Ilir Meta pas NdihmësSekretarit të Shtetit Amerikan Brownfield takon Lu

Prapë Lu dhe Vllahutin tek Ilir Meta. Kreu i Kuvendit sapo është kthyer nga një vizitë e rëndësishme e tij në Washington ku takoi edhe Ndihmës Sekretarin e Shtetit, Ambasadorin William Brownfield dhe një numër kongresmenësh e senatorësh. Po kështu foli edhe në kongresin amerikan të hebraikëve ose siç thuhet tek lobi më i madh në Kongresin Amerikan, atë çifut.

Ndërsa sot Ambasadorët e SHBA dhe BE zhvilluan një tjetër takim me Kryetarin e Kuvendit dhe të LSI -së, Ilir Metën. Donald Lu e Romana Vlahutin u paraqitën rreth mesditës në zyrën e tij, për të diskutuar sërish për reformën në drejtësi. Takimi vjen dy ditë pasi ambasada e SHBA u kërkoi deputetëve që të votonin individualisht për reforën dhe bëri përgjegjëse opozitën se nuk tregoi fleksibilitet, ndërkohë që qeveria e kishte treguar.

Edhe BE u ka bërë thirrje për votim individual deputetëve. SHBA mbështeti edhe nismën e qeverisë për ta çuar draftin në kuvend dhe tha do të sigurohej që ai të ishte një draft i drejtë që përfaqëson idetë më të mirë të ekspertëve vendas e të huaj dhe të Komisionit të Venecias. Pas këtyre zhvillimeve mazhoranca po bën llogaritë me votat, pasi ajo nuk i arrin e vetme 94 votat që i duhen për të kaluar ndryshimet kushtetuese.

Kryeministri Rama deklaroi një ditë më parë se ai do ta gjendte “ndonjë vëlla” nga opozita për ta votuar reformën. Opozita e ka bërë të qartë se çdo votë e trafikuar nga radhët e saj do ta nxjerrë atë jashtë parlamentit dhe do të djegë mandatet.

Mësohet se numri magjik prej 94 votash janë bërë për votimin e Reformës. Pritet të dalin emrat nga PD, të cilët do të dalin hapur pro SHBA e BE.