Heqja e kabllove-merimangë në pallate, Benet Beci një shembull që duhet ndjekur nga Bashkitë e Republikës

Nga Jonida Halili-

Nëse qeveria dhe bashkitë kanë investuar në infrastrukturë, kudo nëpër Republikë, nëse qytetet po bëhen të jetueshme, një gjë ka mbetur e pazgjidhur: kabllot e internetit dhe energjisë elektrike që janë kthyer si rrjeta merimangash në çdo pallat.

Por kjo gjë kërkon veprim dhe vendosmeri për ti hequr dhe që kompanitë e internetit e OSHEE ti rregullojnë sipas standartit dhe në menyrë të kulturuar. Kompanitë e internetit nëpër çdo rreth fitojnë miliona nga tarifat që iu vendosin qytetarëve, por nuk harxhojnë lekë për ti shtruar në menyrë korrekte. Çdo qytetar e shikon te pallati i tij se si kabllot varen majë një copë hekuri dhe nuk merret vesh se si janë ngatërruar telat e panumërt me njeri tjetrin.

Kjo praktikë duhet të marrë fund në çdo qytet. Nuk ka nevojë kryeministri t’iu thotë kryebashkiakëve, por të marrin shembull nga Benet Beci në Shkodër. Ai e filloi heqjen e kabllove me forcën e policisë bashkiake dhe ndonëse pati në fillim hamendje se nuk do të bëhet gjë, tani e shikojnë se Beci e vuri në zbatim.

Sot Benet Beci ka postuar një status: “Prej 10 ditësh po punojmë për pastrimin e të gjithë kabllove të internetit në pallatet e restauruara nga zona e Parrucës deri në fund të Xhabijeve. E koordinuar me të gjithë investimet e reja për përmirësimin e cilësisë së jetës së qytetarëve, kjo nismë do të shtrihet në të gjithë qytetin.

Dua të falenderoj për mbështetjen disa nga kompanitë e internetit, OSHEE dhe vetë  komunitetin e banorëve. Padyshim edhe punëtorët e palodhur të Ndërmarrjes së Shërbimeve të Punëve Publike të Bashkia Shkodër .

Nga ana tjeter,  dua t’u siguroj se nuk do të ketë asnjë tolerim në ndërhyrjet e reja që kompanitë do të duan të bëjmë në vijim”- shkruan Beci.

Një shembull që duhet ndjekur nga të gjithë kryebashkiakët e vendit.