Presidentja Osmani: Vuçiç duhet ta ndalojë mbështetjen për bandat kriminale, nuk kam plan të takohem me të

Presidentja e Kosovës, Vjosa Osmani ka lëshuar akuza ndaj Serbisë se vazhdimisht ka shërbyer si satelit i Rusisë në rajonin e Ballkanit dhe se ka pasur tendenca për të destabilizuar Kosovën dhe vende të tjera të rajonit.

Në Samitin e Liderëve në Moldavi, Osmani po ashtu u shpreh se është e rëndësishme që shtetet aleatë të ndihmojnë në ndaljen e veprimeve destabilizuese të Serbisë në Veri. Më tej bëri me dije se nuk ka në plan të takohet me presidentin serb Aleksandër Vuçiç, derisa të zbatohen marrëveshjet.

Osmani u shpreh para mediave se bandat kriminale po i terrorizojnë edhe qytetarët në veri.

“Është me rëndësi që nga Serbia të kërkohet t’i ndalë veprimet destabilizuese dhe bandat kriminale. Këto janë grupe që janë në listën e zezë zë SHBA-së dhe të Britanisë. Ata po terrorizojnë qytetarët çdo ditë…Na duhet ndihma e aleatëve të jemi më të fokusuar në luftimin e grupeve, por urdhri ndaj tyre vjen nga Vuçiçi. Dihet kush i nxit ato, pra presioni duhet të jetë te Beogradi që ta ndalin dhunën… Kur ka dhunë, çdo zgjidhje mund edhe të fokusohet në implementimin e Marrëveshjes së Brukselit”, tha presidentja Osmani.