Arta Dade, letër Ruçit: Kongresi të caktojë datën për zgjedhjen e Kryetarit
Deputetja e Partisë Socialiste, Arta Dade i ka dërguar një letër kreut të grupit parlamentar të Partisë Socialiste, ku i kërkon përcaktimin e datës për zgjedhjen e kreut të partisë. Ajo shprehet se “në kongresi duhet të përcaktohet data për zhvillimin e zgjedhjeve”, si dhe të lërë një muaj kohë për zhvillimin e garës.
LETRA E PLOTE
Drejtuar: Z. Gramoz RUÇI
Kryetar i Asamblesë Kombëtare të PS
Tiranë, më 9 shkurt 2016
I nderuar kryetar
Në vendimin Nr.5 datë 18/07/2015 të Asamblesë Kombëtare të Partisë Socialiste, pika 2, është përcaktuar krijimi i Grupit të Punës për ndryshime e përmirësime në Statutin e PS, i cili harton projektin përkatës pas një procesi të gjerë diskutimesh. Në po këtë pikë është përcaktuar që diskutimi i projektit me ndryshime dhe miratimi paraprak të zhvillohen në Asamblenë Kombëtare para Kongresit Zgjedhor dhe projekti të miratohet në Kongresin Zgjedhor.
Ju drejtojmë kërkesën që në mbledhjen e Asamblesë Kombëtare, e cila do të zhvillohet para Kongresit Zgjedhor të Partisë sipas vendimit të sipërcituar, të miratohen dhe shtesat vijuese në rendin e ditës të këtij Kongresi, të përcaktuar me vendimin nr.7, datë 18/07/2015 të Asamblesë Kombëtare:
- Përcaktimi i datës së zhvillimit të votimit nga anëtarësia e partisë në shkallë vendi për zgjedhjen e kryetarit të PS, sipas parimit një anëtar një votë.
- Paraqitja e platformës nga kandidatët për kryetar të PS.
Ju kërkojmë gjithashtu të jemi të njohur disa ditë para mbledhjes së kësaj Asambleje Kombëtare, me projektin e propozuar nga Grupi i Punës për ndryshime, me qëllim maksimizimin e kontributeve që dëshirojmë të japim për demokratizmin e jetës së brendshme dhe të funksionimit të PS.
Arta Dade
