Kurti: E turpshme mungesa e mbështetjes për Feride Rushitin, deri dje opozita bënte postime për të

Kryeministri i Kosovës, Albin Kurti thotë  se procesi për zgjedhjen e Presidentit po pengohet nga mungesa e bashkëpunimit të opozitës dhe bojkotimi i seancave në Kuvend. Në një konferencë për media këtë pasdite, ai ka folur edhe për kandidaturat e propozuara për këtë pozitë.

“Si kandidate nxorëm dy gra profesoreshën Hatixhe Hoxha dhe doktoreshën Feride Rushiti”, ka thënë Kurti. Ai ka kritikuar opozitën për, siç tha, qëndrime kontradiktore ndaj kandidateve. “Kur zonja Feride Rushiti nderohej e nominohej për çmime prestigjioze ndërkombëtare, shumë deputetë opozitar mburreshin me të përmes postimeve në rrjete sociale”, ka deklaruar ai.

Kurti ka përmendur edhe qëndrimet e disa përfaqësuesve opozitarë. “Ta zëmë postimet si ajo e ish-shefes së Grupit Parlamentar të LDK-së, Hykmete Bajrami apo postimet si ajo e nënkryetares së Kuvendit nga PDK-ja, Vlora Çitaku”, është shprehur ai.

Ai ka kritikuar sidomos qëndrimet e Partisë Demokratike të Kosovës. “PDK jo vetëm që nuk u mjaftua me refuzimin e pozitës së kryeparlamentarit si ofertë nga ne, por sot doli pikërisht përmes Vlora Çitakut tërheqja e zonjës Rushiti nga kandidimi”, ka thënë Kurti.