A është italiani Michele Grillo, shefi i Interforce që po ngatërron Tiranën?

 Politika dhe shteti shqiptar prej disa ditësh janë futur në një sherr të madh. Kush përgjon dhe cili solli pajisjen pa e futur në doganë?

Michele Grillo dyshohet se është personi që futi në Shqipëri pajisjen e përgjimit që përdor policia shqiptar. Ai është shefi i misionit policor italian, Interforce, që vepron në Tiranë. Për herë të parë rreth përfshirjes së mundshme të tij në debatin për pajisjen e përgjimit shkruajti gazeta më e madhe italiane, Corriere Della Sera. Sipas saj, shefi i Interforce ishte personi që përflitej për pajisjen, për shkak të lidhjeve familjare që ai kishte me kompaninë IMSI Catcher që e kishte prodhuar pajisjen. Bashkëshortja e Michele Grillos është punonjëse pranë kompanisë IMCI Catcher. Sipas Corriere Della Sera, drejtuesit e Interforcë janë përfolur për lidhje të forta me politikanë e zyrtarë të lartë shqiptarë që në kohën kur Anna Poggi, ish –punonjëse e këtij misioni, u përfshi në ccështjen e ngritur nga ish –shefi i antidrogës së Fierit, Dritan Zagani, që akuzoi ministrin e Brendshëm, Saimir Tahiri për lidhje me grupet e trafikantëve të drogës që veprojnë në jug të Shqipërisë.

“Kompania dyshohet se ka përdorur kanale mbështetëse për të hyrë në tregun shqiptar: ka kaluar përmes ambasadës italiane dhe në veçanti nga ish –shefi i polices Anna Poggi (misioni policor italian, Interforce që vepron në Shqipëri). Nëse këto janë gënjeshtra, frut i një fushate helmatisëse, apo të verteta, këtë mund ta vendosin vetëm hetimet e ardhshme. Zyrtari i Interforce, në Tiranë, dyshohet se ka “lidhje familjare” me këtë kompani… Kur shpërtheu rasti i Dritan Zaganit, Anna Poggi u lëviz në mënyrë të çuditshme nga Ministria e Brendshme italiane. Historia e saj ngre disa pikëpyetje: nëse e dinte dhe çfarë dinte për Zaganin, cilat ishin raportet e saj me Tiranën, çfarë e mban “të lidhur” me politikanë shqiptarë të rangut të lartë dhe disa zyrtarë”, shkruante Corriere Della Sera pak ditë më parë.