Der Standard: Nëse nuk krijohet qeveria deri në 24 shkurt, Kosova shkon në zgjedhje të reja

Duke analizuar situatën politike të Kosovës, media e njohur austriake “Der Standard” thotë se mbetet e paqartë nëse qeveria e re do të arrijë të krijohet.

Albin Kurti ka 15 ditë për të vendosur, shkruan e përditshmja e njohur në një artikull kushtuar aktualitetit politik në Kosovë në mesin e ngërçit që kanë krijuar mospajtimet e Lëvizjes Vetëvendosje me LDK-në, të cilat nuk po arrijnë një marrëveshjeje përfundimtare për bashkëqeverisje.

Gazeta austriake kujton se presidenti Hashim Thaçi, e firmosi të shtunën mandatimin e Albin Kurtit për krijimin e qeverisë së re. “Der Standard” përmend afatin ligjor që është 15 ditë dhe nëse ekzekutivi nuk formohet, atëherë do të pasojnë zgjedhjet e reja.

“Kjo për çdo rast ndodh edhe nëse qeveria nuk formohet 60 ditë pas krijimit të parlamentit, dhe një periudhë e tillë zgjat deri në 24 shkurt”, kujton gazeta austriake në artikullin e saj. ‘Der Standard’, shkruan se VV dhe LDK kanë mosmarrëveshje vetëm sa i përket postit të presidentit të vendit, dhe se për të gjetur një zgjidhje, deri tani nuk kanë mjaftuar as tre muaj negociata.

Ajo thekson gjithashtu se në zgjedhjet e 6 tetorit, Vetëvendosja fitoi 29 vende në parlament, ndërsa Lidhja Demokratike e Kosovës një më pak, duke bërë kështu që e para të krijojë një “shumicë shumë të ngushtë”. Vendimin e tij të dy ditëve më parë, Thaçi e justifikoi duke thënë se bllokada politike e institucioneve nuk mund të vazhdojë dhe sipas tij, tani i takon Kurtit që ta pranojë ose jo mandatin për të formuar një qeveri.