Haradinaj: Nuk kam besim te Kurti, nuk bëhemi pjesë e qeverisë së tij

Ramush Haradinaj ka përjashtuar mundësinë e përfshirjes e partisë së tij, Aleanca për Ardhmërinë e Kosovës, në koalicionin qeverisës me Vetëvendosjen.

Kryeministri në detyrë tha se nuk beson në aftësitë menaxheriale të Albin Kurtit duke shtuar se qeveria e tij do të zhgënjejë qytetarët.

“Ne jemi opozitë, ata i kanë fituar zgjedhjet dhe duhet të formojnë institucionet. Jemi opozitë, nuk e shohim vetën pjesë e Qeverisë Kurti”, tha Haradinaj. “Çdo herë kam thënë që kam dyshim në aftësitë e tij dhe mendoj që do të jetë një zhgënjim kjo qeveri. Nuk e kam thënë për arsye të caktuara personale, por e kam thënë në bazë të vlerësimit të punës. Duke e njohur edhe të rrethanat e Kurtit dhe koalicionit, nuk mendoj që do të jetë një qeveri që do t’i përmbushë pritjet e qytetarëve, për fat të keq do të jetë zhgënjim”, tha ai.

Haradinaj deklaroi gjithashtu se vonesa e formimit të qeverisë nuk i bën mirë vendit dhe përgjegjësia për të ngritur koalicionin qeverisës i takon fituesve.

“Kur kam krijuar Qeverinë më është dashur të negocioj edhe me Listën Serbe, tani edhe Albini e ka marrë vesh që duhet. Ne nuk refuzojmë diskutime për interes të vendit, për tema nacionale, por nuk kemi ndonjë rol për të ndihmuar në krijimin e institucioneve, përgjegjësia bie mbi fituesit. Nëse fituesit dalin në konferencë për shtyp dhe thonë ne nuk mund ta bëjmë, atëherë ne duhet të interesohemi çfarë të bëjmë”, shtoi ai.