Pacolli: Gabimet e qeverisë bënë të mundur të fitojë opozita

Ministri i Jashtëm i Kosovës, Behgjet Pacolli i ftuar në studion e lajmeve në Ora News komentoi zgjedhjet e mbajtura në Kosovë, që u konsideruan si leksion për shumë vende evropiane.

Pacolli tha se fitorja e opozitës krahas  mënyrës se si ka vepruar, fitoi edhe për shkak të gabimeve të qeverisë.

Behgjet Pacolli: Qytetarët i kanë dhënë të drejtë opozitës. Opozita e fundit ishte më e qetë dhe kjo ndikoi tek qytetarët. Edhe gabimet e qeverisë bënë të mundur që opozita të fitojë. Dy partitë më të mëdha opozitare janë fituese dhe dëshiroj që këto parti të gjejnë konsensusin dhe të formojnë qeverinë. Kosovës i nevojitet një qeveri e mazhorancës shqiptare dhe me bashkëpunimin e këtyre dy partive kjo kërkesë do të plotësohet.

I pyetur se si i ka marrëdhëniet me kreun e Lëvizjes Vetëvendosje, Albin Kurti, Pacolli tha se nuk ka marrëdhënie të këqija.

Ai i bëri thirrje spektirit politik që ti vijë në ndihmë qeverisë së re.

Behgjet Pacolli: Me zotin Kurti nuk kam ndonjë marrëdhënie diçka, por nuk kam as marrëdhënie të këqija. Kam respekt për të dhe punën e tij dhe haptas jam shpreh për veprimet që ka bërë se unë kam konsideruar se nuk kanë qenë demokratike. Ai është kryeministri i ardhshëm i Kosovës dhe nuk kam arsye të mos bëj apel të gjithë spektirit politik që ti vijë në ndihmë qeverisë së re.