Edita Tahiri: Samiti i Ballkanit të merret me arrogancën autokratike: zgjedhje dhe shkarkim Presidenti, pa opozitën

Edita Tahiri, një nga figurat e fuqishme të politikës kosovare brenda dhe jashtë vendit, i ka dërguar një mesazh të ashpër, kritik, liderëve të Bashkimit Europian lidhur me Samitin e Liderëve të Ballkanit Perëndimor që bashkëdrejtohet në Tiranë nga Kryeministri shqiptar Edi Rama.

“Samiti i Ballkanit sot në Tiranë duhet të merret me çështjen e autokracisë që ka mbërthyer disa vende në rajonin tonë, – shprehet Tahiri në Fb. – Kjo çështje nuk pritet të hapet nga liderët e këtyre vendeve, por duhet ta hapë përfaqësuesi i BE-së.

Arroganca autokratike ka bërë që disa vende me lehtësi të padurueshme bëjnë zgjedhje pa opozitën në dëm të demokracisë, madje shkojnë deri në shkarkim të Presidentit pa pjesëmarrjen e opozitës, siç ishte dje rasti në Shqipëri.

Bashkimi Evropian duhet të jetë i vendosur që të mos lejojë shkeljet e demokracisë, sepse nuk mund të ketë stabilitet politik pa një demokraci gjithëpërfshirëse!”, shprehet Edita Tahiri.