Edi Rama shkruan miqve dhe “armiqve”

Kritikëve u them faleminderit, sepse cimbisjet tuaja janë për mua ushqim për mendjen, shumë më tepër se sa ju mund ta imagjinoni. Dhe as mos e mendoni, as mos i dëgjoni ata që ju thonë, Edi Rama nuk i dëgjon kritikat. Aq i dëgjoj saaa… Tjetër gjë që me kritiket nuk jepem po “grushtohem” deri në fund, ama pas përplasjes nuk iki tutje pa marrë atë që mendja me thote se vlen.

“Armiqve” të betuar nuk u them faleminderit që më shajnë me libër shtëpie e libër rruge, natyrisht! Po ama ju them faleminderit, sepse më bëni të mendoj vazhdimisht se sa shumë, o Zot sa shumë, mundim e kohë duhet për të ngushtuar hendekun që politika e përçarjes dhe gjuha e urrejtjes mes paleve, ka hapur prej kaq shumë vitesh mes njerëzve të zakonshëm, edhe të rinjve fare! Dhe dua ta dini të dashur “armiq”, se kur ju kthehem siç i do mushka drutë, nuk ju bëj me faj ju, po pikërisht politiken, që për kaq shumë vite e vite, kultivoi një farë shumë të keqe në mjedisin e komunikimit publik.

Në fund dua t’ju them të gjithëve se fitorja e madhe e 25 qershorit, është e Shqipërisë dhe juaja, ndërsa imja është vetëm barra e shumëfishuar e përgjegjësisë. Kam shumë besim se do të bëjmë shumë për këtë vend, sidomos nëse të gjithë kujtohemi kur zihemi a “grushtohemi”, se sidoqoftë kemi një gjë të madhe të përbashkët: Jemi shqiptarë.

Jemi të një gjaku dhe një gjuhe. Jemi të gjithë të dëshiruar, ta shohim Shqipërinë sa më mirë.

Faleminderit edhe njëherë dhe ndjesë kujtdo prej jush që mund ta kem bërë të ndjehet keq nga replikat e mia.

Përqafime

Edi

Shënim i redaksisë: Zoti Kryeministër shkruaj mirë shqip, pasi keni gabime të shumta, kur shkruani! Me gjithë atë staf që keni, të paktën, ti redakojnë dhe korrektojnë shkrimet. Këtë radhë ta korigjuam ne si redaksi.