Koalicioni i PD: LSI u bë pjesë e zgjidhjes së krizës. Dialog për qeveri teknike

Kryesore E Mërkurë, 19 Maj 2021 11:17

Pas mbledhjes së zhvilluar ditën e sotme, koalicioni opozitar ka dalë me një deklaratë të përbashkët. Në qëndrimin e aleatëve të PD-së thuhet se mënyra e vetme për të dalë vendi nga kriza politike është krijimi i një qeverie teknike.

Gjithashtu, koalicioni opozitar vlerëson qëndrimin e LSI-së, duke e cilësuar këtë si një hap për zgjidhjen e krizës.

Aleatët e PD-së theksojnë se Rama duhet të heq dorë nga kushtet dhe të pranojë nisjen e negociatave për një qeverie teknike. Partitë e opozitës kanë vendosur edhe 4 prioritete ku duhet të fokusohet puna e qeverisë teknike. “1-Zbatimin e plotë të ligjit të dekriminalizimit. 2-Luftë efikase kundër narkotrafikut, krimit të organizuar dhe parave të drogës. 3-Përgatitjen e zgjedhjeve të lira e të ndershme. 4-Zbatimin e reformës në drejtësi, sipas përcaktimeve kushtetuese të 22 korrikut”,- thuhet në deklaratën e përbashkët.

Ky është qëndrimi zyrtar i PD-së dhe aleatëve të saj, pas dy ditësh ëm zhvillime të forta politike. fillimisht ishte kreu i LSI-së, Ilir Meta që pas mbledhjes së Kryesisë së kësaj partie, u dha një kthesë të fortë zhvillimeve politike në vend. Meta tha se vendi ka nevojë për një qeveri besimi që do të garantojë standardet e zgjedhjeve.

Pas Metës kryeministri Edi Rama deklaroi se nuk mund të bënte asnjë lëvizje që shkel Kushtetutën e vendit. Ndërkohë PD-ja ka dhënë sinjalin e radhës së nuk tërhiqet nga kushtet e saj për qeveri teknike, duke e kaluar “topin” vetëm në fushën e Kryeministrit Edi Rama.

Për herë të parë opozita ka renditur edhe objektivat që do të ketë qeveria teknike.

Deklarata e plotë e koalicionit opozitar:

“Koalicioni Opozitar konfirmoi sot se rruga e vetme e daljes nga kriza është krijimi i qeverisë teknike, me mbështetje të gjerë politike, që do të punojë për të realizuar kushtet për zgjedhje të lira e të ndershme.

Duke përshëndetur hapin e hedhur mbrëmë nga LSI për tu bërë pjesë e zgjidhjes së krizës së rëndë politike në vend, Koalicioni Opozitar rikonfirmon gatishmërinë për nisjen e dialogut politik për qeverinë teknike dhe fton Edi Ramën të heqë dorë nga kushtet dhe të vendosë interesat e vendit dhe të qytetarëve shqiptarë para interesave personale të pushtetit të tij.

Koalicioni Opozitar shpreh gatishmërinë e plotë për të punuar me të gjitha forcat politike pa asnjë paragjykim, për krijimin e qeverisë teknike, duke i dhënë asaj një mandat të fortë për:

1-Zbatimin e plotë të ligjit të dekriminalizimit.

2-Luftë efikase kundër narkotrafikut, krimit të organizuar dhe parave të drogës.

3-Përgatitjen e zgjedhjeve të lira e të ndershme.

4-Zbatimin e reformës në drejtësi, sipas përcaktimeve kushtetuese të 22 korrikut.

Kjo është e vetmja garanci për të organizuar zgjedhje të lira dhe të ndershme ku shqiptarët të votojnë lirisht, të zgjedhin lirisht dhe vota e tyre të mos tjetërsohet”.

Lexoni të gjitha reagimet për krizën politike: