Gjermania godet qeverinë “Rama”: S’ka plotësuar asnjë kusht për negociatat

Deputetët e koalicionit qeverisës në gjermani, CDU/CSU shprehin kritika të hapura për qeverinë “Rama”. Në një deklaratë të përbashkët, përfaqësues të grupit më të rëndësishëm politik në Gjermani thonë se votimet e 30 qershorit kanë qenë të vjedhura dhe votat janë blerë në masë.

Ky qëndrimi i deputetëve gjermanë nënkupton se Berlini zyrtar është tepër skeptik për hapjen e negociatave me Shqipërinë. Në një prononcim të disa zyrtarëve të lartë të Bundestagut gjerman dhe të grupimit të CDU/CSU-së për gazetën “Shekulli”, ata flasin njëzëri për një qëndrim negativ ndaj Shqipërisë.

Deputetët e Bundestagut thonë se Shqipëria nuk ka plotësuar asnjë kriter për çeljen e negociatave.

Prononcimi i zyrtarëve të Bundestagut dhe grupimit të CDU/CSU

“Këto ditë jemi mbledhur me grupin parlamentar të CDU/CSU në një diskutim të vështirë me dyer të mbyllura, në lidhje me pozicionin tonë nëse do të duhet të japim dritën jeshile për fillimin e negociatave me Shqipërinë apo jo. Java që vjen do të jetë përcaktuese. Shqipëria nuk ka përmbushur deri tani asnjë nga kushtet për hapjen e negociatave, të përmendura nga Këshilli i Ministrave i Bashkimit Evropian, në qershor 2018, veçanërisht paragrafi 54, përveç fazës së parë të procesit të Vettingut. Sistemi i drejtësisë nuk po funksionon, as Gjykata Kushtetuese, as Gjykata e Lartë, as Prokuroria e re e Përgjithshme, as SPAK-u, as BKH-ja. Nuk ka asnjë dënim përfundimtar të zyrtarëve të lartë të përfshirë në krimin e organizuar apo në fushën e luftës kundër korrupsionit, (peshqit e mëdhenj si Tahiri janë shumë të rëndësishëm, nuk janë të vegjël në këtë rast). Nuk keni asnjë ligj të ri elektoral! Trafiku i drogës është rritur. Më pas vijmë tek problemi më i madh që ka të bëjë me blerjen e votës dhe votimet e 30 Qershorit. Kjo është arsyeja pse shumë njërëz këtu në Berlin thonë që Shqipëria duhet të presë deri sa të përmbushë të gjitha kriteret dhe detyrimet për hapjen e negociatave. Por ne do të shikojmë nëse do të ketë ndonjë zhvillim për negociatat, mund të japim një dritë jeshile në përgjithësi, por jo që të fillojmë negociatat”.