Kapet një 30-vjeçar i armatosur në Lezhë, po udhëtonte me taksi

Një i ri është arrestuar nga Policia e Lezhës, pasi po udhëtonte i armatosur me armë zjarri pistoletë.

Në kuadër të operacionit të koduar “Tranziti” është vënë në pranga shtetasi Gledis Ustabeqiri, 30 vjeç, banues në Shkodër, i cili akuzohet për veprën penale “Mbajtja pa leje dhe prodhimi i armëve, armëve shpërthyese dhe i municionit”.

“Gjatë operacionit, në aksin rrugor Lezhë–Shkodër, pranë rrethit të Shëngjinit, shërbimet e Policisë ndaluan për kontroll automjetin taksi, në të cilin dyshohej se udhëtonte si pasagjer një shtetas i armatosur. Gjatë kontrollit fizik të pasagjerit, shtetasit Gledis Ustabeqiri, iu gjet dhe iu sekuestrua një armë zjarri pistoletë, me dy krehra dhe municion luftarak.” – thuhet në njoftimin e Policisë.

Raportohet se arma e zjarrit e sekuestruar do të dërgohet në Institutin e Policisë Shkencore, për të verifikuar nëse është përdorur në ndonjë ngjarje kriminale të ndodhur më parë.

Materialet procedurale i janë referuar Prokurorisë së Lezhës për veprime të mëtejshme.