Aksidenti fatal në Durrës, gjykata lë në burg taksistin 26-vjeçar

Gjykata e Durrësit ka caktuar masën e sigurisë “Arrest në burg” për 26-vjeçarin Talelli, i dyshuar si drejtuesi i automjetit që u përfshi në aksidentin tragjik në plazhin e Durrësit, ku humbi jetën 66-vjeçari F.D.

Vendimi është marrë një ditë më parë, ndërsa gjykata ka vlerësuar të ligjshëm edhe arrestimin e 26-vjeçarit në flagrancë.

Sipas hetimeve paraprake, 26-vjeçari, i cili punonte si taksist, dyshohet se ka shkaktuar aksidentin si pasojë e pakujdesisë. Automjeti përfundoi në trotuar, duke përplasur 66-vjeçarin, i cili në atë moment po ecte në këmbë.

Talelli po hetohet për veprën penale “Shkelja e rregullave të qarkullimit rrugor”, të parashikuar nga neni 290/3 i Kodit Penal.

Pas vendimit të gjykatës, 26-vjeçari do të qëndrojë në paraburgim deri në vijimin e hetimeve, ndërsa autoritetet po punojnë për të përcaktuar të gjitha rrethanat dhe shkaqet e aksidentit.

Sipas parashikimeve të Kodit Penal, kur shkelja e rregullave të qarkullimit rrugor sjell si pasojë vdekjen e një personi, vepra dënohet me dy deri në dhjetë vjet burgim.