A duhet një Pol i Tretë për të sfiduar PS-në dhe PD-në?

A duhet një Pol i Tretë për të sfiduar PS-në dhe PD-në? Po, Shqipëria ka nevojë për një Pol të Tretë Politik. Por jo për një koalicion të improvizuar kryetarësh dhe siglash që bashkohen vetëm përpara zgjedhjeve, ndajnë listat dhe më pas shpërndahen.

Fitorja e mandatit të katërt nga Partia Socialiste dhe pamundësia e Partisë Demokratike për të krijuar një alternativë fituese tregojnë se sistemi politik është bllokuar. PS-ja vazhdon të qeverisë, ndërsa PD-ja vazhdon të mbajë peng pjesën më të madhe të opozitës, megjithëse nuk arrin ta çojë atë drejt pushtetit.

Në këto kushte, krijimi i një Poli të Tretë, ku të bashkohen “Shqipëria e Re” dhe të gjitha partitë e tjera opozitare, mund të jetë një zgjidhje e domosdoshme. Por ky pol duhet të jetë i hapur edhe për intelektualët, sipërmarrësit, të rinjtë, profesionistët, diasporën dhe përfaqësuesit e protestës qytetare.

Ai nuk duhet të jetë as patericë e PS-së dhe as aneks i PD-së. Duhet të dalë me identitetin, programin dhe kandidatët e vet.

Që të jetë i besueshëm, Poli i Tretë duhet të vendosë disa rregulla të qarta: drejtuesit dhe kandidatët të zgjidhen përmes votimit, financimet të jenë transparente dhe programi të përqendrohet te ekonomia, drejtësia, pronësia, lufta kundër korrupsionit, largimi i të rinjve dhe integrimi europian.

Gabimi më i madh do të ishte që secili kryetar partie të kërkonte të ishte udhëheqësi i madh i këtij bashkimi. Nëse Poli i Tretë kthehet në një panair egosh dhe ambiciesh personale, ai do të dështojë përpara se të hyjë në zgjedhje.

Por nëse partitë e reja pranojnë të sakrifikojnë interesat e ngushta dhe të ndërtojnë një front serioz qytetar, atëherë mund të lindë alternativa që vendi kërkon.

Shqiptarët nuk janë të dënuar të zgjedhin përjetësisht vetëm ndërmjet Edi Ramës dhe Sali Berishës. Një Pol i Tretë është i nevojshëm, por ai duhet të ndërtohet tani, në sheshe, në qytete dhe mes qytetarëve – jo natën e fundit kur hartohen listat e kandidatëve.