Kryetari në detyrë i Partisë Demokratike të Kosovës, Enver Hoxhaj, ka thënë se PDK-ja në asnjë formë nuk do ta kontestojë mandatin e kryeministrit të sapozgjedhur, Albin Kurti, pavarësisht se ai ka një dënim nga sistemi i drejtësisë.
“PDK-ja nuk dërgon asgjë në gjykatë që ta kontestoj mandatin e Kurtit, i cili nuk ka pasur të drejtë që të bëhet deputet dhe i cili është bërë sot kryeministër. Nuk dua ta lë përshtypjen para qytetarëve të Kosovës që ne e përdorim Gjykatën Kushtetuese si instrument për ta bllokuar vullnetin e tyre. Qytetarët e Kosovës kanë folur dhe e kemi respektuar një vullnet të tillë”, tha Hoxhaj.
Më herët, shefi i grupit parlamentar të Lidhjes Demokratike të Kosovës, Arben Gashi e ka vënë në dilemë ligjshmërinë e mandatimit të Kurtit si kryeministër. Deklarata e tij u bë para votimit të qeverisë së re nga ana e Kuvendit të Kosovës.
“Kemi një person që është dekreduar që të jetë kryeministër i vendit, ndërkohë kemi një qeveri dhe një kuvend ka ra, pse një deputetë ka qenë i dënuar për vepër penale. Pra personi që është dekretuar është person më precedent penal, i dënuar dhe dënimi i tij nuk ka skaduar”, ka thënë Gashi.
Albin Kurtit iu pamundësua që të garojë për deputet në zgjedhjet e 14 shkurtit, për shkak të një dënimi më 2018.
Më 3 janar, 2018, deputetët e atëhershëm të Lëvizjes Vetëvendosje, Albin Kurti, Albulena Haxhiu, Faton Topalli dhe Donika Kadaj-Bujupi u dënuan me kusht për hedhjen e gazit lotsjellës në ambientet e Kuvendit të Kosovës. Në shtator të po atij viti, Gjykata e Apelit i ka vërtetuar dënimet e shqiptuara nga gjykata e shkallës së parë.
Më 22 mars, Kuvendi i Kosovës ka zgjedhur qeverinë e re të udhëhequr nga kreu i Lëvizjes “Vetëvendosje”, Albin Kurti. Pro përbërjes së kabinetit të ri qeveritar votuan 67 deputetë ndërsa 30 ishin kundër.