Një ngjarje e rëndë ka tronditur Tiranën këtë 19 shtator. Një 58-vjeçare, Lumturi Palushi, është vrarë me thikë nga bashkëshorti i saj, në një kompleks pallatesh pranë zonës së Zogut të Zi.
Autori i dyshuar, H.P., është shoqëruar nga policia dhe gjatë marrjes në pyetje ka treguar versionin e tij për ngjarjen. Sipas deklarimeve të tij, mes çiftit kishte pasur konflikte të vazhdueshme, të lidhura me faktin se gruaja qëndronte në banesën e vajzës dhe jo në shtëpinë e tyre në Don Bosko.
Sipas dëshmisë së dhënë para uniformave blu, autori ka deklaruar se gjatë paradites e kishte telefonuar bashkëshorten dhe ajo i kishte thënë se ndodhej në një qendër tregtare. Ai pretendon se më pas shkoi në banesën e vajzës, ku e gjeti bashkëshorten.
Situata dyshohet se është përshkallëzuar në një debat, gjatë të cilit ai e ka goditur me thikë në zonën e kraharorit.
Ngjarja ka ndodhur në prani të familjarëve, duke shkaktuar tronditje te banorët e zonës.
Policia ka nisur hetimet për zbardhjen e plotë të rrethanave të krimit, ndërsa materialet procedurale i janë referuar Prokurorisë për veprime të mëtejshme.