Votimi për Gjykatën Speciale? Hashim Thaçi: Themelimi nuk ishte disponim i individit por përgjegjësi

Ish-kryeministri Hashim Thaçi, në intervistën për Rubikon në Klan Kosova ka folur ndër të tjera edhe për themelimin e Gjykatës Speciale. Thaçi që aso kohe ishte zv/kryeministër dhe ministër i Punëve të Jashtme, u shpreh se Kosova ishte përballë dy sfidave, ta themelojë Specialen në koordinim me ShBA-të dhe BE-në ose vendit do t’i imponohej një gjykatë e njëjtë, por me rol aktiv të Rusisë dhe Kinës.

”Kosova ishte përballë dy sfidave: të themelojë këtë gjykatë vet në koordinim me SHBA-të dhe Bashkimin Evropian, ose Kosovës do t`i imponohej një gjykatë e njëjtë, por e themeluar nga Këshilli i Sigurimit të OKB-së, me rol aktiv të Rusisë dhe Kinës, por që do të përkrahej edhe nga SHBA dhe BE”,-u shpreh Thaçi.

Për të Kosova e bëri zgjedhjen e parë, themelimin e Speciales në koordinim me SHBA-të dhe BE-në, zgjedhje të cilën e quajti shumë sfiduese por më e përgjegjshme.

”Kosova bëri zgjedhjen e parë që ishte shumë sfiduese, por më e përgjegjshme. Me garancë nga partnerët amerikanë dhe evropianë se do të punohet me legjislacionin kosovar, pra jo vetëm të merret parasysh, por, nënvizoj, detyrimisht të respektohet”.