10 ditë fushatë për zgjedhjet në Kosovë, partitë nisin negociatat për koalicionet

Komisioni Qendror i Zgjedhjeve ka nisur zyrtarisht përgatitjet për zgjedhjet e parakohshme që do të mbahen më 7 qershor në Kosovë, pasi Kuvendi dështoi që të zgjidhet presidenti. Sipas planifikimeve, fushata zgjedhore pritet të fillojë më 28 maj, ndërsa kostoja e organizimit të procesit zgjedhor vlerësohet të kalojë 10 milionë e 800 mijë euro.

Paralelisht me përgatitjet institucionale, partitë politike kanë hyrë në fazën e negociatave për formatin me të cilin do të garojnë në zgjedhje. Lidhja Demokratike e Kosovës ka sinjalizuar mundësinë e një bashkimi më të gjerë të së djathtës. Kryetari i saj, Lumir Abdixhiku, është takuar së fundmi me ish-presidenten Vjosa Osmani në një darkë pune, por nga ky takim nuk janë dhënë detaje konkrete.

Mes Osmanit dhe Abdixhikut po diskutohen opsionet e bashkëpunimit, përfshirë edhe mundësinë e një liste të përbashkët zgjedhore. PDK ka bërë të ditur se nuk synon koalicione parazgjedhore me parti të tjera, por mbetet e hapur për diskutime që mund të çojnë në përfshirje individuale në listën e saj.

Vetëvendosje vazhdon praktikën e bashkëpunimit me parti të vogla në një listë të përbashkët, si Alternativa dhe Lista Guxo, megjithëse kjo e fundit është përballur me përçarje pas mosrikandidimit të Vjosa Osmanit për president. Zgjedhjet e parakohshme janë thirrur pasi Kuvendi nuk arriti të zgjedhë presidentin e ri të vendit.