Presidenti i Kosovës Hashim Thaçi, ka reaguar ndaj deklaratave të Edward Joseph, pedagog në Universitetin e Uashingtonit, i cili mes tjerash në një intervistë ka thënë se po diskutohet edhe ndarja e Kosovës.
“Qëllimi i vërtetë i Grenell, Vuçiçit dhe Thaçit ishte të arrihet marrëveshja. Dhe unë besoj se bëhet fjalë për të njëjtën marrëveshje apo të ngjashme për të cilën ishin dakorduar gjatë mandatit të Mogherinit. Dhe kjo nënkupton ndarjen e Kosovës, që dikur quhej shkëmbimi i territoreve, por në thelb bëhet fjalë për ndarje sepse nuk e dimë se sa territor të Serbisë do të përfitonte Kosova. Sipas të gjitha gjasave diçka minimale”, ka thënë Joseph.
Nëpërmjet një postimi në Twitter, Thaçi e ka quajtur të trilluar deklaratën e Joseph, duke thënë se si munden analistët të krijojnë mendime të tilla të cilat nuk do ta ndihmojnë procesin e dialogut Kosovë-Serbi.
“Është zhgënjyese të shohësh se si disa analistë me lehtësi krijojnë planet e tyre të trillimeve (shkëmbim tokash, ndarje, autonomi) dhe t’ua atribuojnë atyre që janë duke u përpjekur të bëjnë një marrëveshje historike midis Kosovës dhe Serbisë. Përhapja e planeve dhe lajmeve të rreme nuk do të ndihmojë këtë proces”.