Kush është “Los Suecos”, banda famëkeqe që qëndron pas vrasjes së Flamur Beqirit

Një bandë e njohur kriminale, që po terrorizon me vrasje zonën e ‘Costa del Sol’ në Spanjë mendohet se qëndron pas vrasjes së shqiptarit Flamur Beqiri në Londër.

Kështu shkruan gazeta e njohur britanike, Mirror.

Flamur Beqiri, 36 vjeç, u qëllua për vdekje teksa ishte me të shoqen dhe djalin e vogël përpara shtëpisë luksoze në Londër.

Tashmë policia britanike mendon se grupi ku bënte pjesë dikur në Suedi shqiptari, është përfshirë në një përplasje të fortë me një bandë të frikshme në jug të Spanjës.

“Los Suecos”, ose ndryshe Suedezët, dyshohet se kanë urdhëruar vrasje, rrëmbime dhe shkatërrime pronash për rivalët kundërshtarë.

Lideri i bandës është Amir Mekky, një 22-vjeçar që është në arrati që kur i shpëtoi një operacioni me 120 policë spanjollë.

Ai u qëllua në këmbë dhe tre bashkëpunëtorë të tij u vranë në Malmo të Suedisë pesë muaj më herët. Burimet suedeze thonë se krimi ishte porositur nga banda e lidhur me shqiptarin Beqiri.

Flamur Beqiri, një 36-vjeçar që e përshkruante veten si një producent i industrisë muzikore, po shëtiste me gruan dhe djalin e vogël drejt shtëpisë së tyre me vlerë 1.8 milionë sterlina, në një prej rrugëve më në modë në Londër, rreth orës 9 të mëngjesit, në prag të Krishtlindjes, kur një atentator i vetëm doli në heshtje nga hijet.

Fqinjët dëgjuan pesë të shtëna. Katër me shpejtësi, thuhet se u qëlluan në shpinën e Beqirit. Pasi ai ra në tokë, një plumb u zbraz në kokën e tij nga një distancë e vogël. Vrasësi u arratis.

Beqiri mbeti në një pellg gjaku, e shoqja Debora Krasniqi ulërinte për ndihmë. Pavarësisht përpjekjeve më të mira të një infermiereje që jetonte aty pranë dhe ekipit të ndihmës mjekësore, ishte e pamundur. Ai u shpall i vdekur në vendin e ngjarjes.