“Turkish Airlines”, del nga pista ne Prishtinë

Një avion pasagjerësh i kompanisë “Turkish Airlines” ka dalë nga pista gjatë orëve të mbrëmjes së të hënës në Aeroportin e Prishtinës.

Mësohet se avioni ishte nisur nga Turqia dhe kishte si destinacion Prishtinën. Shkak i aksidentit, që fatmirësisht nuk ka shkaktuar persona të plagosur, duket se është bërë moti i keq me reshje të dendura shiu.

Mediat kosovare raportojnë se lajmi është dhënë nga një pasagjere, e cila ka bërë të ditur se ata nuk po lejohen të dalin nga avioni.

Në vendin e ngjarjes kanë mbërritur edhe forcat zjarrfikëse.

Zëdhënësja e Aeroportit të Prishtinës Valentina Gara ka thënë për Indeksonline se gjatë aterimit të një aeroplani të kompanisë turke, Turkish Airlines ka pasur një aksident teknik, por që nuk ka pasur të lënduar.

“Turkish Airlines TK1018 nga Stambolli ka pasur një aksident minor në aterim i cili nuk ka rezultuar me ndonjë të lënduar. Aeroporti është i mbyllur për momentin deri në përfundimin e hetimeve fillestare teknike”, ka thënë Gara për Indeksonline.