Kryeministri i Kosovës, Albin Kurti ka reaguar në një moment kyç të zhvillimeve politike në vend, teksa sot skadon afati për zgjedhjen e presidentit dhe Kuvendi ende nuk ka thirrur zyrtarisht seancën për votimin e kreut të shtetit. Në një konferencë të jashtëzakonshme për mediat, Kurti tha se zgjedhja e presidentit është çështja më urgjente që duhet të zgjidhet gjatë ditës, duke paralajmëruar se dështimi i saj do ta çojë Kosovën drejt zgjedhjeve të reja brenda pak orësh. “Pa president sot, Kosova është në zgjedhje dhe pa institucione”, deklaroi Kurti.
Ai foli edhe për situatën e ish-krerëve të UÇK-së që po përballen me procesin gjyqësor në Hagë, duke theksuar se kjo çështje nuk duhet të lidhet me zhvillimet politike në Kosovë apo me zgjedhjen e presidentit. “Çështjen e dënimit të krerëve të UÇK-së në Hagë nuk e kemi ndërlidhur me zhvillimet e brendshme dhe as me çështjen e presidentit. Këto janë tema të ndara, por që i tejkalojnë të gjitha partitë. Janë çështje të interesit të përbashkët kombëtar”, tha ai.
Kurti tha se Ligji për Dhomat e Specializuara mundet të votohet më pastaj, duke respektuar afatin 72 orësh. “Le ta zgjedhim presidentin sonte dhe unë zotohem publikisht se në paraditen e së enjtes kalon leximi i dytë i Projektligjit për Dhomat e Specializuara”, tha ai. Sipas tij, LVV do të votojë në lexim të dytë Projektligjin e Dhomave të specializuara dhe këtë e bëjnë duke respektuar Rregulloren e punës së kuvendit, ku 72 orë i bie paraditja e së enjtes.
Ai e cilësoi zgjedhjen e presidentit si hapin që duhet të marrë vëmendjen e institucioneve gjatë orëve të mbetura, duke paralajmëruar se moszgjedhja e tij do të nënkuptonte shpërndarjen e Kuvendit dhe hyrjen e vendit në një proces të ri zgjedhor. “Me mosvotimin e presidentit shkojmë brenda orësh në zgjedhje”, përfundoi Kurti.