Rëndohet situata nga koronavirusi në spitalet e Kosovës

Në Klinikën Infektive të Qendrës Klinike Universitare të Kosovës aktualisht janë të shtruar 111 raste me Covid-19.

Në raportimin ditor të kësaj klinike thuhet se “66 raste janë duke u trajtuar në reparte me oksigjen dhe kujdes intensive”. “Në repartin e Mjekimit Intensiv të kësaj klinike janë duke u trajtuar 6 raste, 2 prej të cilëve në gjendje të rëndë dhe 4 raste në gjendje kritike me frymëmarrje të asistuar me respiratorë. Po ashtu bëhet e ditur se disa pacientë me Covid-19 janë të shtruar edhe në objektin e Mjekësisë Sportive dhe në Klinikën e Pulmologjisë.

Kosova ka konfirmuar gjithsej 2,799 raste me koronavirus; prej tyre, 1,506 janë shëruar, ndërsa 50 kanë humbur jetën. Ministri i Shëndetësisë në Kosovë, Armend Zemaj, porositi ndërkohë qytetarët se mbajtja e maskave është e detyrueshme dhe se kushdo që shkel masat parandaluese kundër koronavirusit do të përballet me ligjin.

Masa të tjera të veçanta përfshijnë: distancën fizike, dezinfektimin, ajrosjen e lokaleve, higjienën e të tjera. Kryeministri i Kosovës, Avdullah Hoti, ka thënë të hënën se situata me koronavirus në Kosovë “është nën kontroll të brishtë”. Ai ka paralajmëruar masa të reja dhe ka thënë se Kosova është në rrezik nga vala e dytë e koronavirusit.