Kryetarja e Gjykatës Speciale: Nuk i ndjekim udhëzimet politike të askujt, puna jonë do flasë vetë

Kryetarja e Dhomave të Specializuara të Kosovës në Hagë që njihen si Gjykata Speciale, Ekaterina Trendafilova deklaroi se drejtësia do të garantohet dhe se puna e këtij institucioni do të flasë vetë. Ajo tha se Gjykata Speciale funksionon pa ndikimin dhe ndërhyrjen e askujt dhe se gjykatësit janë të pavarur.

“Dhomat e Specializuara funksionojnë pa ndikimin dhe ndërhyrjen e askujt, politike apo ndonjë tjetër. Dhomat e Specializuara (DHSK) dhe gjykatësit janë të pavarur, nuk veprojnë sipas udhëzimeve të askujt dhe drejtohen vetëm nga ligji. Të tre menaxherët dhe të gjithë gjyqtarët. Çdo shkelje e këtij detyrimi, megjithëse nuk besoj se do të ketë, do t’i nënshtrohet mekanizmave disiplinorë përkatës”, tha Trendafilova në një intervistë për mediumin serb “Politika”.

Trendafilova tha se ka përpjekje për ta minuar legjitimitetin e Gjykatës Speciela, por sipas saj kjo gjykatë do të merret vetëm me mandatin e saj. “Ka përpjekje për ta minuar legjitimitetin e DHSK-së, por ato nuk janë të reja dhe sigurisht që do të zgjasin sa të ekzistojë kjo gjykatë. Ne nuk do të përfshihemi në ndonjë debat politik, por do të merremi me atë që është mandati i DHSK-së, dhe kjo është që të sigurojmë drejtësi”, shtoi ajo, transmetojnë mediat. Kryetarja e Speciales shton se publiku, “përfshirë ai serb, do të jenë në gjendje të konkludojnë vetë nëse DHSK-ja e ka përmbushur rolin që i është besuar nga mandati i saj. Unë besoj se puna e DHSK-së, urdhëresat dhe vendimet do të flasin vetë. Në këtë drejtim, DHSK-ja përpiqet të sigurohet që publiku të informohet me saktësi, në kohën e duhur dhe në një mënyrë transparente. Ne nuk ndjekim udhëzimet e askujt. Kjo është një gjykatë e themeluar në përputhje me marrëveshjen e ratifikuar nga Kuvendi i Kosovës dhe e përqëndruar ekskluzivisht në kryerjen e procedurave gjyqësore të sigurta, të drejta, të paanshme dhe të pavarura. Për këtë qëllim, ekziston një shërbim i specializuar në DHSK, detyra e të cilit është të sigurojë mbrojtje dhe mbështetje për viktimat dhe dëshmitarët, para, gjatë dhe pas gjykimit. Për t’i mbrojtur ata, aktivitetet e këtij shërbimi janë rreptësishtë konfidenciale. Gjyqtarët mund të urdhërojnë masa mbrojtëse gjatë gjykimit, të tilla si fshirja e emrave nga regjistrat, caktimi i pseudonimeve, aplikimi i një mase të ndryshimit të karakterit ose zërit dhe lëshimi i urdhrave për të dëshmuar në seancë të mbyllur ose gjysmë të mbyllur”, tha kryetarja e Gjykatës Speciale.