtësia italiane, ai tregon si ka qenë e vërteta e dënimit dhe gjobës prej 200 euro.

Statusi i plotë

Të dashur miq, Detyrimi moral që kam ndaj jush dhe të gjithë publikut, më bën t’ju sqaroj historinë time të publikuar në media këto ditë. Ligjërisht, unë e kam përmbushur detyrimin tim duke plotësuar të gjitha të dhënat e kërkuara në formularin e vetëdeklarimit për dekriminalizimin. Unë nuk fola menjëherë pasi u bë publikimi i të dhënave të mia në media sepse nuk doja që fjala ime të tingëllonte si justifikim dhe për këtë arsye, po ju drejtohem sot. Besoj që sot sqarimi im do të lexohet ftohtë nga të gjithë dhe secili prej jush ka mundësinë të më gjykojë pastër dhe pa emocion.

Unë nuk dua të jap asnjë justifikim. As nuk dua të them se nuk i mbaj mend detajet apo arsyet. Detyrimi im moral është që publiku meriton ta dijë, përsa kohë kam dalë të kërkoj para një viti besimin e tij dhe që me shumë bujari ma dha këtë besim.

Si shumë shqiptarë të tjerë, në vitin 1991, mes shumë vështirësive, emigrova në Itali, ku jetova 10 vjet, gjer në vitin 2000. Në vitin 1995, pasi kurseva disa para nga puna dhe për shkak të moshës së re që kisha, bleva një makinë të përdorur në Firenze. Sigurisht që padituria apo edhe dëshira e tepruar e moshës, për të patur makinën, më shtyu në nxitim ta blija nga një individ Italian, i cili dokumentat e makinës i kishte të falsifikuara. Iu gëzova makinës së blerë, pa ditur, për rrengun që më ishte punuar.

Është kjo një përgjegjësi totalisht e imja, për të cilën jam i gatshëm të mbaj cfarëdo mase, ligjore dhe morale. Kam kërkuar besimin e qytetarëve, duke iu premtuar atyre shembullin e punës dhe të moralit. Këtë kam besuar se kam treguar përsa kohë që kam qenë kryetar Komune dhe tashmë prej 1 viti, edhe Kryetar i Bashkisë Mallakastër. Bashkëqytetarët e mi kanë të drejtën të jenë në dijeni se cili është njeriu, që i kanë besuar drejtimin e Bashkisë së tyre. E sigurt është një gjë që iua kam premtuar dhe që nuk do rresht asnjë ditë së treguari. Ata nuk kanë në krye një njeri që i turpëron në dinjitetin e tyre.

Gjithsesi, ngjarja është ajo çka ju tregova më sipër. Unë kam depozituar sipas ligjit në KQZ vetëdeklarimin së bashku me dokumentet e tërhequra nga gjykata italiane dhe Ministria italiane e Drejtësisë. Vlerësimi tashmë i mbetet autoriteteve dhe publikut.