Kurti takon Starmer: Britania, rol kyç në sigurinë e rajonit

Në margjina të Samitit të 12-të të Procesit të Berlinit,  që po mbahet në Londër,  Kryeministri në detyrë i Kosovës,  Albin Kurti,  u takua me Kryeministrin e Mbretërisë së Bashkuar,  Keir Starmer.

Takimi pasoi diskutimet me Sekretaren e Shtetit për Punë të Jashtme,  Yvette Cooper,  dhe sesionet zyrtare të samitit,  ku u trajtuan temat qendrore: siguria,  rritja ekonomike dhe migracioni.

Kryeministri Kurti shprehu mirënjohje për udhëheqjen britanike dhe organizimin e samiti i cili për herë të dytë pas vitit 2018 po mbahet në Londër. Ai theksoi rëndësinë e rolit të Mbretërisë së Bashkuar në forcimin e bashkëpunimit rajonal,  sigurisë dhe paqes në Ballkanin Perëndimor.

Gjatë takimit,  u diskutuan mënyrat për të thelluar bashkëpunimin në fusha me interes të përbashkët,  përfshirë,  energjinë, sigurinë dhe mbrojtjen, infrastrukturën, dhe edukimin.

Kurti veçoi rëndësinë e bashkëpunimit në fushën e mbrojtjes,  në kohën kur Kosova po vazhdon investimet për modernizimin e kapaciteteve të saj mbrojtëse.