Ilir Meta flet, në një intervistë, shumë fort dhe egër kundër Ramës

Kryesore E Mërkurë, 26 Maj 2021 13:45

Kreu i Kuvendit, Ilir Meta ka komentuar situatën politike dhe marrëveshjen mes PS dhe PD. Në një intervistë dhënë gazetarit Roland Qafoku në “Channel One”, Meta është shprehur Rama dhe Basha bënë marrëveshje për të zgjidhur hallet e tyre dhe jo për të kontribuar për standardet më të larta dhe më të ndershme të zgjedhjeve për qytetarët shqiptarë.

Meta, sot mbushen 1 muaj e 9 ditë që jeni zgjedhur President i Republikës. Si ka ndryshuar jeta juaj? Si ka qenë jeta juaj në këto 1 muaj e 9 ditë?

Jeta ime nuk ka ndryshuar aspak, për arsye se unë jam thjesht i zgjedhur për të qenë President i ardhshëm i Shqipërisë, për shkak të procedurave që qëlluan në këtë vit përpara zgjedhjeve të përgjithshme. Ishte një moment i rrallë nga aspekti i procedurave kushtetuese. Kështu që unë kam qenë ai që kam qenë gjithmonë edhe gjatë këtij muaji. Nuk e di se çfarë do të ndryshojë pas datës 24 korrik, por natyrisht do të bëj gjithçka që të respektoj përgjegjësitë dhe statusin e Presidentit në datën 24 korrik dhe në të ardhmen.

Ju nuk e keni nisur akoma detyrën e Presidentit, por politika ju cilëson si president dhe keni shumë akuza, apo kritika për detyrën e presidentit. Një nga këto kritika ka qenë, jo vetëm nga Kryeministri Rama, i cili ka thënë: “Për shkak të boshllëkut të ligjit, unë nuk do ta bëj atë, por z. Meta e bën që merr pjesë në fushatë”. Më i egër akoma ka qenë dhe kandidati për deputet i PD-së në Shkodër, Romeo Gurakuqi, një profesor, i cili ka kërkuar shkarkimin tuaj, sepse keni shkelur ligjin dhe Kushtetutën…

Unë e kuptoj hallin e të dy zotërinjve që ju sapo përmendët. Z. Rama natyrisht që nuk është personi më i duhur për të dhënë rekomandime rreth sjelljes institucionale, pasi ka 4 vjet që si Kryeministër nuk duhet të bënte shumë e shumë gjëra. Pastaj nuk ia vlen të merrem me kandidatët e Henri Çilit në listën e Partisë Demokratike.

Ai është profesor, z. Meta….

E di, e di. Për arsye, sepse jo vetëm që nuk e kanë haberin e Kushtetutës, por edhe kuptohet se janë të shqetësuar për mesazhet e mia, të cilat mendoj se kanë qenë në përputhje me vetë dinamikën e ngjarjeve. Dhe të mos harrojmë që edhe si President i ardhshëm askush të mos presë nga Ilir Meta, se Ilir Meta do të jetë një President që do të qëndrojë në Presidencë. Do të bëjë me përgjegjësi maksimale detyrat e tij, por në fund fare padyshim që do të thotë gjithmonë fjalën e tij në interes të të gjithë shqiptarëve, në radhë të parë, edhe në interes të demokracisë.

Meta, ju merrni detyrën në datën 24 korrik, por në këtë periudhë dhe më vonë, që duhet të kalojnë 5 vjet, nuk do të jeni pjesë e strukturave të LSI-së. Si mendoni ju, si është LSI-ja pa Ilir Metën kryetar?

LSI-ja pa dyshim që do të vazhdojë procesin e vet dinamik, të pashmangshëm, një rritje eksponenciale, e cila tashmë ka ndodhur dhe do të vijojë, për arsye se LSI-ja ndryshe nga 2 forcat e tjera politike, që merren shumë me LSI-në çuditërisht, pa dyshim që ka një dallim të madh, sepse është partia më e strukturuar, edhe pse është një parti e re.

Nuk është një parti e trashëguar as nga e kaluara. Në fakt po t’i shikosh me vëmendje të dyja këto parti janë parti të trashëguara nga e kaluara, të trashëguara nga periudha e regjimit komunist. Partia Socialiste si një parti, e cila ishte vazhduese e Partisë së Punës dhe Partia Demokratike e cila u krijua si një reaksion ndaj pasojave të drejtimit të Partisë së Punës. Natyrisht duke qenë dy parti të tilla me struktura të trashëguara, apo të gatshme pa u lodhur, duke i pasur këto struktura, natyrisht shohin me shqetësim dhe me çudi se si një parti e re mund të krijohet dhe jo vetëm të konkurrojë me ato, por edhe të pretendojë të jetë forcë e parë dhe fituese e zgjedhjeve që po vijnë. Kështu që në këto kushte mund të them se suksesi i LSI-së ka qenë se ka marrë traditën më të mirë në Partinë Socialiste, ku unë kam qenë në një moshë shumë të re. Pra, frymën e solidaritetit, të kolegjialitetit, të punës në ekip, të respektimit të forumeve dhe sot është partia më e organizuar në të gjithë Shqipërinë, është partia më e hapur, më gjithëpërfshirëse edhe më demokratike. Kjo është baza e fuqisë së saj. Dhe tjetra, investimi kryesor i LSI-së te rinia, që në ditët e para të themelimit të saj, tashmë ka dhënë rezultate spektakolare. Domethënë rinia në mënyrë dërrmuese është me Lëvizjen Socialiste për Integrim dhe kjo është fuqia më e madhe.

Nuk e keni tepruar me këtë? Është e vërtetë kjo që rinia është një…

Nuk është tepruar aspak, përkundrazi, duhet bërë edhe më shumë.

Vijnë në listën e Tiranës katër të rinj dhe pastaj Luan Rama…

Absolutisht, nuk është Luan Rama pas tyre, Luan Rama është në vendin tim. Unë do të isha i pesti, Luani do të ishte i gjashti dhe Luani është shumë krenar për këta të rinj dhe të reja, sepse ne nuk i kemi të rinjtë për dekor, ne besojmë tek të rinjtë. Ata kanë kualitete të jashtëzakonshme, duke filluar që nga Klajda Gjosha, që nga Kejdi Mehmetaj, që ka bërë një performancë të jashtëzakonshme, e cila ka qenë dhe mbetet avokatja më e palodhur dhe më e shquar e reformës në arsim në interes të maturantëve, në interes të studentëve dhe të transparencës që duhet të ketë ky proces. Njëkohësisht, absolutisht, e gjithë lista tjetër e të rinjve është mbresëlënëse, kualiteti i tyre është i jashtëzakonshëm. Ata vërtet janë të rinj, por ata kanë 10-12 vjet eksperiencë.

Por mosha mesatare, z. Meta, është shumë e ulët. Si do të jenë ata, fjala vjen, në Kuvend në qoftë se zgjidhen katër deputetë dhe Luan Rama mbetet jashtë listës?

Të jeni të sigurt që do të zgjidhen në Tiranë. Mos kini asnjë shqetësim. Madje Luani ka kërkuar të ishte i dhjeti, por nuk ka asnjë shqetësim për këtë gjë.

Në qoftë se marrim moshën mesatare, është shumë e ulët.

E gjithë rinia në kryeqytet dhe në gjithë Shqipërinë voton Lëvizjen Socialiste për Integrim, dhe kjo është arsyeja pse duhet të përfaqësohen, në mënyrë të veçantë në listën e Tiranës.

“Old but gold” është ajo shprehja, pavarësisht se të rinjtë duhen…

Absolutisht, ata janë shpresa për një politikë tjetër në Shqipëri, për një politikë me integritet, për një politikë transparente dhe për një politikë që shikon drejt së ardhmes. Pa të rinjtë nuk bëjmë dot një ndryshim cilësor në Kuvend. Pa futur këta të rinj nuk do të diskutohet seriozisht për çështjen e arsimit, që të mos jetë vetëm një Kejdi Mehmetaj që diskuton aty, por të jenë shumë të tjerë që të mbrojnë maturantët, që të mbrojnë studentët; që të mbrojnë sistemin tonë arsimor nga ndërhyrjet klienteliste, oligarkike; që të diskutojmë për çështjet më serioze që kemi me tregun e punës, për çështjet më serioze që kemi me hapjen e vendeve të reja të punës, me inkurajimin e të rinjve që të shikojnë perspektivë në këtë vend. Sepse parlamenti, po ta shikojmë, ka qenë deri tani sa kriminelë ke ti, sa kriminelë kam unë; sa tenderë ka marrë ky deputet, sa tenderë ka marrë ai deputet. Prandaj ne kemi preferuar të rinjtë, nuk kemi preferuar as biznesmenë, as politikanë, të cilët nuk mund të japin ndonjë mesazh të veçantë në Kuvendin e ardhshëm.

Sapo u zgjodhët President i Republikës thatë që do të ndërmerrni një tur në bazë për të falënderuar anëtarët e LSI-së. E mbaruat turin, z. Meta?

Turi përfundon më 23 korrik dhe është i ndërthurur edhe me falënderime, edhe me mbështetje për kandidatët e rinj të Lëvizjes Socialiste për Integrim, sidomos për gratë dhe për vajzat e reja.

Vasili, kryetari i LSI-së, në vendin ku ju jeni, pak ditë më parë tha: “Edhe kur z. Meta të jetë President, unë do të këshillohem me të dhe këtu nuk ka as shkelje ligjore, as më ndalon kush”. A është normale kjo gjë që kryetari i LSI-së, kur ju të jeni President, të bisedojë me ju për çështje të brendshme të LSI-së?

Nuk e di se çfarë ka thënë z. Vasili, por Presidenti është i hapur për të diskutuar me të gjithë përfaqësuesit e forcave politike, por nuk ka të drejtë të ndërhyjë në çështjet e partive apo të mbajë anë në çështjet midis forcave të ndryshme politike.

Në vitin 1923 Faik Konica ka shkruar, është një thënie që, për mendimin tim, duhet vendosur në hyrje të parlamentit: “Ndryshimet e mira mund t’i sjellë vetëm një kabinet i pastër, i frymëzuar me ide politike dhe sociale të larta” dhe se “Një kabinet i ndershëm mund të dalë vetëm nga një parlament i ndershëm. Të gjitha këto i sheh dhe i di çdo njeri që është me të vërtetë njeri dhe jo shtazë me fytyrë njeriu, por vetëm njerëzit e mençur, njerëzit me tru dhe me balancë kuptojnë se për të pasur një parlament me ndërgjegje duhet stërvitur populli të përdorë me gjykim armën që ka në dorë, votën”. Si duhet stërvitur populli? Në vitin 1923 e ka thënë Faik Konica këtë.

Unë mendoj se populli shqiptar nuk do të gabojë me votën e tij më 25 qershor, sikurse nuk ka gabuar në referendumin e vitit 1994, sikurse nuk ka gabuar në mars të vitit 1992 dhe në vijimësi. Kështu që ne kemi besim të madh te kjo gjë dhe unë, në veçanti. Prandaj kemi qenë totalisht të angazhuar për zgjedhje të ndershme dhe të lira. Ata që nuk kanë qenë të angazhuar për zgjedhje të ndershme dhe të lira, dhe që nuk janë as sot, ata kanë frikë nga ky gjykim i popullit shqiptar, i cili është një gjykim i pashmangshëm për cilindo.

“Një kabinet i ndershëm mund të dalë vetëm nga një parlament i ndershëm”, – thotë Konica.

Unë mendoj se shqiptarët do të zgjedhin një Parlament të ndershëm, i cili do të zgjedhë një kabinet të ndershëm.

Meta, a e keni peng që nuk ishit pjesë e kësaj qeverie të çuditshme në historinë e shtetit shqiptar, ku ka ministra teknikë të propozuar nga PD-ja, të miratuar nga PS-ja, ka socialistë, ka LSI-istë, domethënë ka personazhe të tjerë deri të çuditshëm, që nuk kanë lidhje me partitë politike, madje as me politikën dhe as me parlamentin?

Nuk dëshiroj të hyj në këtë koment. Unë kam qenë pjesë e qeverive në të kaluarën, kam qenë në detyrën e Kryeministrit, kam qenë disa herë Zëvendëskryeministër, ministër i Jashtëm. Kështu që nuk kam ndonjë shqetësim të tillë. E rëndësishme është që kjo qeveri e krijuar në një situatë të një krize artificiale të përmbushë ato detyra që ka për të garantuar besimin për zgjedhjet. Këtu, natyrisht, ka probleme serioze, të cilat do të monitorohen dhe do të gjykohen nga të gjithë.

Ju kërkuat një qeveri besimi. A është kjo realisht qeveria e besimit, që ju kërkuat, apo besimi i saj ka kapërcyer edhe optimizmin tuaj të atyre ditëve, që vetëm ajo mund ta zgjidhte krizën?

Qeveria e besimit ishte e vetmja rrugë për të përfshirë opozitën në këtë proces, pasi ishte e qartë që opozita, në rast se nuk do të merrte disa garanci, nuk do të hynte në këtë proces. Opozita doli me kauza për zgjedhje të lira, për luftën kundër drogës dhe mospërdorimin e parave të drogës, për blerjen e zgjedhjeve, për dekriminalizimin dhe mospërdorimin e kriminelëve, njëkohësisht, për probleme të tjera të abuzimit me administratën shtetërore, për probleme me Policinë e Shtetit e kështu me radhë. Do të shohim se çfarë garancish do të jepen në drejtim të standardit të zgjedhjeve. Por unë mendoj se fillimi i funksionimit të kësaj qeverie, është shumë i dyshimtë dhe mbetet shumë për të parë nëse vërtetë shqetësimi i opozitës ka qenë garantimi i standardit të zgjedhjeve, pra që ato të jenë të ndershme, të jenë gjithëpërfshirëse, apo ka qenë thjesht përpjekja për të hyrë në qeveri dhe për t’u bërë pjesë e cenimit të këtij standardi! Kjo mbetet për t’u parë.

Rama ka deklaruar se Shqipërisë dhe politikës shqiptare i bën mirë që të ketë vetëm dy parti, cili është komenti juaj për këtë? Sistem amerikan…

Më vjen për të qeshur, se ky nuk është sistem amerikan. Sistemi amerikan është që janë dy parti, ku Trump-i mund të mos jetë anëtar, por kandidon në një proces të drejtë, i mund të gjithë dhe bëhet President i Amerikës, apo për Partinë Demokratike kandidon Sanders-i apo dikush tjetër. Ndërsa këtu aktualisht, për fat të keq, nuk kemi të bëjmë me dy parti, por kemi të bëjmë me dy individë, të cilët i bëjnë listat sipas dëshirave të tyre, i fshijnë kontributet e njerëzve me vlera në partitë e tyre thjesht, sepse nuk u përshtaten apo për një mendim kritik që mund të kenë shprehur. Dhe, për fat të keq, këta dy individë ngjajnë si dy pika uji, po të shohim mënyrën se si është vepruar edhe me listat e kandidatëve që ata kanë paraqitur dhe kontestimin e gjerë të tyre brenda vetë partive. Pra, nuk kemi të bëjmë me dy parti demokratike. Në qoftë se Shqipëria do të kishte dy Parti Demokratike dhe në qoftë se Partia Socialiste do të kishte qenë një parti demokratike e vërtetë, nuk do të ishte krijuar LSI-ja. Pse u krijua LSI-ja?! Sepse Ilir Meta, edhe pse i fitoi zgjedhjet, sepse zgjedhjet u fituan në emrin e Ilir Metës si kryeministër…

Kur ishit kryeministër?

Më pas u bë një kongres, ku në mënyrë tërësisht jodemokratike u hoq Ilir Meta, që kishte fituar zgjedhjet, por edhe shumë njerëz të tjerë në një proces manipulativ, në një proces skandaloz. Kështu që LSI-ja u krijua si një alternativë e re për shkak se nuk kishte demokraci, sepse, në qoftë se do të kishte demokraci, nuk kishte arsye që të krijohej LSI-ja. Përgjigjja ime për z. Rama, meqenëse e ka me pasion këtë çështjen e dy partive, ku, në fakt, ai ka në mendje vetëm një parti, madje nuk ka në mendje asnjë parti, por vetëm një njeri, veten e tij, është kjo: në rast se Shqipëria do të ketë dy parti, një nga këto dy parti do të jetë pa asnjë diskutim LSI-ja dhe do të jetë partia më e madhe e shqiptarëve.

Po partia tjetër?

Nuk e di. Mund të jetë një rilindje e përbashkët.

Ta gjejnë vetë ata të dy?

Po, ta gjejnë vetë. LSI-ja integrim është, integrimi është i hapur për të gjithë, edhe për socialistët, edhe për demokratët.

Meta, në këto momente marrëdhëniet e LSI-së, në radhë të parë me PS-në, por edhe tuajat personale me z. Rama, publikisht nuk duken mirë, a mund të na thoni ju ç’ka ndodhur mes jush dhe z. Rama? Sepse nga momenti që ju jeni zgjedhur President i Republikës ose ka ironi në deklarata, ose ka kundërdeklarata, ose ka akuza, kundërakuza e kritika?

Unë nuk mendoj se ka ndodhur diçka në raportin tim me z. Rama, por problemi i z. Rama është se nuk e di se çfarë kërkon dhe se çfarë do të bëjë në këtë vend dhe nuk e kupton që të jesh Kryeministër apo të kesh një pozicion të caktuar, nuk do të thotë të sillesh si pronar i vendit dhe të bësh çfarë të duash me institucionet, me demokracinë, me votën e qytetarëve. Të kesh në mendje vetëm një reformë për të përqendruar të gjitha pushtetet në një dorë, është një marrëzi, nuk është një projekt, nuk është një vizion. Në këtë drejtim, mendoj se shqetësimi i tij ka qenë vetëm qëndrimi im parimor dhe i Lëvizjes Socialiste për Integrim në dy momente kyçe, por ka edhe çështje të tjera, mendoj unë: një është te reforma në drejtësi, ku ai donte të bënte një reformë në drejtësi pa opozitën, me qëllim kapjen e plotë të sistemit të drejtësisë, në kundërshtim edhe me rekomandimet e Komisionit të Venecias, dhe arriti të manipulonte edhe shumë ndërkombëtarë, por padyshim që dështoi për arsye se…

I manipuloi ndërkombëtarët?

Arriti të manipulonte shumë për shkak të paaftësisë të opozitës, e cila nuk ishte shumë koherente, e para.

E dyta, edhe kur kishte të drejtë, për shkak të shumë gabimeve në menaxhimin edhe të inkoherencës së saj nuk arriti dot të mbronte drejtësinë e pozicionit të saj. Natyrisht, të gjithë e dinë shumë mirë që pengesa për të miratuar një reformë të tillë, e cila nuk synonte vetëm kapjen e reformës së drejtësisë, por synonte edhe shpërbërjen e opozitës në Parlament, pasi dihet që shumë deputetë ishin nxitur, ishin përpunuar për të votuar këtë reformë, sepse këta donin drejtësi, këta të tjerët nuk donin drejtësi, për ta nxjerrë opozitën nga institucionet dhe për ta shpërbërë Partinë Demokratike. Unë, natyrisht, këtë nuk e bëra për hir të Partisë Demokratike, sepse nuk është se kam ndonjë detyrim të veçantë, por për hir të demokracisë në vend dhe për pasojat që do të sillte kjo gjë. Në rast se do të kishte ndodhur ajo që donte zoti Rama dhe ajo që ai kishte në mendje, pa dyshim që Shqipëria do të kishte hyrë në një krizë të thellë që në atë moment, së pari. Së dyti, pa dyshim që do të kishim pasur probleme të jashtëzakonshme me procesin e integrimit europian. Nuk mund të kishte kurrë Shqipëria një rekomandim pozitiv për hapjen e negociatave në rast se reforma nuk do të kishte kaluar me konsensus. Kjo është një çështje e mbyllur dhe nuk e dimë më se çfarë do të kishte ndodhur tjetër. Rasti i dytë problematik, ose shqetësimi i tij i dytë, natyrisht ka të bëjë me çështjen aktuale të zgjedhjeve, ku është e qartë se edhe ai vetë donte të zgjidhej pa opozitën. Këmbëngulja e tij ka qenë madhe dhe e fortë. Pavarësisht se opozita kishte teprime e saj në qëndrim, në pozicione deri edhe ekstreme, padyshim që ai e provokonte në mënyrë të vazhdueshme opozitën, sepse ai nuk donte që opozita, praktikisht, të përfshihej në zgjedhje.

Po, por pastaj ndenjën 5 orë brenda…

Ata ndenjën brenda, pasi dështoi skenari i Ramës për të bërë zgjedhje pa opozitën. Kur të gjitha partitë e imponuan atë tryezë, ai e pa që nuk mund të merrte përgjegjësinë i vetëm për këtë çështje dhe nuk do të ndiqej nga askush tjetër, atëherë i bëri një ftesë kryetarit të opozitës dhe, natyrisht, besoj se kanë bërë një marrëveshje për të zgjidhur hallet e tyre, por nuk besoj se kanë bërë një marrëveshje për të kontribuar për standardet më të larta dhe më të ndershme të zgjedhjeve për qytetarët shqiptarë.

Po ju e kërkuat atë marrëveshje, pse tani e quani që e kanë bërë për hallet e tyre?

Patjetër, ne e kërkuam përfshirjen e opozitës, por duket qartë që kjo marrëveshje është bërë në një mungesë transparence, sepse marrëveshja realisht duhet të ishte bërë në tryezën e partive parlamentare, të cilat e organizuan këtë tryezë…

A ia keni thënë këtë Ramës?

Nuk ka fare nevojë t’ia them, ose po ia them këtu dhe, së dyti, kjo marrëveshje duhet të ishte transparente, nuk duhej të cenonte as Kushtetutën, as Kodin Zgjedhor dhe as mundësitë e koalicioneve ndërmjet partive të tjera.

Natyrisht që ishte një marrëveshje me idenë dhe me mendimin për të dëmtuar forcat e tjera politike, përfshirë edhe partitë aleate, përveç LSI-së, e cila nuk dëmtohet nga kjo marrëveshje, pra nga konkurrimi pa koalicione, por partitë e reja, të cilat janë në konkurrim, pa dyshim që dëmtohen, sepse e kanë të pamundur të arrijnë diku pragun për të marrë një deputet apo diçka më shumë.

Si e shikoni “dashurinë” midis Ramës dhe Bashës në këto momente?

Nuk shikoj asnjë lloj serioziteti në marrëdhënien e tyre në raport me zgjedhjet, në raport me fushatën, është diçka e trukuar. Mendoj se ata janë në një hall të madh. Halli i tyre mendoj se është rritja e madhe e LSI-së, këtë më duhet ta theksoj, e cila i shqetëson të dyja palët, për fatin e keq, të tyre më shumë, i ka bashkuar për ta cenuar këtë proces në mënyrën më abuzive dhe më absurde.

Shqiptarët e kanë të qartë tani se çfarë përfaqësojnë të dy këta kryetarë dhe besoj se e kanë edhe socialistët, e kanë edhe demokratët, kështu që u mbetet atyre të gjykojnë me votën tyre.

Meta, unë kam renditur këtu disa deklarata që kryetari i PS-së dhe Kryeministri Edi Rama ka bërë për ju personalisht dhe për LSI-në. E para është ajo që ka bërë direkt pas zgjedhjes suaj si President i Republikës. Z. Rama tha: “Ilir Meta po kontribuon në thellimin e krizës politike në vend”. Cili është reagimi juaj, komenti juaj dhe kështu do t’i lexoj të gjitha?

Për thellimin e krizës përse?

Në ato momente Shqipëria ishte në një krizë politike. Pasi ju u zgjodhët President dhe në momentin që Shqipëria ishte në një krizë që po thellohej.

Po kush e zgjidhi krizën?

Kriza u zgjidh pasi ju u zgjodhët President, në takimin Basha – Rama.

Edhe vetë zgjedhja ime ishte në funksion të zgjidhjes së krizës. Në rast se unë nuk do të isha zgjedhur President, sepse unë kam kërkuar që posti i Presidentit të vendosej në paketën e McAllisterit, që u vendos, në mënyrë që t’i jepej opozitës si një mundësi për të rritur mirëbesimin e saj në të gjithë këtë proces. Opozita nuk erdhi në 3 raunde, më pas kishte mbetur: ose z. Rama të zgjidhte një përfaqësues të Rilindjes, dhe nuk besoj se kishte në plan të zgjidhte ndonjë të PS-së me 71 vota dhe s’e di se me ç’mënyrë do të zgjidhej, ose…

Çfarë të keqe ka këtu?

Më dëgjoni, kjo nuk ka asnjë gjë të keqe. Pra, ose do të shkonim në zgjedhje të menjëhershme për shkak të procedurës kushtetuese dhe opozita do të mbetej jashtë këtij procesi dhe kriza do të përshkallëzohej dhe do të merrte dimensione të paparashikueshme, kështu që…

Domethënë ju sakrifikuat?

Zgjedhja ime ishte për të shpëtuar institucionin e Presidentit nga një krizë, e cila mund ta bënte atë jolegjitim pas zgjedhjeve, që natyrisht nuk mund të ishte legjitim pa opozitën.

Sigurisht që ishte një investim, ishte një sakrificë dhe mendoj se ishte e dobishme që pati efektin e vet për të sjellë zgjidhjen e vetë kësaj krize për të evituar zgjedhjet pa opozitën.

Një pjesë në PS mendojnë se duke shkuar ju në presidencë, LSI-ja dobësohet.

Mendoj se ky është një iluzion i të gjithë atyre që nuk e njohin LSI-në dhe që do të jetë shumë vonë kur ta njohin.

Së dyti, “duan të jenë forcë e parë, por nuk i kanë bërë llogaritë me PS-në”. Të gjitha këto i thotë Rama…

Nuk e di se çfarë ka thënë Rama, por LSI-ja do të jetë forcë e parë, kjo është një histori që ka përfunduar. Është sot forcë e parë dhe do të jetë edhe në kutitë e votimit.

“LSI-ja nuk ka mbajtur asnjë përgjegjësi për gjërat që kanë shkuar keq gjatë qeverisjes”.

Absolutisht LSI-ja ka marrë të gjitha përgjegjësitë e saj. LSI-ja ka reflektuar. LSI-ja ka bërë edhe zëvendësime ministrash, madje edhe në funksione të tjera. Përgjegjësinë për drogën duhet ta mbajë Rama, nuk mund ta mbajë LSI-ja, sepse zgjedhja e Saimir Tahirit në krye të Ministrisë së Brendshme ka qenë një zgjedhje e tij personale, edhe pse ka pasur kundërshtime të mëdha edhe nga brenda nga PS-ja, por edhe unë i kam shprehur rezervat e mia atij dhe personit në fjalë.

Ia keni shprehur personalisht? Dhe çfarë ju ka thanë Rama?

Më ka thënë që ky është njeriu më i besuar, nuk kam njeri tjetër më të besuar. Përgjegjësinë për çështjen e drogës e ka Rama dhe askush tjetër dhe LSI-ja nuk ka asnjë lidhje.

Përgjegjësinë për futjen e shumë elementeve me rekorde kriminale në parlament e ka vetëm Rama dhe nuk ka asnjë përgjegjësi LSI-ja. Edhe një deputet që kishte LSI-ja që nuk e dinte se ishte me këto probleme, e kishte marrë Rama. Kjo është historia.

Tani për çfarë ka përgjegjësi LSI-ja? Për koncesionet? LSI-ja ka dy vjet që ka dorëzuar në parlament ligjin për koncesionet. Pse? Sepse është pasuri e të gjithë shqiptarëve dhe nuk mund të jepen koncesionet fshehurazi, të jepen burimet natyrore të Shqipërisë fshehurazi, të jepen miliardë euro fshehurazi. Aty i kemi të ardhurat, nuk i kemi tek taksat e larta.

Pse nuk i keni kundërshtuar fort, z. Meta?

Mendoj se këto mesazhe janë dhënë në mënyrë të qartë për të gjithë ata që kuptojnë nga politika, por natyrisht që tani është momenti që të jenë edhe më të qarta, meqenëse zoti Rama thotë se LSI-ja nuk merr përgjegjësi dhe ai merr përgjegjësi. Nuk e di se për çfarë ka marrë përgjegjësi zoti Rama? Për zotin Rama gjithmonë përgjegjësinë e ka ose Berisha, ose Luli, ose LSI-ja. Pra, gjithmonë ai fajin do ta gjejë diku, asnjëherë nuk do ta gjejë te vetja e tij. Unë mendoj se kjo arrogancë e tij do të ndëshkohet në mënyrë të pandalshme më 25 qershor.

“Meta ka mbajtur pushtet edhe me PD-në, edhe me PS-në dhe ka përfituar prej të dyve, por më pas ka drejtuar gishtin nga partia e madhe duke deklaruar fajtorin”. Citoj z. Rama

Kjo nuk është fare e vërtetë. LSI-ja ka ndarë përgjegjësinë me PD-në. Duhet t’i kthehemi vitit 2009. Pasi Rama bëri me Berishën ndryshimet kushtetuese në vitin 2008 për kthimin në errësirë, për të eliminuar LSI-në, pasi refuzoi koalicionin me LSI-në, LSI-ja nuk kishte rrugë tjetër pas zgjedhjeve, kur mbijetoi me shumë sakrifica, për të qenë faktor stabiliteti dhe faktor kontribuues për zhvillimin dhe integrimin vendit, veçse të mbyllte koalicionin me PD-në, sepse një koalicion me PS-në e bënte të pamundur krijimin një shumice qeverisëse.

Dhe një mandat ishte i juaji.

LSI-ja me PD-në bëri liberalizimin e vizave që shqiptarët e kanë sot e kësaj dite. Nëse Shqipëria do të kishte hyrë në një krizë të thellë në atë kohë, ne nuk e dimë nëse do ta kishin sot shqiptarët këtë, mund të kishin fatin e shqiptarëve të Kosovës, që nuk e kanë ende. U bë gjithë ai lobim i jashtëzakonshëm.

Një arritje historike e Shqipërisë është gazsjellësi i TAP-it, që ishte një investim i jashtëzakonshëm në atë kohë, si edhe i shumë veprave të tjera. Në rast se ato nuk do të ishin bërë, atëherë të jesh i sigurt që investimet e huaja, do të ishin shumë më të ulëta tani. Shumë nga krenaritë e qeverisjes aktuale janë si rezultat i investimeve të jashtëzakonshme që filluan në atë periudhë, por që janë investime që kanë një vlerë afatgjatë për Shqipërinë.

Për sa i takon PD-së ajo ka pasur përgjegjësinë kryesore, sepse ajo ka qenë drejtuese e qeverisë. Edhe në rastin aktual PS-ja ka qenë drejtuese e qeverisë, kështu që nuk mund të marrë LSI-ja përgjegjësitë. LSI-ja mund të marrë përgjegjësi pse i votoi Ramës “Crovvn Agent’s” në Parlament në një mënyrë, do të thosha, jo shumë të ndershme, për arsye se do të duhej të ishte shpallur një garë, por e votoi, sepse mori garanci, besoi Ramën që do të bënte mrekulli me doganat. Kjo mrekulli nuk ndodhi, apo jo?

Ne i dhamë një besim. Ai na dha garanci, ne i dhamë besim. Kjo gjë dështoi, nuk mund të marrë LSI-ja përgjegjësinë për këtë gjë.

Kam disa gjëra të renditura që ju e keni përkrahur Ramën, realisht.

Më shumë përkrahje se i kemi dhënë, nuk mund t’i jepnim, por për fat të keq…

A jeni penduar sot?

Jo, ne i kemi dhënë me shpresën se do të reflektojë dhe këtë përkrahje do ta investojë në të mirë të vendit. Kjo është gjithë historia. Është e drejtë e secilit të mendojë pastaj se mund t’ia hedhë partnerit ose partnerëve, ose qytetarëve. Kjo është një çështje që secili e mendon vetë. Dita e vlerësimit dhe e gjykimit për secilin po afron, është 25 qershori.

Meta deklarata tjetër “LSI kërkon që një dorë ta mbajë në timon dhe një tjetër ta ketë të lirë të akuzojë sa herë vjen radha për të ndarë pushtetin duke akuzuar partinë e madhe”…

E para, një herë ai përfaqëson një ish-parti të madhe dhe për këtë duhet të jetë i sigurt dhe përgjigjen do ta marrë më 25 qershor dhe Rilindja e tij nuk ka asnjë lidhje me Partinë Socialiste. Është kujtuar shumë vonë për socialistët.

Mbasi u ktheu kurrizin dhe promovoi dhe favorizoi, që nga vendet në qeveri, edhe në kundërshtim me këshillën time kur u krijua qeveria në vitin 2013, ku i kam thënë të ruajë balancat midis figurave politike dhe figurave të reja që kërkonte t’i promovonte.

Mbasi u ktheu kurrizin socialistëve për katër vjet, tani po përpiqet t’i rikthejë te kutitë e votimit, duke i manipuluar sikur ua ka fajin LSI-ja atyre që kanë qenë të injoruar, kur në fakt të gjithë e dinë që ky e ka natyrën e vet që gjithmonë përbetohet e stërbetohet për dashuri ndaj popullit të tij për të arritur një interes të caktuar dhe përsëri ka të njëjtin problem, i cili ka të bëjë me mosmirënjohjen që ai e ka një sëmundje të pashërueshme.

Kështu që socialistët nuk e besojnë dot më atë dhe natyrisht që më 25 qershor nuk do të votojnë për Rilindjen.

Kjo është një deklaratë shumë e fortë z. Meta….

Kjo është një deklaratë shumë e vërtetë dhe ne duhet të kemi përgjegjësinë në një moment të tillë të rëndësishëm për vendin të mos lejojmë asnjë aventurier të rrezikojë të ardhmen e Shqipërisë.

Po ju pse bëni koalicion me të, se po më habisni?

Nuk më duket se ka koalicion në këtë rast. Çdo parti konkurron më vete. Tani situata është e këtyre përmasave, ku padyshim secili duhet të thotë mendimin e tij.

Kur i dini këto si mund të bëni koalicion me një njeri që ka mosmirënjohje?

Për fat të mirë nuk kam ndërmend të bëj koalicion me njeri, sepse unë nuk jam as anëtar i kryesisë së LSI-së. Këtë pyetje mund t’ia bëni Petrit Vasilit nëse ka ndërmend të bëjë koalicion apo jo.

Vasili tha se do të këshillohej me Z. Meta për çdo gjë që do të ndodhë?

Këtë nuk e di, nuk e kam dëgjuar.

“Nuk ka asnjë marrëveshje për koalicion me PD-në – ka thënë z. Rama – dhe nuk ka asnjë komplot kundër LSI-së”…

Në fakt ai ka të drejtë, nuk ka komplot kundër LSI-së, ka një komplot kundër demokracisë në tërësi. LSI sulmohet, sepse shikohet si e vetmja alternativë që mund të kundërshtojë pazaret e dy individëve, të cilët thjesht kanë bërë një marrëveshje për karriget e tyre dhe të pushtetit të tyre e oligarkisë në vlerësimin tim.

Të të njëjtëve njerëz që drejtonin në kohën e Berishës dhe kontrollonin koncensionet në universitete private dhe të njëjtëve njerëz që për fat të keq kanë të njëjtin ndikim edhe sot. Kjo është ajo që i bashkon më shumë se çdo gjë tjetër. Jo interesi i shqiptarëve, jo interesi i demokracisë.

Dhe po ta shikosh edhe shfarosja nga lista e PD-së të shumë njerëzve me kontribute ndodhi mbas këtij takimi 3 orësh, pas marrjes së disa garancive.

Ju jeni i shqetësuar që znj.Topalli nuk është në këtë listë?

Jo, nuk jam i shqetësuar për znj.Topalli, sepse ajo ka qenë gjithmonë një kundërshtare e paarsyeshme e imja, nuk ka lidhje me këtë, por unë jam tërësisht skeptik të besoj që një njeri që i mbajti njerëzit në çadër për 90 ditë për standardin e zgjedhjeve dhe mbajti aleatët e tij. Ata aleatë po të kishin dëgjuar Edi Ramën, që nga Agron Duka i pari, e të tjerët do të kishin sot nga 10 deputetë përveç edhe shumë përfitime të tjera e ta kishin lënë z. Basha në çadër. Do të kishin hyrë edhe në zgjedhje dhe ndërkombëtarët do të kishin thënë “bravo që i latë ata që nuk duan vetingun, që nuk duan drejtësinë atje në çadër sepse ata janë të korruptuar, janë e kaluara e Shqipërisë”. Por z. Duka e të gjithë ata treguan një integritet pavarësisht se patën kontribut, si z. Mediu e të gjithë për tryezën e për zgjidhjen. Por ai u ktheu kurrizin sapo u takua me Ramën dhe i detyroi që o të pranojnë ato vende në listë që nuk i garantojnë a do të jenë apo jo deputetë dhe njëkohësisht pranoi shkrirjen e partive të tyre. Duke cenuar disa standarde që kanë të bëjnë me kodin zgjedhor edhe me çështje të tjera. Së dyti, një njeri që nuk mbledh kryesinë e partisë për të komunikuar listat dhe e çon fshehurazi në KQZ, nuk besoj se është një shprehje për demokraci dhe për republikë të re.

Kur e pranojnë ata…

Sigurisht kur e pranojnë ata, por a e pranojnë qytetarët shqiptarë, a e pranojnë demokratët që i kanë sytë në ballë? Nuk besoj se e pranojnë.

Janë 100 mijë anëtarë….

Po kështu një kryetar që thotë se 35 % e listave të partisë do të jenë nga FRPD dhe në fund fare nuk e vë as kryetarin gjëkundi. Pra kjo e tregon qartë se këtu nuk kemi asnjë interes për demokraci. Këtu kemi të bëjmë me interesa personale, por shqiptarët nuk janë budallenj, i kanë sytë hapur dhe do ta vendosin me votën e tyre të ardhmen e tyre.

Është një deklaratë e bërë dje nga z. Rama dhe do të doja nga ju të ma sqaronit mirë, sepse kam pyetur edhe tri zonja, kandidate të PS-së dhe nuk e kishin idenë. “Unë e kam kyçur gojën kur drejtorë nga LSI kanë hequr nga puna gratë socialiste”. Për kë?

Mendoj që kjo është një shpikje e rëndomtë nga këto inskenimet e zakonshme.

Ai thjesht kërkon që të justifikohet para socialistëve, ndjen distancën e thellë që ka krijuar me ata për shkak të arrogancës, mosmirënjohjes dhe së dyti është ky vetë që nuk ka treguar asnjë lloj respekti dhe asnjë lloj konsiderate për të gjitha ato gra të shquara të PS-së, natyrisht edhe burra. Po të shikosh listën e fundit, gratë më të shquara të PS-së në vite u zhdukën nga lista.

E ke fjalën për Arta Daden?

Nuk dua të hyj në emra të përveçëm, por janë disa gra dhe shumë personalitete u zëvendësuan më ato që u zëvendësuan. Pra, ai nuk ka hallin e grave të PS-së. ai ka vetëm një hall të bindë ata socialistë që janë larguar për shkak të arrogancës dhe mosmirënjohjes së tij dhe të gjithë oborrit të tij të Rilindjes që vjen në mënyrë vertikale duke u thënë që nuk e ka ai fajin, por fajin e ka Meta, LSI e kështu me radhë. Gjithmonë në kërkim të alibive të reja.

“Të gjitha partitë e vogla këtë punë kanë bërë dhe këtë punë duan të bëjnë. Duan një, dy, tre vota, 5 kartonë që të vijnë e të bëjnë pazar për të punësuar njerëz të partisë. Unë kam qenë deri në fund për koalicionet. LSI-ja ka qenë e ngurtë për këtë në raport me këtë nevojë. Pastaj ka krijuar një formulë që ishte gjysma e parë për koalicionin dhe gjysma e dytë për çadrën”. Po citoj z. Rama…

Mendoj se të gjitha këto janë përralla, janë barsoleta. LSI-ja absolutisht gjithmonë qëllimet i ka pasur të hapura.

Së dyti, ai e ka ftuar LSI duke i thënë hajde me mua se ne i bëjmë 71 vota edhe pa ty, sepse ne kemi PDIU-në. Gjithmonë edhe raportet brenda koalicionit i ka parë në mënyrë diversioni. Afron PDIU me qëllim që ta shikojë si një mjet presioni ndaj LSI-së. Pastaj përpiqet të afrohet me LSI, duke i thënë PDIU-së se nuk ju do juve LSI-ja. E ka në natyrën e vet diversionin, paqëndrueshmërinë dhe pabesinë. Kështu që nuk habitem fare nga të gjitha këto deklarata të z. Rama. Besoj se kapitulli i tij është i mbyllur. Ai ka frikë nga zgjedhjet e lira dhe të ndershme, prandaj nuk e donte opozitën në zgjedhje. Ai kishte frikë nga Ben Blushi për të konkurruar në parti dhe bëri një referendum. Nxori gjithë socialistët në mënyrë që të mos bënte zgjedhje. Këto janë problemet e tij, ne nuk kemi se çfarë t’i bëjmë, nuk e shërojmë dot nga kjo fobi që ka nga zgjedhjet e lira, nga demokracia. Shqipëria nuk kthehet 27 vjet mbrapa. Ajo histori ka perënduar një herë e përgjithmonë.

“Unë dua një timon. Nuk duam të mbajmë në prehër të tjerët sepse kështu nuk arrimë dot në destinacion”. Për ju e ka?

Unë jam i bindur që më 26 qershor LRI-ja e Tiranës do t’i çojë dhe një timon dhe një tepsi në Surrel t’i mbajë për të gjithë jetën atje. Siç mori Valesa, kur humbi zgjedhjet në Poloni, karrigen nga zyra.

Do ta marrë edhe Rama?

Do t’ia çojnë Ramës në Surrel. LRI-ja do t’i çojë edhe një timon edhe një tepsi.

Nuk ka patentë makine Kryeministri?

Nuk e di a ka apo jo patentë, por unë nuk do të hipja kurrë në një makinë me të.

A keni hipur ndonjëherë?

Jo, nuk kam hipur.

Po ai te makina juaj?

Jo, jo, nuk e kam bërë asnjëherë shoferin e tij unë dhe nuk kam ndërmend ta bëj.

Gjyshi i tij ka qenë shofer i mbretit.

Shumë mirë!

Ka përdorur edhe një fjalë që më ka habitur fare. Ju si njohës shumë i mirë i politikës ndërkombëtare dhe të Ballkanit. “LSI-ja, sipas z. Rama, kërkon bosnjëzimin e shtetit”. Kjo është shumë e rëndë.

Tani ai kërkon të gjithë tepsinë për vete, sepse këtë koncept ka për pushtetit. Kalon nga tepsia te bosnjëzimi.

Së dyti, po të shikosh të gjithë filozofinë e ndërtimit të qeverisë prej tij, është përpjekja për të drejtuar ose më saktë, për të drejtuar në mënyrë jodemokratike, ose për të sunduar. Mospërfshirja e Blushit dhe shumë emrave të tjerë, Arta Dades, në qeverinë e PS çfarë ishte? Vendosja e njerëzve të tjerë si të rinj ishte faktikisht nën kontrollin e plotë të z. Rama.

Nuk janë të rinj në moshë…

S’ka rëndësi. Të rinj pa kontribute të spikatura në PS, që s’ishin vetvetja në kuptimin e luftërave dhe betejave që kishin bërë. Nuk kishin një personalitet të spikatur të tyre. Mund të kenë nga ana profesionale, nga ana e formimit të tyre.

Kjo ishte një përpjekje për të drejtuar në mënyrë arbitrare dhe natyrisht e gjithë historia e tij tani është thjesht një dëshpërim i tij për të arritur, sipas tij, një shumicë me format dhe mënyrat që ai ka në mendje, por që ia lexojmë të gjithë, e cila t’i japë mundësinë që ai të bëjë gjithçka: ta miratojë ligjin e mbetjeve pa e penguar LSI-ja, mos të miratojë kurrë ligjin e koncesioneve, t’i japi si të dojë, të bëjë ç’të dojë me reformën në arsim e në fund të thotë që është sukses i madh, se 10% e maturantëve që ngelën të pakënaqur nuk është ndonjë gjë e madhe, pa u shqetësuar se ata përpara se të jenë 10% janë fëmijë, kanë ëndrra, kanë prindër, kanë familje dhe kështu me radhë. Mendoj që është në rrugën e duhur për të marrë përgjigjen e duhur.

Kolegu im Sokol Balla i ka bërë një pyetje z. Rama dhe i ka thënë nga 1 në 10 sa të sigurt jeni që LSI dhe PS do të qeverisin bashkë. Ai ngriti të dyja duart me gishtat hapur dhe tha tekstualisht: “dhjetë!”. Ju, z. Meta, po ju bëj të njëjtën pyetje që z. Balla i bëri z. Rama. Sa të sigurt jeni që LSI do të bëj koalicion me PS? Nga 1 në 10.

Unë nuk kam asnjë përgjigje për këtë pyetje, sepse kjo është pyetje që i takon LSI-së dhe kryetarit të PS-së, z. Vasili. Unë besoj që Petrit Vasili do të jetë Kryeministri i ardhshëm i Shqipërisë dhe do t’i takojë atij të marrë vendimet që do t’i duhet të marrë. Unë jam i bindur që ai do të dijë ta realizojë shumicën nga të gjitha partitë që do të marrin pjesë në zgjedhje dhe nga kompozimi i parlamentit të ardhshëm.

Më ka ngacmuar edhe një deklaratë tjetër. “Unë kam punuar shumë mirë me ministrat e LSI-së”, thotë z. Rama, “përveç njërit, Ylli Manjanit, që nuk punoja dot. Ai nuk ishte për atë punë.”

Është e qartë që i vetmi që nuk është për atë punë është z. Rama, pavarësisht nga të gjithë mangësitë e të gjithë ministrave të tjerë. Ministrat e LSI-së janë treguar mjaft korrekt, mjaft bashkëpunues me të. Ai ka abuzuar shumë me frymën e tyre të bashkëpunimit, me tolerancën e tyre.

Kjo qenka shumë e rëndë…

Patjetër, ky është fakt. Në rastin e z. Manjani, ai ka qëndruar më fort, edhe për shkak të natyrës e protagonizmit të tij, dhe sigurisht që z. Rama i ka dhembur më shumë.

Ju e vlerësoni këtë gjë te z. Manjani? E vlerësoni z. Manjani për këtë mënyrë qëndrimi?

Unë e vlerësoj, por ajo që kam pasur një rezervë të z. Manjani është që, gjithmonë, një qëndrim përpara se të mbahet publik, kur je anëtar i qeverisë, duhet mbajtur më përpara në institucion, në nivelet e qeverisë. Ndoshta jo gjithmonë ai e ka bërë këtë gjë.

Meta si janë marrëdhëniet tuaja personale me z. Basha?

Me z. Basha kam pasur marrëdhënie shumë të mira. Në fakt, dy njerëzve që u kam bërë më shumë dhurata në këtë jetë janë Rama dhe Basha. Në kuptimin politik të mbështetjes dhe ndihmës në momente të rëndësishme për ta.

Ju i keni bërë koalicionit dhuratë?

Dhuratë në kuptimin e mbështetjes.

Dhuratë është kur jepet diçka nga vetja jote, që ai e merr për vete…

Dhurata është kryetar Bashkie në vitin 2000. Dhurata është kryetar Bashkie në vitin 2007. Kundërdhurata e tij në 2008-n ishte aleanca me Berishën për të bërë Kodin për të zhdukur LSI-në. Kjo ideja e timonit nuk është e re. E vetmja gjë e re është që sot LSI-ja është forcë e parë, jo më një forcë e re.

Le të presim 25 qershorin…

Këtu do të jemi edhe në 25 qershor, edhe në 26 qershor. Kështu që, të gjitha këto, edhe Kryeministër që u bë z. Rama, nuk është z. Rama që i dha pushtet LSI-së. Është LSI-ja që i dha z. Rama mundësinë për t’u bërë Kryeministër se mund të mos ishte bërë kurrë në jetën e tij. Megjithatë, është e drejta e kujtdo që ta investojë një mundësi dhe ta shpërdorojë atë.

Basha i ka pak më ndryshe këto deklaratat ndaj jush personalisht. Ndonjëherë janë edhe therëse, të habitshme. “Tregtari i Venedikut” ju ka cilësuar.

Përse bëhet fjalë. S’e di. Tregtar për çfarë?

“Tregtarit të Venedikut që u zgjodh president si akti i fundit i Republikës së Vjetër dua t’i them ta marrë me qetësi dhe dashuri faktin që shpk-ja e tij do të shkojë drejt falimentimit total në 25 qershor. Merre me qetësi dhe dashuri, mos e shkel etikën se je zgjedhur President i vendit, edhe pse me pazar. Lëre Petritin ta marrë faturën e falimentit të shpk-së. Pazaret nuk kanë vend në Republikën e Re!” Më egër se kaq nuk ka.

Së pari, kjo vetëm egërsi nuk mund të quhet. Ky është dëshpërim, aq më tepër kur këtë gjë e thotë z. Basha. E aq më tepër kur kërcënon një politikan si z. Basha, që trembet edhe nga hija e vet.

Së dyti, z. Basha ka një ftesë nga z. Vasili për të dalë në një debat publik. Dhe nuk duhet t’i shmanget këtij debati.

Në qoftë se ai bën teatër me Ramën, që ky gjoja ta ftojë dhe ai gjoja s’do ta pranojë, z. Basha ka mundësinë të ketë një përballje të vërtetë me z. Vasili, për të sqaruar se kush është SHPK, LSI-ja apo PD-ja e z. Basha. Natyrisht që janë edhe shumë personalitete të PD-së që kanë dhënë vlerësimin e tyre se ç’lloj shpk-je është ajo e z. Basha. Mendoj që lista e tregon më së qarti se ç’lloj shpk-je është ajo.

Tjetër, LSI-ja është parti e rinisë. Ka të gjithë rininë e Shqipërisë me vete. Z. Basha as kryetarin e FRPD, që premtonte se 35% do të jenë në listat e Republikës së Re nga FRPD-ja, nuk e ka në listë. E ka Belind Këlliçin? Shikoje çadrën. Shikoji kronikat e çadrës. Atje ishte Belind Këlliçi, mblidhte nga 200 e 300 të rinj.

Ka demokratë që beson z. Basha? Ka të rinj në Shqipëri që beson z. Basha? Çfarë ka? Po edhe vendet e deputetëve si janë vënë? E di ti? Shko në Vlorë se të tregojnë si janë vendosur njerëzit. Nuk dua të merrem me këtë gjë.

LSI-ja nuk vendos kandidatë me lekë. Njerëz pa kontribute, njerëz që s’i njeh partia. Kush i njeh këta? LSI-ja i ka të gjithë figura, personalitete, brenda partisë dhe në raport me opinionin publik. I ka në mënyrën më transparente e ndaj do të votohet e do të jetë forcë e parë në këto zgjedhje.

“LSI ju mashtron me triskat e bukës. Kthehuni në PD se tani jemi më të fortë”

Ai bën si i fortë, sepse ka ndenjur 3 orë vetëm për vetëm me Edin. Nuk e di që aty ai ka mbaruar politikisht edhe moralisht. Para demokratëve dhe para gjithë shqiptarëve. Natyrisht, se Edi ia hedh atij. Atë nuk e llogarit fare, padyshim. Ai në vend të ndërronte Drejtorin e Përgjithshëm të Policisë, që ka përgjegjësi të madhe për të gjithë problemet e drogës në Shqipëri, dhe që ishte një kërkesë më se normale, vajti e mori drejtor OSHEE-je. Apo jo? Ç’lidhje ka drejtori i OSHEE-së me standardin e zgjedhjeve. A mund të ma thuash ti këtë?

Jemi të habitur.

Po pse e bëri Rama? Për ta tallur. Ky e mori se mendoi që do të marrë vota me OSHEE-në.

Së dyti çfarë tregon kjo që “LSI i merr me triska, nuk do t’i marrë më, prandaj hajdeni tek ne, se ne do të vijmë në pushtet dhe do ua japim triskat ne”. Ai e di se njerëzit janë dele e dhi dhe ikin siç do ky?

Por ky harron që në 2013-n kur LSI u nda me Sali Berishën dhe kaloi në opozitë, ky që u bë kryetar i Bashkisë Tiranë vetëm falë LSI-së, sepse nuk do të ishte bërë kurrë, ky hoqi gjithë njerëzit që mund të ishin të LSI-së. Edhe shoferë apo pastrues, i hoqi me listën që i çoi Flamur Noka, që nuk duhet ta bënte këtë gjë, pasi LSI ishte në koalicion me PD-në dhe kishte qenë në një koalicion për katër vjet në pushtetin lokal.

Dhe çfarë ndodhi? LSI vetëm u rrit. E ndihmuan të punësuarit PD-në në 2013-n për të qëndruar në pushtet? Jo.

Ky ka këtë logjikë klienteliste dhe mendon që kështu funksionon edhe LSI-ja. Ky kujton se ia ka fajin LSI-ja që zgjohet në orën 11:00 apo në 12:00. Ky kujton se ia ka fajin LSI-ja se ka 4 vjet në opozitë dhe tre vjet ka jashtë shtetit, kontrolloni dhe sistemin TIMS dhe një vit që ka në Shqipëri e ka vetëm në Tiranë.

Nëse ky ka vajtur një herë në Korçë dhe ka qëndruar me kryesinë e demokratëve atje si njeri, nuk po them në një fshat të thellë të Korçës apo në një fshat të Shkodrës, apo në një fshat të Tepelenës, dhe vetëm ndonjë dalje televizive, ndonjë deklaratë këtu, ndonjë deklaratë atje dhe ky mendon se opozitarët dhe demokratët do të frymëzohen nga kjo lloj sjelljeje burokratike.

Kështu që, nuk ia ka fajin LSI-ja për këtë gjë, LSI-ja e ka ndihmuar edhe këtë, edhe Partinë Demokratike për interesin e vendit.

“Iku dhe SHPK, s’ka më pazar, s’ka më matrapazllëqe…”

Ky kujton se bën pazar me Ramën dhe çdo gjë u vendos në Shqipëri. Ky nuk e di se vendimi merret më 25 qershor dhe vendimin do ta marrin gjithë shqiptarët.

“LSI-ja që nuk mban përgjegjësi asnjëherë si kur është me PD-në ashtu kur është me PD-në”, thotë z. Basha…

LSI-ja nuk mban përgjegjësi për drejtimin e qeverisë. LSI-ja ka mbajtur përgjegjësitë e veta për pozicionet që ka pasur dhe LSI-ja tani do të marrë qeverinë dhe do të mbajë përgjegjësitë e saj për këtë drejtim.

Dëgjova dje z. Basha në një emision, i cili tha një frazë “Unë bëra për dy vjet rrugën e Kombit dhe z. Rama nuk ka bërë për katër vjet Lungomaren”. Z. Basha e bëri Rrugën e Kombit?

Me aq para sa u përdorën për Rrugën e Kombit mund të ishin bërë dhe nja tre rrugë të tjera. Megjithatë, nuk po hyj te kjo çështje, ajo i mbetet z. Berisha si ide. Pastaj ky ka qenë një zbatues, ka pasur ca probleme me tunelin, por shpresojmë të mos ketë më.

“Koalicioni i ngjalave dhe i peshkut nuk është më koalicion pasi janë ndarë dhe janë bërë copë-copë për shkak të pazareve…”

Tani kemi koalicionin e OSHEE-së dhe Hipotekave…

“Po zihen me LSI-në për tepsinë, nuk bëjnë fare hesapet tuaja. I bëj thirrje çdo votuesi të PD-së që është zhgënjyer të kthehet në shtëpi”. E thënë kjo nga z. Basha…

Në cilën shtëpi? Në shtëpinë e OSHEE-së, ku të kthehen? Shumë mirë, a e mori OSHEE-në, a i mori Hipotekat, po i merr burgjet. T’i marrë dhe nëse njerëzit kthehen se disa ikin nga puna apo disa kthehen, të shohim se çfarë do të ndodhë më 25 qershor.

Sipas jush çfarë politikani është z. Basha? Ai është diplomuar në perëndim, shikohej si një yll në ngritje, një personazh shumë interesant për PD-në në fillimet e tija dhe një pasardhës i z. Berisha…

Nuk ka asnjë lidhje, jo vetëm me dimensionin e Berishës, por absolutisht është një aksident i madh i PD-së për mendimin tim. Edhe unë kam pasur mendim të mirë për të kur ka qenë në pozicionet e ministrit dhe ndoshta për një pozicion ministri ka qenë i përshtatshëm për të mbajtur atë presion dhe atë ngarkesë, por gjithmonë duke pasur mbi vete një lider të fortë që mund ta orientojë apo ta udhëzojë. Por ai si politikan i nivelit të parë është mjaft i dobët, sepse nuk ka shtyllë kurrizore të fortë. Nuk e mban falën dhe ky është një problem i madh, çështja e mirëbesimit. Tha do të jenë 35 % pjesë e FRPD-së në lista? Ai i vuri?

Unë me PD-në kam qenë në një marrëdhënie tepër korrekte dhe kam vlerësimin më të mirë për atë kohë që kam bashkëpunuar me PD-në dhe me Berishën. Këtë e kam thënë edhe publikisht, ia kam thënë edhe Ramës. I kam thënë që personi më i qëndrueshëm me të cilin kam bashkëpunuar në Shqipëri në 26 vjet mbetet z. Berisha, për fat të keq.

Pse? Sepse duhet të kishin dalë politikanë të rinj më të qëndrueshëm më të besueshëm apo më seriozë. Për mua ai është politikan në nivelin e OSHEE-së, nuk ka nivel më të lartë për të premtuar diçka më të mirë, aq më tepër për të dalë garant i kauzave më të mëdha në interes të gjithë vendit.

Meta, në PD ju keni disa kundërshtarë të fortë politikë, të cilët nuk janë përfshirë në lista. Kam parasysh këtu z. Patozi dhe znj. Topalli. Ju jeni kënaqur që këta dy personazhe por edhe ndonjë tjetër nuk janë në listat e PD-së për deputetë? Do të donit t’i kishit kundërshtarë?

Unë nuk jam i shqetësuar dhe nuk i marr gjërat personale, nëse ata më kanë kundërshtuar mua, këtë e kanë bërë mendoj për një protagonizëm më shumë se sa kanë pasur bindjen. Sepse si mund të bëhesh protagonist? Duke i rënë një emri pak më të madh. Kështu që për të rënë në sy kjo është një mënyrë që pranohet në politikë.

Topalli për këtë e ka bërë?

Unë besoj që kjo ka qenë arsyeja, pasi nuk mendoj që ajo realisht ka ato mendime, që mund të shprehë për mua. Unë gjithmonë kam qenë shumë tolerant me të dhe mbi të gjitha kam respektuar faktin që ajo ka kontributet e veta në PD. Nuk pres të kem të njëjtat mendime me znj. Topalli, sepse përndryshe ajo do të ishte në LSI ose do të isha unë në partinë e saj.

Po për z. Berisha, për të cilin ju keni shprehur shpesh si dobësinë tuaj?

Për atë kohë që kemi bashkëpunuar kam një vlerësim të veçantë pastaj me ç’më kanë parë sytë më duket akoma më serioz.

A është politika shqiptare në këto momente katër-polare dhe jo tripolare?

Unë nuk e di, por di të them këtë gjë: edhe në rast se do të jetë dypolare një nga dy polet dhe poli kryesor do të jetë LSI-ja dhe gjithë forcat e tjera që e kuptojnë se kjo është garancia për stabilitetin për demokracinë dhe për normalitetin në këtë vend.

Unë e kisha fjalën konkretisht për z. Berisha, a është ai poli tjetër i politikës shqiptare? Ashtu siç tha z. Berisha për ju në vitin 2002?

Nuk e di këtë gjë, sepse z. Berisha është në një pozicion të tërhequr. E ka thënë për mua dhe ka thënë të vërtetën. Atë e shikoj si një personalitet të spikatur, por ai është në një linjë me PD-në zyrtare.

A mund ta sqaroni edhe një herë pak më në detaje vizitën tuaj te z. Berisha?

Ka qenë një vizitë e shkurtër, normale. Një kafe shumë miqësore dhe asgjë më shumë. Nuk kishte lidhje me zhvillimet. Unë kam qenë vazhdimisht në komunikim edhe me z. Berisha, edhe me z. Basha përmes personave të tretë, sepse këtë ma kanë kërkuar edhe përfaqësues të komunitetit ndërkombëtar, përveçse kam ndjerë edhe vetë si një angazhim për të kontribuuar për këtë proces, për këtë zgjidhje gjithëpërfshirëse që u arrit pavarësisht nga ato problemet që ka.

Me z. Rama, cili ka qenë kontakti juaj i fundit?

Nuk e di, mbase një javë apo diçka e tillë.

Meta, ju jeni treguar, ose më saktë i jeni kundërpërgjigjur z. Rama dhe z. Basha, megjithatë në këto 4 vjet ju keni disa aksione politike tuajat personale dhe si përfaqësues i LSI-së që në një farë mënyre e keni ndihmuar qeverisjen e z. Rama dhe z. Rama personalisht. Unë do të doja që të jepnit një përgjigje nëse ju jeni penduar ose keni bërë mirë apo gabim. E para lidhet me vendimin e Ramës për të sjellë në Shqipëri depozimin dhe demontimin e armëve kimike dhe ju keni pasur një rol goxha aktiv në atë kohë.

Kam pasur një rol mjaft realist dhe ka lidhje thjesht me interesin për një qetësi sociale.

E dyta, lidhet me ligjin e plehrave, edhe në atë kohë Presidenti e ktheu dekretin dhe u krijua një situatë jo normale.

Ai dekret është aty dhe padyshim që Parlamenti do ta miratojë dhe duhet të jemi tepër të kujdesshëm në mënyrë që Shqipëria të mos bëhet një vend ku mund të depozitohen mbetje të rrezikshme dhe mjaft problematike për të ardhmen e vendit. Kjo është një çështje mjaft serioze.

Në vitin 2016 ju u bëtë promotori dhe negociator me të gjitha palët në Shqipëri për Vetingun, arritën…

Patjetër, kjo ishte për të mirën e vendit, për të bërë një reformë drejtësie të besueshme dhe natyrisht edhe me opozitën, sepse përndryshe nuk do të kishim as rekomandimin për çeljen e negociatave.

Meta, për hir të së vërtetës ju dhe LSI-ja keni qenë një nga iniciatorët apo ajo që publikoi, e tha publikisht në lidhje me luftën ndaj kanabisit. Në fakt, fenomeni i kanabisit në atë kohë kishte marrë përmasa të mëdha. Sot si ndjeheni pas kësaj?

Duhet të kishim folur edhe më përpara, edhe më fort, edhe më ashpër. Edhe vetë nuk po e besonim se kishte marrë ato përmasa aq të rënda dhe aq të frikshme siç rezultoi, sepse një pjesë edhe e medies ishte e manipuluar, përveçse edhe vetë policisë që ishte pjesë e madhe e gjithë kësaj ndërmarrjeje.

E fundit, si nga ato çështjet që ju jeni angazhuar vetë personalisht, ka qenë kriza politike, kur Partia Demokratike u fut në çadër dhe me protestën e saj për 90 ditë shkaktoi një krizë të rëndë politike. A jeni penduar që ishit ju një lloj negociatori midis…

Jo, unë nuk jam penduar, sepse nuk mund ta pranoja, vetëm mendja e Ramës mund ta mendonte që të bëheshin zgjedhjet pa opozitën. Këtë gjë ia kam thënë qartë atij dhe të gjithëve.

Ai e kishte ndarë mendjen? Jeni i bindur?

Absolutisht! Ju e dini shumë mirë që 2 orë para se të vinte në tryezën e partive parlamentare, që nuk kishte ndërmend të vinte, ishte i gatshëm dhe deklaroi nga Elbasani se do të shkonte në zgjedhje pa PD-në.

Meta vijmë të LSI-ja, pak ditë më parë u publikua sondazhi i parë i “PR marketingut”, gjithmonë sipas rregullit, unë e njoh mirë atë sondazh që nga viti 2009 të gjitha partitë janë mërzitur, por në fund për hir të vërtetës ai sondazh ka qenë i saktë, kam parasysh zgjedhjet e vitit 2009…

Nuk është asnjëherë e vërtetë që sondazhi ka qenë i saktë. Po ta shikojmë, të bëjmë një research.

E para, një herë duhet t’ju them se ai është një sondazh i porositur, jam i bindur në mënyrë konsensuale për të krijuar idenë sikur nuk ka ndryshuar ndonjë gjë e madhe në Shqipëri, ku në fakt në Shqipëri ka ndryshuar një gjë shumë e madhe. Ajo gjë e madhe solli edhe krizën e zgjedhjeve dhe qëndrimin e të dyja forcave të tjera ndaj çështjes së zgjedhjeve dhe të standardeve. Ky ndryshim i madh është që LSI-ja është forcë e parë sot në Shqipëri.

Së dyti, lidhur me këtë sondazh, ky është një sondazh, i cili gjithmonë fillon jep disa të dhëna për të demotivuar votuesit që mund të votojnë për një ndryshim apo që janë mbështetës të një ndryshimi të fortë dhe për të motivuar disa të tjerë, të cilët mendojnë se forca e tyre ka rënë dhe për t’u përdorur nga drejtuesit e tyre.

E them këtë gjë për arsye, sepse mjafton të shikojmë disa shifra, nuk dua të përmend rastin kur nxirrte Grida Dumën fillimisht si fituese bindshëm ndaj Vangjush Dakos dhe pastaj e dimë se çfarë diference doli në zgjedhjet e Durrësit, por edhe rastin tjetër të vitit 2013, kur e nxirrte LSI-në gjoja në sondazhin e parë me 5% dhe pastaj ditën e zgjedhjeve e jepte që kjo mund të shkojë edhe deri në 10-11,5%.

Ka edhe ajo marzhin e gabimit…

Jo, nuk është ashtu. Së dyti, PD-në sondazhi i parë, gjoja e nxirrte 38-39% më 2 maj, pastaj në fund fare nuk doli as 30.8% që është një diferencë shumë e madhe.

Në rastin konkret, po ju them sot se LSI-ja është mbi 35% në Shqipëri dhe nuk ka asnjë formë presioni, manipulimi, denigrimi, gjithçka të bëjë Rama e Basha e kushdo që ta ndryshojë këtë realitet. Ai sondazh është tërësisht i manipuluar, i trukuar.

Mbaje këtu dhe ruaje për natën e zgjedhjeve. Absolutisht, gjithçka është në funksion të përgatitjes së një manipulimi për të ruajtur një sistem oligarkik në Shqipëri, të njëjtën njerëz që qeverisnin dje dhe ndikonin te qeveria Berisha janë të njëjtët që influencojnë sot te z. Rama dhe nuk duan asnjë alternativë tjetër që u jep një shans të gjithëve, siç është LSI-ja.

Meta, ditët e fundit, përveç përplasjeve me deklarata dhe kundërdeklarata me kritika dhe me akuza kanë ndodhur disa shkarkime ndaj përfaqësuesve të LSI-së në administratë. Në fakt, ajo që më ka bërë më shumë përshtypje është për Majlind Lazimin, në fillim u tha për fushatë elektorale, pastaj…

Mos u habit aspak. Kemi të bëjmë me dy politikanë si Rama e Basha, të cilët nuk janë politikanë vlerash, as politike, as njerëzore, por janë thjesht dy politikanë pushteti dhe ata mendojnë se votat merren me pushtet, me klientelizëm dhe këtë kërkojnë ta faturojnë të tjerëve me presion përmes pushtetit, me frikësime, por kjo gjë nuk ka për të funksionuar. Ata, që të dy do të kenë fatin që pati Doktori, pika ime e dobët, në vitin ‘94, me referendumin që u bë për Kushtetutën. Ky do të jetë fati i të dyve bashkë.

Po ju pastaj me kë do të bëni koalicion?

Nuk do të ketë ndoshta nevojë për të bërë koalicion fare me ta. Do të ketë koalicion me forcat e tjera, pasi mendoj se edhe forcat e tjera do të marrin disa mandate.

Kjo është një eufori, z. Meta…

Nuk besoj se është eufori. Është ndoshta një mision.

Por pa koalicion me forcat e tjera ç’do të thotë?

Rilindja e Ramës dhe e Bashës do të kalojë në opozitë, socialistët dhe demokratët do të vijnë me LSI-në në pushtet.

Po nëse kalojnë në opozitë i bëjnë bashkë votat ata dhe e bëjnë ata qeverinë …

Nuk e bëjnë dot. Absolutisht.

Si e keni këtë siguri?

Do ta shikojmë. Çfarë i bashkoi këta të dy kundër LSI-së? LSI-ja ishte korrekte me të dyja palët…

Po bëjnë koalicion të dy ata…

Po ta bëjnë, ta shpallin…

Po pas zgjedhjeve…

Unë ia kam thënë me kohë z. Rama ta shpalli koalicionin, që kur bëri koalicionin për CEZ-DIA që e përdori z. Basha për t’i bërë jehonë gjithë manipulimeve që ai kishte përgatitur me Damian Gjiknurin. Ia kam thënë, bëje hapur, s’ka asnjë problem, unë nuk kam asnjë shqetësim.

Po në qoftë se z. Rama do t’u kërkojë juve koalicion pas 25 qershorit?

Së pari, unë nuk hyj në çështjen e koalicionit, sepse unë nuk jam as kryetar i LSI-së, as anëtar i kryesisë.

Së dyti, numrin e telefonit të Petrit Vasilit e di. Në qoftë se e ka të vështirë të marrë Petritin, të shkojë të gjejë Narin, ai apo Luli, dhe ta çojë Narin te Petriti. Ka edhe forma të tjera të komunikimit. Por ndoshta Petriti nuk do të ketë nevojë për të dy bashkë dhe ky do të jetë një fat i mirë për Shqipërinë.

Unë jam Ilir Meta, në radhë të parë, para shqiptarëve unë kam detyrë t’u flas hapur shqiptarëve që nesër të mos thonë e ka fajin Ilir Meta, pse na e tha, pse s’na e tha.

Unë po ua them shqiptarëve që askush pas 27 vjetësh nuk duhet të mendojë se vota e tyre është pa vlerë.

Në qoftë se z. Vasili ju kërkon ju këshillë për të bërë koalicion, cili do të ishte mendimi juaj?

Vasili është politikan me shumë përvojë, me shumë eksperiencë, me shumë integritet. Do të mjaftonte një përballje e tij me z. Rama dhe me z. Basha, me dy kandidatë të tjerë, që çdo shqiptar të kuptonte diferencën e jashtëzakonshme, edhe politike, edhe qartësinë, edhe kthjelltësinë e tij.
Meta, kam një pyetje të tillë: Në 12 qarqe, ku është më mirë LSI-ja dhe ju e shikoni si një forcë …

Unë e shikoj kudo në të gjithë Shqipërinë, por në mënyrë të veçantë e shoh në qarqet më të mëdha, pa dyshim edhe në të gjitha qarqet e tjera tradicionale, pa asnjë diskutim.

Si e shikoni në Tiranë?

Forcë të parë.

Po më habisni fare më këtë deklaratë…

Po s’keni pse habiteni. Kam një pyetje për ju: Zgjedhjet vendore, shikoni 2015-ën, si kanë vajtur dy partitë e tjera, çfarë rënie drastike kanë, shikoni edhe LSI-në se çfarë rritje …

Po zgjedhjet lokale janë tjetër gjë…

Jo, jo, nuk janë absolutisht, sidomos në qarqet e mëdha votimi është politik, edhe në zgjedhjet lokale, në komuna, në njësi të vogla, por ju do të shikoni 25 qershorin. Nuk ka forcë që e ndalë 25 qershorin.

Në Shqipëri ka ndodhur një lëvizje tektonike elektorale e jashtëzakonshme. Nuk është vetëm meritë e LSI-së, se nuk mendoj se LSI-ja ka bërë ndonjë mrekulli, por LSI-ja ka treguar që ka qenë një forcë për stabilitetin e vendit, ka qenë një forcë e dialogut, ka qenë një forcë e bashkëpunimit, dhe natyrisht ka qenë një forcë e mesazheve pozitive. Kanë një meritë edhe dy drejtuesit e forcave të tjera, të cilët kanë sjellë këtë zhgënjim të madh të elektoratit të tyre, jo për faj të LSI-së, po për faj të raportit të tyre.

Meta, në katër vjet LSI kishte pesë ministri, si pjesë e kabinetit të z. Rama, por ndërroi 8 ministra. Në Ministrinë e Drejtësisë z. Naço, Manjani, z. Vasili; në Ministrinë e Integrimit Klajda Gjosha, Ministër i Bujqësisë, Edmond Panariti, Ministri i Transportit, Edmond Haxhinasto e Sokol Dervishi, dhe Ministër i Mjedisit, Lefter Koka. A ka mundësi të bëni një vlerësim për të gjithë ministrat e LSI-së, në dikasteret që ata kanë drejtuar?

Nuk kam ndërmend të bëj ndonjë vlerësim për ministrat, për arsye se, të them të drejtën, ata kanë punuar në një ambient jo miqësor, formalisht miqësor. Ata kanë qenë gjithmonë të paragjykuar. Ne kemi bërë marrëveshje që z. Rama të sillej si Kryeministri i gjithë koalicionit, por është fakt që ai nuk është sjellë në këtë mënyrë.

Pse, çfarë ka bërë ai, që s’është sjellë?

Janë të shumta veprimet e format me të cilat ai është përpjekur të anashkalojë ministrat e LSI-së, edhe kur ata kanë pasur detyrime kushtetuese, kur kanë pasur detyrime ligjore; se si ka ndërhyrë për të bërë ndryshime në strukturat e këtyre ministrive, për arsye të ngushta partiake, jo për arsye të reformave. Megjithatë, pavarësisht nga të gjitha këto, unë mendoj se ata kanë qenë ministra tepër të përgjegjshëm, tepër korrekt.

Natyrisht, Klajda Gjosha shkëlqen gjithmonë me integritetin e saj, dhe është një tregues se mund t’i besohet një vajze të re, një gruaje të re, jo vetëm një post i tillë, por në këtë mënyrë mund t’u jepen përgjegjësi edhe shumë të rinjve që kanë studiuar jashtë e janë kthyer në vend, që kanë një kulturë evropiane, për të pasur një rol edhe më protagonist në politikë.

Respekti është për të gjithë njësoj. Nuk ndaj dot asnjë, por natyrisht, duke qenë se kemi një grua të re, jemi të lumtur që ajo ka realizuar një performancë të shkëlqyer dhe është një kontribut për t’u dhënë shansin edhe shumë grave të tjera në të ardhmen, për të marrë detyra e përgjegjësi më të mëdha.

Kam një pyetje të tillë: z. Meta, pse ishte ai shkarkimi i z. Naço? Nuk e kam kuptuar asnjëherë, nuk e kam marrë vesh asnjëherë.

Është një dorëheqje, gjë shumë e thjeshtë, një dorëheqje,

A dha impuls largimi i tij?

Po, mendoj se dha, aq sa dha.

Cili është mendimi juaj për punën që ka bërë z. Koka, si ministër i Mjedisit?

Mendoj se ka bërë përpjekje maksimale në punën e tij, për atë mbështetje që ka pasur.

A ka debate në LSI, z. Meta?

Si s’ka? Patjetër që ka. LSI është një parti që funksionon vazhdimisht me struktura. Nuk e mbledh kryesinë një herë në vit apo komitetin drejtues një herë në pesë vjet.

Së dyti, është një parti ku gjërat diskutohen hapur, e në këtë mënyrë, nuk është se është se imponon thjesht kryetari një mendim, por në fund fare të gjithë konvergojnë në një qëndrim, i cili përfaqëson edhe kryetarin, edhe kolegët e tjerë.

Është parti shumë kolegjiale, siç ka pasur PS-ja një traditë shumë interesante në fillimet e veta; mblidhej kryesia edhe për qëndrime politike, edhe për diçka tjetër, pa le pastaj për listën e deputetëve.

Për shembull, Fatos Nano ishte kryetar i PS-së, doli nga burgu, erdhi në KPD me një listë të caktuar, ku nuk ishin shumë personalitete të PS-së, për shkak të qëndrimeve apo kritikave që kishin bërë ndaj tij, por pas ndërhyrjes së KPD-së u detyrua ta rivlerësojë këtë listë dhe të integrojë shumë nga këta personalitete. Ishte kohë tjetër.

Kështu funksionon edhe LSI-ja. Unë mund të kem për dikë ndonjë mendim jofavorizues për të qenë në listë, por kur ai që është përgjegjës për atë qark jep një argument, mund ta rishikoj.

Meta, na thoni një rast kur mendimi juaj është kundërshtuar në kryesi, duke ka fituar kryesia dhe jo ju.

Duhet të ketë shumë raste në lidhje me këtë.

Ka shumë raste?

Po, ka shumë. Mund të pyesësh Luan Ramën ose dikë tjetër, pa dyshim.

Do të ma thotë mua Luan Rama para jush?

Po nuk është e domosdoshme për të dalë publikisht dhe për të bërë “shoë”, që ne kundërshtuam e bëmë. Në qoftë se biem dakord dhe dikush ka të drejtë, unë i jap të drejtë atij dhe pikë. Ai ishte edhe qëndrimi im më pas. Unë nuk mendoj se kam gjithmonë të drejtë. Mund të keni ju të drejtë. Në qoftë se ju keni të drejtë dhe unë bindem, atëherë bindja juaj është edhe imja.

Nga viti 2004, janë 13 vjet të partisë Lëvizja Socialiste për Integrim. A kujtoni me mall, nostalgji dhe me një keqardhje që nuk keni disa nga figurat themeluese të kësaj partie, për hir të vërtetës, personalitete jo vetëm të politikës, por edhe në fushat e tyre përkatëse?

Ky është një proces që ndodh në çdo forcë politike. Unë edhe në konventë bëra falënderimin për profesor Pëllumb Xhufin, Sabit Brokaj, sot mund të përmend edhe profesor Fatos Klosin, i cili më nderoi edhe mua, duke ardhur në një takim me komunitetin mallakastriot, në mbështetje të kandidates sonë për Tiranën, Kejdi Mehmetaj, e cila, gjithashtu, është me origjinë mallakastriote.

Sigurisht që vendi i tyre mbetet në historinë e LSI-së, pavarësisht nga zgjedhja e tyre në një moment të caktuar, siç ishte koalicioni me PD-në në vitin 2009, të cilin e mirëkuptoj si pozicion, por që unë isha i detyruar të merrja një vendim politik, jo një vendim emocional, i cili nuk do të prodhonte një rezultat politik as për LSI-në dhe as për vendin.

Ajo ishte një zgjedhje e tyre, por për periudhën që ata kanë kontribuar në LSI, janë shumë të respektuar, emri i tyre nuk ikën nga historia e LSI-së, fotografia e tyre nuk fshihet nga albumet e LSI-së, do të jenë aty gjithmonë dhe do të jenë gjithmonë të respektuar.

Për cilin nga ata ke më shumë keqardhje, që nuk e keni aty? Për shembull, për z. Xhufi?

Nuk dua t’i ndaj. Padyshim, me z. Xhufi kam pasur një raport shumë të mirë, qyshkur kam qenë Kryeministër dhe ai ka qenë në Ministrinë e Jashtme.

Është njeri i ditur, me të cilin mund të diskutosh për çështje të ndryshme të historisë, dhe jo vetëm, por për kulturën dhe çdo gjë tjetër. Ai ishte i sjellshëm, i edukuar dhe padyshim që ishte kënaqësi të punoje me të në momente të ndryshme, dhe, natyrisht mbetet një figurë e respektuar.

Meta, në rast se ju realizohet kjo që ju thoni, ky parashikim është i jashtëzakonshëm, nuk është parashikim. Si do të jetë qeveria e LSI-së?

Nuk e di, kjo është një çështje që i takon kryesisë.

I takon Petrit Vasilit?

I takon kryesisë së Lëvizjes Socialiste për Integrim dhe natyrisht edhe kryetarit, z. Vasili, por absolutisht do të jetë qeveri shumë e përgjegjshme, me këmbë në tokë dhe qeveri në shërbim të qytetarëve, nuk do të jetë qeveri ekranesh.

Qeveri ekranesh? Vetëm Rama del në ekran, nuk është se kanë dalë shumë ministrat?!

Unë thashë që nuk do të jetë qeveri ekranesh, por qeveri e punës dhe e problemeve të njerëzve.

Në rast se fiton LSI-ja, a ju vjen keq që ju nuk përsërisni një mandat tjetër si Kryeministër, për shkak të faktit se u zgjodhët President?

Unë kam qenë Kryeministër në një moshë tepër të re dhe mendoj se ka qenë një periudhë tepër e suksesshme.

Unë mendoj se është e rëndësishme që qeveria e ardhshme të plotësojë të gjitha pritshmëritë që kanë qytetarët shqiptarë. Unë mendoj se LSI-ja, edhe me programin e saj, është shumë më pranë tyre, që nga programi për uljen e taksave, ku LSI-ja ka qenë kundër rritjes së taksave, që në fillim të këtij mandati.

Ju do të thoni “pse e pranuat”? E pranuam, sepse rritja e taksave dhe taksa progresive ishin një pretim elektoral i Partisë Socialiste, dhe natyrisht, përderisa ajo ishte partia më e madhe, ne nuk mund të imponimin dhe t’i kushtëzonim për një politikë madhore këtë gjë, por kjo nuk ka reflektuar pozitivisht në ekonominë e vendit, në zhvillimin e biznesit dhe duhet konsideruar tërësisht. Mendoj se LSI-ja ka një program shumë të mirë. Nuk ka vizionin që “të vëmë gjoba, që të bëjmë spitale”.

Nuk është ai mentalitetet, tregon një mentalitet të vjetër për zhvillimin e ekonomisë dhe për raportin e shtetit me qytetarin.

A rritet ekonomia duke vënë gjoba?

Vetëm tkurret dhe do të shtohen dyqanet dhe bizneset me tabelën “nr. i celularit, shitet” apo “jepet me qira”.

Ajo që më ka çuditur më shumë ishte Kryeministri me fenelinë policie!

Ka një problem të madh, sepse ka një konceptim policor të të gjithë shtetit dhe kjo nuk e ndihmon zhvillimin e shtetit, të institucioneve; nuk ndihmon zhvillimin e ekonomisë; nuk ndihmon lulëzimin e biznesit…

Por ai ka thënë: “që ne bëjmë shtet”.

Në vend që të bënte shtet, u bë qamet, me sa kuptoj unë, sepse kjo puna e drogës, vetëm erë shtet nuk binte, por edhe shumë sjellje të tjera tregojnë qartë se mungesa e respektimit të institucioneve, për fat të keq, shpesh fillon nga vetë Kryeministri aktual.

Më ka bërë përshtypje, që Presidenti i Republikës, z. Bujar Nishani, më ka thënë në këtë studio: “Unë kam një kopjo të raportit dhe një raport, të cilin ma ka sjellë kreu i SHISH, dhe këtë raport e kanë edhe z. Meta, edhe z. Rama, që në Shqipëri në muajin dhjetor në Shqipëri janë futur tonelata të tërë të farës së kanabisit”. Ju e keni pasur këtë raport?

Unë mendoj se gjeja më skandaloze në gjithë këtë histori, është se kreu i antimafias italiane, që është personi më me reputacion në Itali, e ka bërë të qartë që Shqipëria është vendi i dytë për prodhimin në botë të marijuanës. Raporti i Departamentit të Shtetit ka bërë të qartë se situata është jashtëzakonisht e rëndë dhe e përkeqësuar, dhe jo vetëm kaq, por edhe shihet si vend tranzit për heroinën dhe për kokainën. Natyrisht, ky është një problem i jashtëzakonshëm, ku, pa dyshim, përgjegjësia nuk mund t’i bjerë dhe as nuk ka si t’i bjerë as LSI-së, as Lulit dhe as Saliut.

Po, a duhet të kishit bërë ju…

Akoma më e rëndë është se pamë gjithë ata avionë që uleshin, që binin, që rrëzoheshin dhe në atë kohë nuk pamë të shkarkohej asnjë drejtues policie për mungesë kontrolli të territorit.

Po, pra ju ishit në koalicion, z. Meta, a keni ju përgjegjësi?

Ne kishim dhe i kemi ngritur këto shqetësime.

Është e vërtetë që i keni ngritur, por duhet të ishit më të fortë?

Ndoshta këto janë përgjegjësitë e LSI-së, që nuk duhet të kishte folur për këtë çështje, në mënyrë që raportet e BE-së dhe të Departamentit të Shtetit të vazhdonin të ishin shumë të mira për sa i takon kanabisit, drogës e të tjera. LSI-ja foli…

A ia keni thënë ju personalisht z. Rama?

Absolutisht, i kam thënë unë, i ka thënë z. Vasili, i ka thënë z. Rama; i kanë thënë edhe shumë të tjerë.

Si ka qenë reagimi i tij?

Ka qenë, që nuk është ndonjë situatë kaq e rëndë.

E di pse këmbëngul për këtë, sepse ai në atë moment nuk e ka pranuar fare, z. Meta. Nuk ishte çështje e diskutueshme.

Mos prisni që të pranojë ndonjëherë ndonjë përgjegjësi, gjithmonë përgjegjësitë do t’i transferojë diku. Prandaj vendi ka nevojë të ketë një drejtues që merr përgjegjësi dhe për këtë duhet të votojnë shqiptarët më 25 qershor.

Cila është pjesa e projektit dhe e programit të LSI-së, për ta luftuar këtë fenomen, që është në kufijtë e të paimagjinueshmes?

Ka një program tepër konkret. Ju për këtë mund të thërrisni edhe personat përgjegjës. Unë nuk dua të merrem me programin konkret.

Dakord, por diçka që të jetë thelbësore?

Mendoj se kontrolli i kufijve është kryesor dhe është absolut. Kjo është gjëja më e rëndësishme, sepse nga hyn fara? Prodhimi nga del? Është kontrolli i kufijve…

E kisha më shumë fjalën për kontrollin e territorit.

Të territorit, të doganave, gjithçka fillon nga kontrolli i kufijve dhe më pas kontrolli i territorit.

Në radhë të parë, është çështje e vullnetit politik. Në qoftë se njerëzit e dinë se për këtë vepër do të ndëshkohesh realisht, pa dyshim që nuk do të merren me këtë gjë. Por, në qoftë se ata ndihen të mbrojtur, pa dyshim që do të merren.

Çfarë pasoja solli kjo?

E pësojnë punëtorët dhe bosët nuk kapen.

Çfarë pasojash solli ky masivizim?

Pasoja tepër negative në të gjitha drejtimet, edhe në drejtim të ekonomisë, edhe në drejtim të fuqizimit të krimit në vend, edhe në drejtim të përkeqësimit të imazhit të Shqipërisë dhe shumë konflikte e shumë vrasje që kanë ndodhur, si dhe shumë të tjera që nuk raportohen, pa dyshim dhe, mbi të gjitha, mendoj se problemi më i madh është dëmtimi i imazhit të Policisë së Shtetit. Ky është një fakt.

A ishte fajtore Policia e Shtetit?

Tani nuk mund të themi që fajtor ishin kameramanët, që po na filmojnë ne këtu. Kush është përgjegjës për territorin?

Edhe një dritare po të ndryshojë në një fshatit të Durrësit, në Ishëm, e merr vesh policia dhe shkon me vrap. Ndërkohë atje bëhet pista, bie avioni dhe thonë: “Jo po ra se, ku di unë, kishte lule me vete”.

Meta, në qoftë se PS-ja dhe PD-ja arrijnë marrëveshjen, që po diskutohet dhe po përflitet, çfarë do të bëjë LSI-ja, në kuptimin që do të kalojë në opozitë, por çfarë do të bëjë konkretisht?

Nuk ka asnjë shans që Basha dhe Rama të marrin bashkë 71 mandate. Reagimi i socialistëve dhe i demokratëve ka filluar prej kohësh. Jam i bindur që ata do ta ndëshkojnë këtë imoralitet dhe këtë bashkëpunim në krim për të cenuar standardin e zgjedhjeve në Shqipëri, për të hequr dorë nga përgjegjësitë që kanë për të gjitha problemet që i kanë krijuar vendit dhe për t’ia kaluar, gjoja, përgjegjësitë LSI-së. Janë përgjegjësitë e tyre. Ata duhet t’i mbajnë deri në fund dhe ata do të ndëshkohen për këto përgjegjësi që kanë dhe që nuk i pranojnë.

Në LSI përveç kryetarit Vasili, është edhe zonja Kryemadhi si Zëvendëskryetare. Si funksionon kjo marrëdhënie? Bashkëshortja juaj është Zv.kryetare e LSI-së, por ju e keni edhe mik z. Vasili, përveçse ai është edhe kryetar.

Roli i Monikës në politikë është i qartë që me krijimin e FRESSH-it. Ajo ka pasur një rol të jashtëzakonshëm edhe më pas në PS, kur është zgjedhur si deputete në vitin 2001 dhe padyshim, edhe në LSI. Raporti i saj me të gjithë është i vërtetë.

Kur thotë zonja Kryemadhi që e kundërshtoj bashkëshortin tim?

Sigurisht ajo është një nga personat me të cilin kam më shumë kundërshti për sa u përket qëndrimeve politike, por kjo është interesante.

Kush fiton?

Më i drejti.

Jam dakord, që ju keni futur më shumë të rinj dhe ajo që bën më shumë përshtypje, është se janë edhe të rinjtë që kanë studiuar jashtë: njëri që mbaron Harëardin apo Oksfordin pse duhet të vijë në Shqipëri dhe të fillojë punë në MPJ apo në KM me një rrogë prej 400-500 mijë lekësh? A ka motivim kjo? Edhe vajza juaj që studion jashtë, si do të vijë dhe do të punojë këtu?

Padyshim, sepse ata janë shqiptarë dhe janë rritur me ndjenjën e dashurisë për vendin në familjet e tyre dhe me ndjenjën e besimit që ky vend i ka mundësitë, i ka resurset dhe ka nevojë për njerëz të ditur. Familjet kanë investuar te dijet e tyre, që ata t’i investojnë këto dije në Shqipëri. Ky është një detyrim ndaj vendit.

A mjafton kjo?

Nuk mjafton kaq, por ne duhet t’i përkrahim më shumë, qytetarët t’i përkrahin më shumë, që t’i votojnë këta të rinj dhe të reja që këta të marrin më shumë përgjegjësi.

Si? Ai nuk do të vijë të bëhet direkt ministër, por do të fillojë karrierën nga poshtë…

Nuk e thashë këtë. Klajda Gjosha është bërë vërtet ministre. Ajo ka ardhur nga Britania e Madhe dhe është angazhuar në LRI para 10 vjetësh dhe më pas ka punuar në detyra të ndryshme. Ajo ka punuar edhe në sipërmarrje private, më pas në nivel drejtori dhe zëvendësministre dhe më pas, është bërë deputete dhe ministre.

Pra, nuk është se brenda ditës nga një i diplomuar jashtë shtetit mund të marrësh direkt një pozicion të lartë. Sigurisht, që kërkohet një evoluim, një eksperiencë dhe një përshtatje me realitetin.

LSI-ja ngaqë e ka pasur çështje konkrete, direkte dhe merak të sajin çështjen e të rinjve, një pjesë e të rinjve janë tërhequr nga këta që studiojnë jashtë, z. Meta…

Patjetër që këta po vijnë dhe do të vijnë, por ndërkohë ne kemi këtu edhe të rinj të tjerë këtu, siç është rasti i Kejdi Mehmetajt, e cila e ka mbaruar shkëlqyeshëm Fakultetin e Inxhinierisë dhe fitoi të drejtën për të studiuar në universitetin më të mirë për shkenca teknike në Amerikë dhe nuk vajti atje, por qëndroi këtu. Ajo është një studente e jashtëzakonshme, e shkëlqyer, e cila do të shkojë jashtë në të ardhmen për të bërë ndonjë master apo studime të tjera, por ai që është i zoti është i zoti edhe këtu, edhe jashtë. Nuk është se duhet të paragjykojmë të rinjtë që janë këtu, sepse edhe këtu kemi shumë studentë të shkëlqyer, shumë të rinj të aftë, sepse edhe komunikimi tani është i jashtëzakonshëm dhe nuk është si para vitit 1990 që mezi gjeje një libër në italisht apo në anglisht. Ai që do të mësojë dhe do të ecë përpara, padyshim që investon edhe këtu.

Meta, jeni një nga shqiptarët që keni pasur më shumë detyra të larta shtetërore deri tek detyra më e madhe, ajo e Presidentit të Republikës. Ka ndonjë domethënie të veçantë kjo?

Për mua të gjitha këto pozicione janë detyra dhe unë kam të njëjtin përkushtim për të bërë një detyrë sepse e konsideroj veten gjithmonë pjesë të një ekipi. Në rastin konkret është një detyrë e re që ka goxha dallime me detyrat e deritanishme dhe që natyrisht unë do të përpiqem ta bëj sa më mirë, por duke filluar që nga 24 korriku kur unë të betohem.

Keni filluar të organizoni stafin?

Jo, zero. Ka kohë deri më 24 korrik. Nga 27 qershori besoj.

Si do të jetë stafi juaj?

Nuk kam menduar fare.

Na thoni diçka që e synoni dhe do të donit ta arrinit në 5 vitet si Kreu i Shtetit?

Do të doja të kemi një vend normal, një vend ku respektohen institucionet, një vend ku mbi të gjitha respektohen qytetarët, ku mbi të gjitha respektohet vota dhe fjala e tyre dhe të kemi një vend i cili të forcojë rolin e tij si faktor paqeje dhe stabiliteti në këtë rajon. Sepse kjo është një vlerë shumë e rëndësishme edhe për zhvillimin ekonomik në të ardhmen të Shqipërisë.

A ju vjen keq që kompetencat e Presidentit të Republikës janë në një nivel shumë të ulët?

Nuk më vjen keq fare. Më mjafton titulli i Presidentit të Republikës, në kuptimin e mirë të fjalës, si përfaqësues i këtij institucioni të rëndësishëm, dhe pastaj jam i bindur që vlerën do t’ia jap me të gjithë angazhimin tim publik në shërbim të vendit, të demokracisë dhe të qytetarëve shqiptarë.

E bën detyra e Presidentit njeriun apo njeriu e bën Presidentin?

Nuk mund të jap një përgjigje të saktë në këtë drejtim. Unë do të bëj maksimumin për të realizuar me përgjegjshmëri dhe atdhetari këtë detyrë të rëndësishme.

Ka ndonjë domethënie fakti që keni pasur dy detyrat më të larta, edhe Kryeministër edhe President i Republikës? Jeni i treti në historinë e Shqipërisë që i keni mbajtur të dyja këto detyra.

Nuk jam një person shumë i dhënë pas historisë, se theva rekordin e këtij apo ma kaloi ky. Nuk e gjykoj kështu unë. Këtu ndryshoj nga të tjerët, i marr gjërat më thjeshtë.

Cili është vendi juaj në histori?

Nuk është kjo gjëja më e rëndësishme për mua. Më e rëndësishmja është që unë gjithmonë të bëj më të mirën për vendin tim. Pastaj ajo është një çështje që i takon historisë.

Në këto momente z. Meta unë do të në ekran fotot e gjithë presidentëve të Shqipërisë dhe do të doja një përcaktim për të gjitha këta.

Ahmet Zogu?

Një talent i jashtëzakonshëm për kohën e tij.

Ka ndonjë gjë të veçantë që ai ka bërë për shtetin shqiptar?

Realisht shteti shqiptar fillon me Kongresin e Lushnjës kur ai u bë ministër i Brendshëm dhe kur vendosi në kontroll territorin e Shqipërisë. Sepse që nga shpallja e Pavarësisë dhe deri në Kongresin e Lushnjës Shqipëria ka qenë inekzistente si një shtet që kontrollonte territorin.

A jeni dakord me z. Majko që largimi i tij më 7 prill nuk quhet tradhti?

Unë mendoj se nëse ai do të kishte qëndruar në Shqipëri ai do të kishte marrë pushtetin pas luftës. Jo vetëm që kishte mbështetje brenda vendit por edhe do të merrte edhe mbështetjen e anglo-amerikanëve dhe të gjithë të tjerëve që ishin të interesuar për një rezistencë në Shqipëri.

Presidenti i dytë, Omer Nishani. Keni ndonjë përcaktim. Në fakt ka qenë shumë i panjohur, por roli i tij ishte shumë interesant.
Një njeri intelektual, patriot që u bashkua me lëvizjen Antifashiste Nacional çlirimtare dhe që u vlerësua më pas. Po të shikojmë pas ’45 ka shumë personalitete që kishin studiuar jashtë, të cilët kontribuuan.

Presidenti i 3, Haxhi Lleshi?
Sigurisht që patriot, me kontribute në Luftën Antifashiste. I respektuar për këto kontribute

Meta, ju jeni një nga mbështetësit dhe një nga politikanët që keni mbështetur rezistencën e Shqipërisë gjatë Luftës së dytë Botërore. Kishte edhe elementë të luftës civile gjatë asaj kohe. E pranoni këtë?
Ne desh na ndodhën edhe tani elementë luftës civile me zgjedhjet e jo atëherë apo jo? Një palë forcë thoshte do i bëjmë pa opozitën, tjetra thoshte do i lëmë pas zgjedhjeve.

Ramiz Alia, që ju e keni njohur dhe vetë personalisht, madje fillimi i karrierës suaj politike keni qenë në takimin me të. Pse rrinit aq i tërhequr aty e i heshtur? Ishte një akumulim që një ditë do shpërthenit aty? Shumë i urtë keni ndenjur.
Aty e para nuk të linte radhë Azemi, në kuptimin e energjisë dhe të frymëzimit të tij. Edhe mosha natyrisht se atëherë isha 21 vjeç. Kanë qenë dhe pedagogë të tjerë të njohur si Arben Imami, Arben Demeti e kështu me radhë. Sigurisht ishte një ngjarje që nuk na besohej se po fitohej pluralizmi apo se çfarë do të ndodhte.

Cili është vlerësimi juaj për Ramiz Alinë?
Unë mendoj që Ramiz Alia ka merita të rëndësishme për uljen e butë, e quaj gjithmonë unë, të avionit në pistën e tranzicionit dhe të pluralizmit. Dhe mos të harrojmë që u tregua tolerant, i shtyu zgjedhjet 2-3 muaj që të hynte Partia Demokratike në zgjedhje në vitin 1991.

Kjo është ironi për Ramën?
Jo kështu e merrni ju, por thashë po ta gjykojmë me këndvështrimin e sotëm është ajo që kemi pritur nga politikanët e sotëm që të jenë më tolerantë pas 27 vitesh demokraci. Mendo të kishte qenë dikush tjetër në vend të Ramiz Alisë, në fund viteve ’90. Kështu që mbetet për tu rivlerësuar si figurë.

Unë e kam pyetur edhe z.Berisha dhe në këtë periudhë kanë mbetur disa gjëra shumë të rënda për Shqipërinë. U shkatërruan deri furrat e bukës në 1991, në kohën kur ishte president Ramiz Alia dhe ai e ka pohuar që ajo që është bërë në një dialog në parlamentin serb midis Sheshelit dhe Milosheviçit, ishte që ku shkuan 20 milionë dollarë për destabilizimin e Shqipërisë. Ja ku shkuan e si është katandisur Shqipëria, është pohuar. Ju keni pasur dijeni për këtë z. Meta?

Kjo është një histori që nuk dua të bëhem pjesë e debateve, diskutimeve. Në çdo ndryshim të rëndësishëm ka faktor rajonal, ndërkombëtar përveç faktorëve të brendshëm që veprojnë. Gjithmonë dikush për të prishur diçka në Shqipëri duhet të gjejë një partner lokal, pra një politikan shqiptar, një shqiptar të papërgjegjshëm për të dëmtuar Shqipërinë.

Si ka mundësi që Shqipëria vazhdon të ketë gjithmonë kriza në këto 27 vjet? A kanë ndikim agjenturat e huaja, ndikimet e huaja, z. Meta, sepse nuk ka mundësi që Shqipëria, siç thotë Kadareja: ‘I ngjajnë trupit trupit që nuk i ikin ethet’?

Problemi është që qytetarët shqiptarë duhet të marrin vendime të rëndësishme në datën 25 qershor, në mënyrë që Shqipëria të çlirohet nga një pengmarrje që vjen nga njerëz që mund të prodhojnë vetëm krizë, nuk mund të prodhojnë kurrë normalitet, kurrë dialog, kurrë transparencë dhe të cilët nuk kanë respekt për qytetarin shqiptar.

A ka ndikim të huajt tek politikanët shqiptarë, z. Meta?

Padyshim që gjithmonë ka ndikime. Ju mendoni se trafiku i drogës është bërë vetëm nga elementë shqiptarë? Tani këto gjëra kështu funksionojnë. Kështu që, mos mendoni që nuk ka interes, padyshim që ka interesa. Shqipëria ka një pozitë gjeografike dhe gjeostrategjike të rëndësishme. Është një vend transitesh. Tani këto transite do të jenë ose për drogë, ose do të jenë për transporte, për logjistikë, për teknologji, për zhvillim e kështu me radhë. Kështu që, shqiptarët duhet të votojnë më 25 qershor që ky vend të ketë të ardhme për të gjithë, të mos jetë një plantacion i madh droge, të mos jetë apo një varrezë e mbetjeve të mafias në Evropë, por të jetë një vend, ku përmes taksave të ulëta dhe një politike të mençur ekonomike, të krijohet një shans për të gjithë, që të rinjtë të jetojnë këtu dhe ta shohin të ardhmen këtu.

Sali Berisha, Presidenti i 5-të.

Mos më pyesni për këtë, jam subjektiv.

Ju jeni i vetmi që e keni futur 4 orë brenda.

Kjo nuk ka lidhje me këtë raport, por dobësia është ai raport që ne kemi pasur gjatë 4 viteve. E kam menduar një raport më të vështirë me të, praktikisht.

Po çfarë ndodhi që u zbut?

Jo. Nuk është çështje zbutjeve, por ndoshta ishte një paragjykim. Unë mendoj që ka qenë një raport që më ka dhënë një kënaqësi.

Presidenti i gjashtë, z. Rexhep Mejdani. Z. Meta, si ka mundësi që z. Mejdani, që nga momenti që ka ikur nga Presidenti i Republikës, nuk është përfshirë fare? Ju e keni vlerësuar si Presidentin më me karakter…

Unë do ta kisha votuar edhe sot përsëri për President Republike dhe do të isha shumë i kënaqur nëse ai do të ishte në atë pozicion. Dhe padyshim, e theksoj edhe njëherë, është një ikonë e integritetit moral. Nuk e kam thjesht si një vlerësim nga jashtë, por edhe nga bashkëpunimi që unë kam pasur me të, si Kryeministër me Presidentin, që mendoj që ka qenë bashkëpunimi më i mirë që edhe ai ka pasur me ndonjë Kryeministër në atë kohë.

Po, ai e ka shprehur këtë dhe kjo është e vërtetë, por ky aset që thoni ju, si ka mundësi që lihet në rrugë?

Nuk është i denjë për rilindas.

Po mund të ishte me LSI-në… Përse nuk e merrni ju?

Po besoj që e ka atë pozicion, i cili e bën të ndihet më mirë si një zë, le të themi, i pavarur.

Presidenti i shtatë, z. Moisiu?

Është një personalitet shumë i respektuar. Ka pasur një rol jo pak të rëndësishëm në konsensusin e atëhershëm midis Berishës dhe Nanos. Dhe padyshim që është një njeri me shumë vlera, patriot dhe s’mund të ndodhë ndryshe, nga një familje me tradita.

Presidenti i tetë, z. Topi…?

Një figurë gjithmonë tolerante, qytetare dhe paqësore.

Dhe tifoz i Tiranës…

Ka këtë problem edhe Presidenti Topi edhe z. Vasili, kanë ca vështirësi në futboll. Ka edhe më keq si puna e Juves. Më mirë ne të Milanit që nuk jemi në garë fare.

Presidenti i nëntë, z. Nishani…?

Mendoj që është një simbol i korrektësisë, edhe institucionale, edhe njerëzore.

Presidenti i dhjetë, z. Meta. Çfarë mendimi keni për të?

Unë kam një dallim, që ndryshe nga shumë të tjerë, nuk kam dëshirë shumë që ta shoh veten në ekrane, apo duke folur. Kështu që, më mirë ta kalojmë.

Për ta mbyllur, si e parashikoni Presidencën për 5 vjet? Ju jeni shumë i ri, por jo kaq i ri, pasi z. Berisha ka qenë më i ri se ju ne detyrën e Presidentit…

I takonte Doktorit. Nuk kam asnjë parashikim. Për mua është e rëndësishme që zgjedhjet e 25 qershorit të shkojnë sa më mbarë, në mënyrë që të prodhojnë institucione të besueshme, të qëndrueshme. Pastaj, çështja e Presidencës është një çështje shumë më e lehtë.

Marrë nga emisioni “DEBATI” i gazetarit Roland Qafoku në “Channel One”

SHKARKO APP

iPhone

Android

Më shumë lajme të fundit