Ramush Haradinaj intervistë për median gjermane: Kurrë nuk kam kërcënuar dëshmitarë

Kryeministri i dorëhequr i Kosovës, Ramush Haradinaj, ka dhënë një intervistë për Frankfurter Allgemeine Zeitung (FAZ), ku ndër të tjerash ka folur për ftesën nga Dhomat e Posaçme, dorëheqjen e tij, proceset politike në vend dhe rrugëtimin në Gjykatat ndërkombëtare në mbrojtje të luftës së drejtë të UÇK-së.

Më poshtë intervista e plotë.

Ramush Haradinaj është lindur në vitin 1968 në Deçan, derisa kjo pjesë i takonte Krahinës Autonome të Kosovës, e cila ishte pjesë e Jugosllavisë së atëhershme. Pas formimit të Ushtrisë Çlirimtare të Kosovës në mes të viteve 90, Haradinaj u emërua Komandant në rajonin e tij. Pas angazhimit të NATO-s në Luftën e Kosovës nga e cila u ndoqën forcat serbe, Haradinaj themeloi partinë politike “Aleanca për Ardhmërinë e Kosovës” (AAK) e cila arriti të etablohet në vend.

Në fund të vitit 2004, Haradinaj u emërua Kryeministër i Qeverisë e cila atëbotë administrohej nga Misioni i OKB-së. Pas ngritjes së aktakuzës nga Tribunali i OKB-së për krime lufte në Hagë, Haradinaj dha dorëheqje në Mars të vitit 2005. Haradinaj u lirua nga Tribunali i Hagës pas procesit i cili zgjati 3 vite. Pasi ekzistonte dyshimi që është bërë presion mbi dëshmitarët, u ngrit edhe një aktakuzë, nga e cila ai u lirua sërish.

Tani së voni, nga Gjyqi i posaçëm për Kosovën me seli në Hagë, Haradinaj u ftua muajin e kaluar si i dyshuar, gjithsesi pa një aktakuzë. Haradinaj i cili qe zgjedhur Kryeministër në vitin 2017, me rastin e kësaj ftese nga Haga dha dorëheqje nga posti i Kryeministrit siç pat vepruar edhe në vitin 2005. Ai vazhdon të jetë Kryeministër në detyrë pasi që nuk është emëruar një pasardhës në këtë post.

FAZ: Zoti Kryeministër, në korrik kur u ftuat si i dyshuar nga Dhomat e Posaçme për Krime të Luftës në Kosovë, ju refuzuat të jepni deklaratë. Për këtë shkak as këtu s’do të tregoni se çfarë akuzash u janë bërë atje?

Haradinaj: Hetuesit hapën çështjen që donin të mësonin nga unë, çështjen e fillimeve të themelimit të Ushtrisë Çlirimtare të Kosovës dhe rolin tim aty. Me akuza specifike nuk jam konfrontuar. Avokati im i cili ishte i pranishëm me mua, më dha këshillën që as unë të mos përgjigjem në mënyrë specifike.

FAZ: Sa ka zgjatur marrja në pyetje?

Haradinaj: Rreth një orë.

FAZ: A prisni një aktakuzë?

Haradinaj: Për këtë nuk jam informuar. Jam ftuar dhe kam kryer detyrën time që të shfaqem aty. Çdo gjë tjetër i mbetet vlerësimit të Gjykatës.

FAZ: Në bazë të pyetjeve me të cilat ju kanë konfrontuar, a mund të nxjerrni një konkluzë nëse fjala është për të njëjtat akuza që u janë bërë dy herë nga Gjyqi i OKB-së për krime të luftës për ish-Jugosllavinë dhe ku ju si i akuzuar jeni mbrojtur?

Haradinaj: Ajo që mund të them është: Themelimi i UÇK-së dhe roli im në të, në dy proceset e mbajtura të cilat kanë zgjatur tetë vite dhe lirimi im në të dy këto procese, janë fare mirë të dokumentuara.

FAZ: Ekziston një qëndrim që Tribunali i Posaçëm është një instrument me të cilin provohet që politikanët e Kosovës të disiplinohen kur nuk dëgjojnë direktivat e qendrave perëndimore. A e thoni edhe ju këtë?

Haradinaj: Meqë vet kam qenë dy herë i akuzuar para Tribunalit për Krime të Luftës dhe dy herët jam liruar, për mua ishte një befasi e madhe që jam ftuar sërish. Nuk është kurrfarë fshehtësie që ndërrimin e kufijve në rajonin tonë, projekt ky i cili nga një pjesë e bashkësisë ndërkombëtare është përkrahur, e kam refuzuar si tepër të rrezikshëm. Për këtë shkak edhe them që taksa prej 100 për qind për mallrat e Serbisë, e vendosur nga Qeveria që kam udhëhequr unë, do të qëndrojë derisa Serbia të pranojë Pavarësinë e Kosovës. Duke patur parasysh këto rrethana, natyrisht që ekzistojnë shumë teori dhe spekulime për atë sesi erdhi deri tek kjo ftesë për mua.

FAZ: Vendosja e taksës duket që ju ka kushtuar me përkrahjen e Washingtonit pasi që Presidenti Trump e përkrah shkëmbimin e territoreve dhe ndryshimin e kufijve mes Serbisë dhe Kosovës.

Haradinaj: Për konsekuencat e mundshme kam qenë i vetëdijshëm, por kam qenë edhe i sinqertë me partnerët tanë në Washington dhe në Europë, në atë që u kam thënë: ndërrimi i kufijve kërcënon stabilitetin këtu në Kosovë dhe në krejt rajonin. Po kështu është e vështirë që ta hapim tregun për një shtet fqinj, i cili e vë në pikëpyetje ekzistencën tonë dhe na kërcënon. Për këtë shkak në Kosovë ekziston edhe uniteti që taksa do të mbetet derisa të vije tek njohja.

FAZ: Në Kosovë flitet që edhe Presidenti kosovar Hashim Thaçi është ftuar në Hagë, mirëpo ky për dallim nga ju këtë s’e ka bërë publike.

Haradinaj: Kam dëgjuar edhe unë këso spekulimesh gjithandej, mirëpo për këtë nuk mund të them asgjë. Për mua ka qenë e qartë menjëherë që vendin dhe qytetarët e mi duhet t’i informoj dhe duhet të jap dorëheqje. Në fshehtësi apo me marrëveshje të shfaqem para hetuesve për mua ka qenë e papranueshme. Për këtë shkak edhe dhashë dorëheqjen për herë të dytë në jetën time ndërlidhur me akuza të padëshmuara si shef i Qeverisë.

FAZ: Me dallimin që në dorëheqjen e vitit 2005 keni patur aktakuzë, kurse kësaj radhe jeni ftuar vetëm për marrje në pyetje.

Haradinaj: Mirëpo edhe si i dyshuar pa aktakuzë nuk dëshiroj që të udhëtoj në Hagë si Kryeministër. Këtë nuk kam dashur t’ia bëj shtetit dhe popullit tim.

FAZ: D.m.th., dorëheqja juaj nuk ka të bëjë me atë që ky koalicion ishte para shkatërrimit?

Haradinaj: Ky koalicion ka qenë para sfidave të mëdha, mirëpo këto nuk kanë ndikuar në dorëheqjen time. Një ftesë nga një gjyq paraqet një shkallë krejt të re.