Xhirot me motor ishin një nga pasionet më të mëdha të Lorik Deçit, 38-vjeçarit nga Kosova, i cili humbi jetën mbrëmjen e së enjtes në një aksident pranë fshatit Fan, në Mirditë.
Loriku jetonte në Prishtinë, ku ishte i angazhuar në fushën e pasurive të paluajtshme. Përveç punës, ai njihej si një adhurues i sporteve ekstreme dhe aktiviteteve në natyrë. Në rrjetet sociale ndante shpesh momente nga aventurat e tij me motor, ski, snowboard, rafting dhe hedhje me parashutë.
Lajmi për ndarjen e tij nga jeta ka prekur familjarët, miqtë dhe të afërmit, të cilët e kujtojnë si një njeri plot humor, energji dhe dashuri për jetën.
Pasioni për aventurën shoqërohej edhe me një dhimbje të madhe personale. Prej 11 vitesh, Lorik Deçi jetonte me mungesën e nënës së tij, të cilën e kujtonte shpesh në rrjetet sociale përmes fotografive dhe mesazheve prekëse. Në një prej dedikimeve të tij, ai shkruante se shpresonte që një ditë të ribashkohej me të.