Tre deputetë që ishin pjesë e grupit parlamentar të Lëvijes Vetëvendosje në legjislaturën e fundit, Haxhi Avdyli, Jeta Statovci dhe Albera Reshitaj i janë bashkuar Vjosa Osmanit. Avdyli dhe Statovci ishin gjithashtu edhe nënkryetarë të Listës Guxo që udhëhiqet nga Donika Gërvalla dhe Faton Peci. Ish-presidentja Osmani pritet të garojë me kandidatët e saj në listën e Lidhjes Demokratike të Kosovës dhe t’i ofrohet elektoratit si kandidate për një tjetër mandat në krye të shtetit.
Analisti politik Arbnor Sadiku tha: “Ndikimi do të jetë në dëmtimin e menjëhershëm të asaj që është quajtur më parë Lista Guxo. Se si dhe sa mund të ndikojë kjo, mbetet me u pa dhe në zgjedhjet e 7 qershorit, por sigurisht dhe jam shumë i bindur që ky bashkëpunim dhe bashkim ndërmjet Lidhjes Demokratike, Lumir Abdixhikut dhe Vjosa Osmanit do të ketë një ngritje të menjëhershme të kësaj partie dhe do të ndikojë në frymën e gjithëmbarshme të orientimit të votës së djathtë tek Lidhja Demokratike e Kosovës”
Lëvizja Vetëvendosje rikonfirmoi koalicionin e 28 dhjetorit me Guxo, Alternativa dhe Partinë Shqiptare Demokristiane. për vazhdimin e bashkëpunimit politik dhe institucional e që sipas tyre do të jetë në shërbim të qytetarëve dhe interesit publik. Lëvizja Vetëvendosje deklaroi: “Kjo marrëveshje bazohet mbi vlerat e demokracisë, transparencës, sundimit të ligjit, zhvillimit ekonomik, drejtësisë sociale dhe forcimit të shtetit të Kosovës. Partnerët e koalicionit janë zotuar të punojnë ngushtë për ruajtjen e sovranitetit, integritetit territorial dhe avancimin e reformave që fuqizojnë institucionet demokratike dhe mirëqenien qytetare”.
Partia Demokratike e Kosovës dhe Aleanca për Ardhmërinë e Kosovës do të garojnë të vetme. Kryetari i Nismës Socialdemokrate, Fatmir Limaj ka kërkuar që të bëhet pjesë e listës së PDK-së, por ende nuk ka një përgjigje nga partia e dytë më e madhe. Ndërsa, AAK për herë të parë nga themelimi i saj nuk do të ketë bartës liste dhe kandidat për kryeministër themeluesin Ramush Haradinaj. Kjo ka ngritur pikëpyetje nëse kjo parti mund të kalojë pragun.
Time Kadrijaj e AAK shprehet: “Kurrë nuk u hoqen percepetimet, as kësaj radhe e as radhës së kaluar, që Aleanca nuk do ta kalojë pragun, po ne e kemi kaluar pragun dhe asnjëherë nuk diskutohet për prag”. KQZ konfirmoi se janë 3 koalicione dhe 22 parti politike që janë paraqitur për të marr pjesë në zgjedhjet e 7 qershorit. Për subjektet të cilat nuk kanë qenë të regjistruara më parë ka dhe disa ditë kohë për të aplikuar për të garuar nëse do të kalojnë filtrat e certifikimit.