Për të gjithë ata që nuk e njohin mirë lëvizjen “5 Yjet” e Italisë apo e kanë harruar po ua përshkruajmë se ç’ndodhi në zgjedhjet e fundit vendore në shtetin fqinjë. Edhe për ata politikanë shqiptarë që nuk duan të prishin qetësinë e tyre shumëvjeçare të mbajtjes së pushtetit ia vlen të shkruajmë me shumë për Beppe Grillon.

Lëvizja “5 Yjet” e Beppe Grillos ka arritur një fitore befasuese në zgjedhjet lokale të para dy ditëve në Itali. Kandidatët e saj kanë fituar dy qytetet kryesore, Romën dhe Torinon. Ndërkohë, në rang Republike “5 Yjet” kanë fituar 19 nga 20 komunat kryesore ku nxori kandidatë.

Me këtë fitore  Lëvizja “5 Yjet” kthehet në një nga forcat kryesore që do të kandidojë në zgjedhjet e përgjithshme në vitin 2018.  Kjo rritje e kuotave elektorale të një partie politike që nisi rrugëtimin disa vite më parë shihet si një sukses i forcave të reja që janë kundër partive tradicionale.

Beppe Grillo, një ish-komedian që u angazhua në politikë kundër sistemi aktual të së majtës dhe të djathtës në Itali, duket se me fitoren historike të një force të re politike do jetë surprizë edhe në zgjedhje e ardhshme parlamentare.

“Në fillim na thanë “është e pamundur” që t’ja dilni. Sot suksesi është i garantuar. Do fitojmë qeverinë në zgjedhjet e ardhme”, tha Grillo në një deklaratë për mediat.

Fitorja e “5 Yjeve” shihet si një goditje politike ndaj reformave të kryeministrit Italian, Mateo Renzi. Por edhe partive të djathta të traditës, të cilat e kanë lodhur popullin me premtime e mashtrime të disa dekadave.  Beppe Grillo e nisi karrierën politike fillimisht si aktivist i shoqërisë civile. Vetëm me një faqe interneti deri në vitin 2008 ai u bë zëri i italianëve të pakënaqur nga politika e partive kryesore italiane. Në vitin 2009 shpalli lëvizjen politike “5 Yjeve” të cilësuar si “anti-sistem” duke mbledhur rreth vetes intelektualë dhe figura të pakonsumura në politikën italiane.

“5 Yjet” ka aktualisht 91 deputetë në Parlamentin italian dhe 35 senatorë.

 Kjo është “dallga” italiane e cila po vjen drejt Shqipërisë si fenomen, por edhe si politikë qeverisëse e re. Në Shqipëri ka dekada që PD dhe PS bëjnë ligjin. Ndërrojnë vendet çdo 4 apo 8 vjet dhe vazhdon i njëjti cikël. Dy partitë e mëdha tradicionale të cilat kanë shkaktuar trauma të mëdha vendit akoma sot diktojnë. Natyrisht që kanë  edhe kontribute. Por në thelb nuk duan ritëm europian të zhvillimit të ekonomisë dhe të shoqërisë, nuk duan oponencën civile, duan një media të lidhur me pronarë  që syrin e mbajnë tek lejet e ndërtimit, tek privatizimet, tek pisllëqet. Pranojnë rotacion pushteti , por pa prekur pasuritë e kupolës. Ndaj  fryma e fitores së fundit të “5 Yjeve” në Itali pavarësisht politikës zyrtare të PS dhe PD të cilat nuk duan kurrsesi forca të reja, frymë të re dhe hov të ri, po rritet brenda shoqërisë shqiptare si një frymë antiklasë e vjetër politike, pra fryma Grillo po zë  vend në trupin e Shqipërisë  .

Të fitojë një 38 vjeçare komunën e Romës e cila është një kryeqendër e kulturës botërore apo e Torinës industriale ishte e paparashikuar nga politika italiane. Bile edhe ajo europiane e Brukselit nuk parashikoi se qytetarët janë velur me partitë e traditës. Por ndodhi ndryshimi. Është fakt dhe kjo tregon se shoqëria po evoluon shumë, ka hap me të shpejtë se dy partitë e kampeve kundërshtare.

Po vjen një revolucion “Beppe Grillo” edhe në Shqipëri.Ndaj janë egërsuar dhe po luajnë çdo gur dy partitë e vjetra shqiptare PD dhe PS që të mos rriten partitë e tjera apo ato që mund të krijohen në shtator.  Nuk është çudi që në zgjedhjet e ardhshme parlamentare të kemi kryeministër tjetër, pra jo të PS dhe jo të PD-së. Shoqëria shqiptare po zien.

“Dallga” italiane po vjen. Sa kaloi bregdetin italian dhe po turret në Adriatik drejt bregdetit shqiptar. I duhet një vit që të hyjë në Tiranë si “dallgë”!

Spiten Prulli

Njihuni me Virginian, e para femër që zgjidhet në krye të Bashkisë Romë

Ka përfunduar në Itali raundi i dytë i zgjedhjeve vendore. Të dielën më 19 qershor, italianët kanë votuar në 126 komuna ku në raundin e parë të votimeve më datë 5 qershor kandidatët për kryetar bashkie nuk kanë mundur të fitojnë mbi 50% të votave.

Lëvizja 5 Yje e liderit Beppe Grillo ka mundur të triumfojë në dy qytete kryesore italiane; në Romë e Torino, si dhe në 19 komuna ndër 20 në të cilat kjo forcë politike ishte në balotazh me rivalët e tjerë politik.

Për herë të parë në historinë e kryeqytetit italian, një grua është zgjedhur në krye të Bashkisë së Romës.

Ajo është Virginia Raggi e Lëvizjes 5 yje e cila ka mundur të fitojë me rreth 68% të votave kundër kandidatit të Partisë Demokratike Roberto Giachetti.

38-vjeçarja Virginia Raggi me profesionin avokate prej vitit 2013 ka qënë këshilltare komunale në Bashkinë e Romës.

“Sot kanë fituar qytetarët e Romës, kanë fituar romanët, u shpreh” Virginia Raggi, menjëherë pas publikimit të rezultateve të votimeve.

“E para gjë që ndjej të them është se më në fund dhe Roma do të ketë një kryetare Bashkie grua. Është një moment historik me një vlerë të jashtëzakonshme. Jam gati të qeveris e tashmë nis një erë e re”.

Gjithashtu një tjetër kandidate femër e Lëvizjes 5 Yje, Chiara Appendino, është zgjedhur kryetare Bashkie e një qyteti të rëndësishëm italian, Torino.

Ajo ka fituar ndaj kandidatit të Partisë Demokratike Piero Fassino, deri më sot kryetar i Bashkisë së këtij qyteti.

Rezultat pozitiv ka arritur në këto zgjedhje dhe qendra e djathtë italiane e cila ka mundur të fitojë në 10 komunat; Trieste, Kosenza, Isernia, Krotone, Pordenone, Novara, Grosseto, Savona,Olbia, Benevento.