Policia e Kosovës reagon për situatën aktuale në veri të vendit

Pas tensioneve të së premtes në komunat veriore në Kosovë, sot, sipas policisë, në këtë pjesë të vendit situata është e qetë. Zëvendësdrejtor i policisë në veri, Veton Elshani, ka thënë se në veri situata është qetë edhe pse delikate, ndrkohë që shtoi se s’ka provokime nga qytetarët serbë.

“Situata në veri është e qetë, stabile edhe pse delikate. Ka lëvizje të zakonshme të qytetarëve. Njësitet policore gjenden në terren duke e kryer punën e vet”, deklaroi Elshani.

Të premten, serbët lokalë kanë tentuar të bllokojnë objektet e komunave dhe të pengojnë hyrjen e kryetarëve të rinj shqiptar. Policia e Kosovës e cila asistoi kryetarët u detyrua të shpërndajë serbët që ishin mbledhur, por që ata nuk kishin përfillur urdhrat e policëve dhe kishin vijuar të gjuajnë me gurë në drejtim të tyre dhe të krijojnë barrikada në rrugë.

Si pasojë, pesë policë mbetën të lënduar si dhe u dëmtuan katër vetura zyrtare. Për zhvillimet e fundit në veri ka pasur reagime të shumta nga Shtetet e Bashkuara të Amerikës dhe Bashkimi Evropian. Përmes reagimeve të tyre, ndërkombëtarët kërkuan të mos përshkallëzohet situata pasi një gjë e tillë nuk ndihmon në procesin e dialogut mes dy vendeve.