Dy persona kanë humbur jetën, ndërsa një tjetër ka mbetur i plagosur nga të shtënat me armë zjarri në Livoç të Ulët, në Gjilan. I dyshuari për rastin është vetëdorëzuar në polici. Ngjarja e rëndë është regjistruar të premten, rreth orës 14:25, bëri të ditur Policia Rajonale e Gjilanit.
Sipas njoftimit të policisë, viktima e parë, një burrë rreth 30-vjeçar, është gjetur pa shenja jete brenda një veture, me dyshimet se ishte vrarë me armë zjarri. Ndërkohë, në Spitalin e Përgjithshëm të Gjilanit është dërguar edhe një grua rreth 30-vjeçare, e cila, sipas dyshimeve fillestare, është vrarë nga i njëjti person. Nga ky incident ka mbetur i plagosur edhe një person tjetër. Pas trajtimit fillestar në Emergjencën e Spitalit të Gjilanit, ai është transferuar në Qendrën Klinike Universitare të Kosovës për kujdes të mëtejshëm mjekësor.
Informacionet e para të hetimeve tregojnë se mes personit të dyshuar dhe viktimave mund të ketë pasur lidhje familjare. Megjithatë, motivi i ngjarjes ende nuk është bërë i ditur nga autoritetet. Pas incidentit, i dyshuari është dorëzuar në polici. Gjatë veprimeve në terren, autoritetet kanë sekuestruar edhe një armë zjarri, që dyshohet se është përdorur në rast.
