Erion Braçe: “Jo qese e zezë me lekë surratit futbollistëve të “Dinamos”!”. Video po bën namin në rrjetet sociale

Nga Erion Braçe-

FJALA IME

SHIHENI VIDEON:

KJO ËSHTË TË LËSH NAM NGA SHQIPËRIA NË ARGJENTINË E KTHIM – ME PARA NË QESE TË ZEZA NË DORË!

DIARIO OLÉ ËSHTË MEDIA NË ARGJENTINË DHE PO XHIRON NË GJITHË BOTËN KËTO PAMJE SHQIPTARE!

Dëgjoni:

Unë kam qenë për shumë gjatë kundër një ligji për SPONSORIZIMIN, me fokus sportin dhe posaçërisht futbollin.

Nisur nga realiteti i parave në qese të zeza që qarkullojnë në sport, posaçërisht në futboll.

Këto pamje më provojnë që kam pasur të drejtë, por edhe që ministrat e Financave që kanë kundërshtuar kishin të drejtë.

Për shkak se jam tifoz futbolli – e dinë të gjithë këtë – duke parë nga afër vështirësitë financiare të klubeve të futbollit, të cilat shkojnë drejt rrënimit, jo drejt zhvillimit, duke parë që sukseset e ekipit kombëtar nuk po e ndihmojnë futbollin në çdo nivel, VJET NË NËNTOR PROPOZOVA NJË LIGJ PËR SPONSORIZIMIN E SPORTIT!

Ndryshova qëndrim, poooooo! Ministri i Financave jo!

Pas këtyre pamjeve, realisht nuk di ai t’i mbushë mendjen ministrit të Financave për ta pranuar atë ligj.

Thelbi i tij është që një pjesë nga fitimet e çdo kompanie t’i shkojnë sportit, POR NË RRUGË TË LIGJSHME E NË BILANCE TRANSPARENTE E TË PASTRA TË SPORTIT;

JO NË QESE TË ZEZA E DUKE UA HEDHUR SURRATIT LOJTARËVE, MU SI ATA TË DEHURIT NËPËR DASMA APO AMBIENTE TALLAVAJE!

NUK NDODH KËRKUND TJETËR KJO!

Sinqerisht, unë nuk e di ç’bën në jetën tjetër presidenti i DINAMOS, pra përtej futbollit, nuk më intereson fare; por shpresoj të mos merret me ekonomi, ndryshe do t’i vendosë në vështirësi të madhe organet ligjzbatuese në fushën fiskale.

Në fund, kam një pyetje për FSHF-në:

FUNKSIONON TEK JU, SI INSTITUCION QË ORGANIZON GARAT NË FUTBOLL, UEFA FINANCIAL FAIR PLAY?!

Ky me qese të zeza nuk është i tillë, as për garat kombëtare e as për garat ndërkombëtare, siç është kjo e UEFA-s në video./Erion Braçe/

(kliko video)

Pamjet e presidentit të Dinamos duke shpërndarë para cash nga qese të zeza nuk janë më vetëm një episod i shëmtuar i futbollit shqiptar. Ato po qarkullojnë jashtë vendit dhe po kthehen në një simbol të informalitetit që prej vitesh e ndjek sportin tonë.

Këtu nuk është çështja vetëm se si duket skena.

Çështja është shumë më serioze: nga vijnë paratë, si janë deklaruar, si janë pasqyruar në bilanc dhe si janë shpërndarë ligjërisht?

Futbolli shqiptar prej vitesh kërkon një ligj më të favorshëm për sponsorizimet. Edhe kjo kërkesë ka logjikën e saj. Klubet kanë nevojë për para, investime, akademi, infrastrukturë dhe paga më të mira.

Por nuk mund t’i kërkosh shtetit favore fiskale dhe nga ana tjetër të krijosh pamjen e një sporti ku paratë qarkullojnë me qese.

Sponsorizimi nuk është qese e zezë. Është kontratë, bankë, bilanc, tatim dhe transparencë.

Pikërisht këtu duhet të reagojë edhe FSHF-ja.

Federata nuk mund të mjaftohet vetëm me organizimin e ndeshjeve dhe kampionateve. Duhet të garantojë standarde financiare, licencim serioz dhe kontroll mbi mënyrën se si klubet administrojnë paratë.

Nëse futbolli shqiptar kërkon të jetë europian në fushë, duhet të jetë europian edhe në financa.

Nëse gjithçka në këtë rast është e ligjshme dhe e deklaruar, atëherë duhet të sqarohet publikisht.

Nëse jo, duhet të flasin organet fiskale dhe institucionet sportive.

Sepse këto pamje i bëjnë dëm jo vetëm një klubi.

I bëjnë dëm gjithë futbollit shqiptar dhe imazhit të Shqipërisë.

Dhe në fund mbetet pyetja më e thjeshtë:

Nëse kërkojmë ligj sponsorizimi për të futur më shumë para në sport, a jemi gati të kërkojmë po aq fort që çdo qindarkë të jetë e deklaruar, e kontrolluar dhe e pastër?

Sepse pa këtë kusht, sponsorizimi nuk e shpëton futbollin.

Vetëm e financon informalitetin.