𝗧𝗲 𝗕𝘂𝗷𝘁𝗶𝗻𝗮𝘁 𝗲 𝗡𝗶𝗸𝗮𝗷-𝗠𝗲̈𝗿𝘁𝘂𝗿𝗶𝘁

Në zemër të Alpeve Shqiptare, në Curraj të Poshtëm, u zhvillua një takim i veçantë mes pronarëve të bujtinave, një brezi të ri udhërrëfyesish malorë nga Lekbibaj, përfaqësuesish të agjencive turistike dhe banorëve të zonës. Qëllimi i takimit ishte bashkëbisedimi për rritjen e cilësisë së ofertës turistike dhe zhvillimin e qëndrueshëm të zonës.

Në fokus të diskutimeve ishte certifikimi i produkteve lokale, me synim përzgjedhjen e produkteve më përfaqësuese si fasulja e varur dhe mishi i thatë, për t’u promovuar si marka të zonës dhe për të garantuar cilësi dhe identitet kulinar.

Gjithashtu, u prezantua programi i trajnimit profesional për udhërrëfyesit malorë të Lekbibajt, i cili vë theksin te siguria në terren dhe interpretimi kulturor, duke u dhënë të rinjve mundësi për punësim cilësor në industrinë turistike.

Një tjetër pikë e rëndësishme e takimit ishte mikpritja dhe trajnimi i kapaciteteve vendore, që po realizohen në bashkëpunim me TUI Care Foundation dhe aktorë të tjerë ndërkombëtarë.

Pjesëmarrësit shprehën mirënjohje për mbështetjen e GIZ-it dhe partnerëve të tjerë, të cilët po kontribuojnë në zhvillimin e qëndrueshëm të kësaj zone të mrekullueshme. Së shpejti, pritet të nisin edhe projekte infrastrukturore të mbështetura nga Fondi Shqiptar i Zhvillimit, të cilat do të përmirësojnë aksesin dhe cilësinë e jetës në këtë rajon të Alpeve.