Dështon konstituimi i Kuvendit. Kurti dorëhiqet, Limaj e Haradinaj nuk flasin

Këtë të martë dështoi seanca për konstituimin e Kuvendit të ri të Kosovës. Deputetet e partive opozitare kanë kundërshtuar miratimin e raportit të komisionit verifikues të mandateve, duke sjellë ngërç politik.

Kreu i PDK-së, Memli Krasniqi sqaroi se këtë vendim e morën pasi qeveria nuk ka dhënë dorëheqjen. Tashmë i takon Presidentes të vendosë se si do të vazhdohet me tutje. Albin Kurti dorëzoi dorëheqjen si kryeministër, në mënyrë që të betohej si deputet, po ashtu kanë bërë edhe ministrat e tij. Ai ishte i vetmi që kishte marrë me vete dhe një flamur kombëtar shqiptar. Seanca prodhoi dhe momente mjaft pikante, duke dhënë sinjale të shumta sa i përket koalicioneve paszgjedhore apo formimit të qeverisë së re.

Kryetari i Aleancës për Ardhmërinë e Kosovës, Ramush Haradinaj dhe kryetari i Nismës Socialdemokrate, Fatmir Limaj, nuk janë përshëndetur dhe as kanë biseduar me njëri-tjetrin në sallën e Kuvendit të Kosovës. Këta të fundit hynë në koalicion parazgjedhor dhe morën 8 deputetë në zgjedhjet e 9 shkurtit.

Raportohet për një marrëveshje të mundshme mes kreut të Lëvizjes Vetëvendosje, Albin Kurti, dhe kryetarit të Nismës, Fatmir Limaj për votimin e qeverisë së re. Flitet për një pakt mes Kurtit dhe Duda Balje që përfaqëson pakica boshnjake, por deputetja u pa shumë e afërt me kreun e PDK-së, Memli Krasniqi. Liderët e PDK-së dhe të LDK-së konsultohen me anëtarët e tyre partiakë, por që i kanë kthyer shpinën kreut të Vetëvendosjes. Mes tyre nuk ka patur ndonjë përshëndetje.