Ambasadori rus në Beograd: Kosova nuk është e pavarur

Ambasadori rus në Serbi, Aleksandr Chepurin, lidhur me çështjen e anëtarësimit të Kosovës në UNESCO, ka deklaruar se vendi i tij beson që një veprim i tillë shkel Rezolutën 1244 të OKB-së për Kosovën.

“Rusia beson se qëndrimi i Serbisë është i drejtë dhe legjitim dhe kjo çështje është e një rëndësie të madhe. Rusia do ta mbështesë Serbinë në atë që Beogradi zyrtar e konsideron të nevojshme për mbrojtjen e nevojave të saj kombëtare”, citohet të ketë thënë Chepurin për ‘Tanjug’.

Ai ka thënë gjithashtu se Rusia nuk pajtohet me strategjitë që ushtrojnë presion ndaj Serbisë në lidhje me UNECSO-n, përmes dialogut që zhvillohet në Bruksel mes Prishtinës dhe Beogradit.

Sipas tij, anëtarësimi i Kosovës në UNESCO është i kontestueshëm për shkak se drejtpërdrejt shkel Rezolutën 1244 të miratuar nga anëtaret e Këshillit të Sigurimit të OKB-së në vitin 1999.

“Kur flasim për anëtarësimin eventual të Kosovës në UNESCO, po flasim për politizimin e këtij institucioni ndërkombëtar. E mbështesim Serbinë në qëndrimin e saj, pasi në përputhje me Rezolutën 1244, Kosova nuk është e pavarur”, ka thënë Chepurin.