Ekspertët shprehen skeptikë që Kosova të ishte destinacioni final për 400 kg kokainë
Ekspertët e sigurisë janë skeptikë që destinacioni fundor i 400 kilogramëve kokainë që u kapën në Lipjan të hënën të ketë qenë Kosova. Duke përgëzuar autoritetet kosovare, shqiptare, italiane dhe amerikane për aksionin e kryer, Plator Avdiu dhe Avni Islami thanë se sasia e madhe e ngarkesës lë shkas për t’u menduar se droga nuk kishte si destinacion përfundimtar Kosovën.
”Nëse do të ishte transit pse u sekuestrua në Kosovë, por nuk u la të vijohej më tutje deri në destinacionin e fundit për t’u kapur menjëherë i gjithë rrejti kriminal i drogës, sasia prej 400 kilogramësh është jashtëzakonisht e madhe dhe i tejkalon edhe kërkesat e tregut të Kosovës, Shqipërisë dhe Maqedonisë së Veriut”,-tha eksperti i sigurisë Avni Islami për ”EuroNews Albania”, duke këmbëngulur se ngarkesa ishte për vende të treta si BE-ja.
Nga ana tjetër, Islami tha se nëse konfirmohet që Kosova do të ishte vend final do të konfirmoheshin pretendime për sofistikimin e grupeve kriminale dhe kalimin e vendit nga vend tranzitor në vend shpërndarës. Ai ngriti dyshimet kryesore se Kosova mund të jetë bërë strehë e bandave që përpunojnë drogën dhe e shpërndajnë atë në vendet e BE-së. Islami e bazoi dyshimin te fakti se destinacioni i transportit nga Brazili në Itali nuk vijoi direkt në vendet e BE-së, por kaloi në Shqipëri dhe më pas në Kosovë “për të humbur gjurmët”.
Eksperti i sigurisë, Plator Avdiu vuri theksin te fakti që nuk është e konfirmuar ende nëse destinacioni i fundit për këtë sasi të ketë qenë Kosova. Ai u shpreh se bashkëpunimi policor i Kosovës është vetëm në rrafshin rajonal dhe bilateral dhe grupet kriminale mund të kenë shfrytëzuar pikërisht kalimin nga Kosova për këtë arsye lehtësimi.
