Berisha: PD dhe unë kurrë nuk e kemi persekutuar opozitën!

Nga Daniel Muçaku-

Lideri opozitar dhe kryetari i PD-së, Sali Berisha, tha mbrëmë se kur ishim ne si PD në pushtet nuk e kemi persekutuar opozitën, pra PS-në.

Dakort Doktor, për vitet 2005-2013, por ishte PD dhe pushteti juaj që arrestoi liderin e opozitës socialiste, Fatos Nano në vitet 1993-1997!

Bile dajaku i pushtetit demokrat ishte kundër opozitës dhe medias ndër ato vite, i tmerrshëm. Mjafton të kujtosh rrahjen e opozitarëve në sheshin “Skenderbej” me 26 maj 1996 apo djegien e redaksisë me të madhe shqipgtare, KOHA JONE.

Ndërkohë po botojmë pjesë nga fjala e kreut të PD-së, Sali Berisha mbajtur mbrëmë:

Të dashur miq, ne kishim një opozitë armike të votës së lirë. Ne kishim një opozitë, armike të integrimit.

Një opozitë që bënte gjithçka, që u fryu bilbilave tre muaj në mënyrë që Shqipëria të mos firmoste MSA.

Një opozitë që çonte emisarët në katër anët për të bllokuar Shqipërinë në NATO, anëtarësimin e Shqipërisë.

Që protestonte me portretet e Enver Hoxhës kundër anëtarësimit.

Një opozitë që bllokoi rekomandimin e KE për statusin e kandidatit.

Megjithatë ajo opozitë kurrë nuk iu mohuan të drejtat kushtetuese.

Ajo opozitë nuk u persekutua kurrë.

Sepse për ne, vendi pa opozitë është natë e zezë pa hënë, shkatërrimtar për një komb dhe një vend.

Miqtë e mi, sot ne kremtojmë apo nderojmë 22 Marsin.

Ju rikujtoj shqiptarëve se me 22 mars, në zgjedhjet e para të lira, votuan 1 milion e 710 mijë shqiptarë.

Kurse sot me regjistrimin e fundit nga diktatura e Edi Ramës, dalin se Shqipëria ka gjithsej 1 milionë e 420 mijë shqiptarë.

Rënia në këto 10 vite ishte katastrofale për Shqipërinë.

U përmbysën të gjitha perspektivat dhe arritjet.

Mos harroni se në vitet 2005-2013, Shqipëria u bë protagoniste e projekteve të shekullit.

Projektet ndër më të mëdhatë të Europës, do bëheshin edhe projekte shqiptare si TAP-i.

Kompanitë më të mëdha të botës do ndërtonin Kaskadën e Devollit dhe hidrocentrale të tjera.

Shqiptarë, shtroni pyetjen vetes, cili investitor dhe cili investim madhor ka ndodhur gjatë këtyre 10 viteve?

Asnjë! Ndërkohë, janë larguar investitorë që kishin planifikuar të investonin miliarda euro në turizmin dhe fusha të tjera të Shqipërisë”- tha ish-kryeministri Berisha.