Marrëveshja VV-LDK, reagon Basha: U plotësua vullneti i qytetarëve. PD në krah të Kosovës

Kryetari i PD-së, Lulzim Basha ka reaguar pas arritjes së marrëveshjes mes Vetëvendosjes dhe LDK-së për koalicionin që do t’i hapë rrugë krijimit të qeverisë së re.

Përmes një postimi në “Facebook” Basha thekson se marrëveshja e sotme është një plotësim i vullnetit të qytetarëve të Kosovës. Ai shton mes të tjerash se Partia Demokratike do të jetë plotësisht në krah e mbështetje të Kosovës.

Reagimi i plotë i Bashës
Në emrin tim e të Partisë Demokratike, përshëndes përzemërsisht LVV dhe simotrën tonë LDK për marrëveshjen e arritur.
Marrëveshja e sotme është një plotësim i vullnetit të qytetarëve të Kosovës. Ajo është një akt ndershmërie dhe pjekurie politike e një vizioni të qartë të drejtuesve të LVV dhe LDK. Kjo marrëveshje është përgjigje konkrete e vullnetit për ndryshim i qytetarëve të Kosovës.
Partia Demokratike si përgjatë çdo dite të historisë së saj, do të jetë plotësisht në krah e mbështetje të Kosovës dhe udhëheqësisë së saj, sot në opozitë e më fort nesër në qeverisjen e vendit, në sfidat që i kemi përpara dhe që kërkojnë angazhim të sinqertë e bashkëpunim vëllazeror.