Hoxhaj: Mustafës dhe Kurtit ju deshën 5 muaj negociata për krijimin e qeverisë dhe 50 ditë për prishjen e saj
Ish-Ministri i Jashtëm, Enver Hoxhaj, deklaron se LDK-VV treguan papërgjeghmëri politike ndaj qytetarëve.
Për Rtv Ora, ai thotë se kryetarëve të këtyre partive ju deshën 5 muaj për marrëveshjen qeverisëse dhe ju mjaftuan vetëm 50 ditë për të prishur qeverinë.
Rezultatin e dobët në zgjedhje të PDK më shumë se me keqqverisjen, ku edhe pranon se gabimet nuk kanë munguar, e lidh me një shoqëri të re që ka lindur në Kosovën e lirë dhe të pavarur të cilës sipas tij PDK duhet ti përshtatet nëse synon që të rikthehet në pushtet.
Hoxhaj: Nuk mendoj se kanë qenë gabimet, që nuk kanë munguar, që kanë determinuar rezultatin zgjedhor. Përkundrazi nëse e krahasojmë sjelljen politike të VV dhe LDK që negociuan për 5 muaj dhe për 50 ditë e prishën këtë qeveri tregon që këto parti politike krahasuar me PDK në raport me qytetarët kanë treguar edhe papjekuri politike dhe paaftësi qeverisëse. Ne i kemi ofruar vendit parashikueshmëri, u kemi ofruar qytetarëve dhe ndërkombëtarëve besueshmëri. Kemi arritur të përmbushim pritshmëri të mëdha. Rezultati zgjedhor është pasojë e ndryshimit të shoqërisë në Kosovë, është krijuar në shoqëri e re që ka kërkesa të reja dhe PDK do të duhet t’ju përshtatet, ti njohë dhe artikulojë këto kërkesa të reja nëse duam që të rikthehemi në pushtet.
