Aleati i PS, Milo: Dështuam të bëjmë shtet. Jemi njëlloj si me Berishën

Kryetari i Partisë Demokracia Sociale dhe aleati i Partisë Socialiste, Paskal Milo nuk i fsheh më rezervat ndaj Kryemnistrit Edi Rama dhe qeverisjes. Gjatë mbledhjes me strukturat e PDS, Milo tha sot modeli shqiptar i ndërtimit të shtetit, ka dështuar.

Situata është si në kohën e “qeverisjes Berisha”, tha Milo, i cili shtoi se, në seancat parlamentare të së enjtes ka vetëm papërgjegjshmëri dhe pandershmëri.

“U lejuan kastat e degjeneruara politike e bandat mafioze… Duhet revolucion, por jo i dhunshëm si ai që kërkon Berisha…” deklaroi Milo. Kreu i PSD-së u ndal edhe te zhvillimet e fundit të reformës në drejtësi.

Ai tha se shqiptarët janë ndihmuar nga të huajt, por dhe janë shfrytëzuar prej tyre. Ndërhyrja dhe presioni i SHBA-ve dhe BE-së është turp për politikën shqiptare, tha Milo, që sipas tij, tregon cënim të sovranitetit të vendit. “Por për këtë nuk janë fajtore Lu e Vlahutin, por Kuvendi e kryesisht PD”, shtoi ai.

Paskal Milo, kreu i Partisë Demokracia Sociale dhe ish ministër i  Jashtëm, thotë se Shqipëria është shtet sovran dhe anëtar i NATO-s. Ai deklaroi se misionet diplomatike nuk mund ta identifikojnë Shqipërinë me këtë katundari politike.

“Misionet diplomatike të SHBA dhe BE në Tiranë kanë arsye të jenë të lodhur, të zhgënjyer e të zemëruar me klasën politike shqiptare dhe me disa pseudo deputet. Ata nuk e identifikojnë Shqipërinë dhe shqiptarët me këtë katundari politike e parlamentare. Ndaj edhe i bëj thirrje ambasadorit mik amerikan, që për hir të kokëfortësisë së Berishës apo të skifterëve të tjerë të politikës shqiptare, krahët e të cilëve duhet të ishin prerë me kohë, të mos kapërcejë vijën e kuqe të statusit të tij diplomatik, sepse Shqipëria mirë apo keq, ka qënë dhe mbetet një vend i pavarur, anëtar i NATO-s, sovraniteti i të cilit duhet reskpektuar në të gjitha rrethanat. Unë e kuptoj simbolikën e mesazheve të tij dhe në përdorimin e gjuhes së pazakontë diplomatike, sepse siç thuhet në Shqiperi “kështu i do mushka drutë”, por nëse mërzitet nga intrigat bizantine të politikes shqiptare, shpenzimet nuk duhet t’i paguajnë të gjithë shqiptarët. Shqipëria është mbi partitë politike”, tha Milo.