Koka: “Nuk djeg mandatin”. Malltezi: Koka firmosi inceneratorin 178 mln euro dhe është peng

Deputeti Lefter Koka deklaroi sot nuk djeg mandatin e deputetit. Ai shtoi se “Opozita dje mori vendimin për të djegur mandatet e deputetit. Vendimi im i palëkundur është se unë nuk do të djeg mandatin e deputetit, që mijëra durrsakë më kanë besuar”.

Por PD mendon se ky vendim i deputetit Koka vjen se është peng te kryeministri Rama dhe prokuroria i një tenderi prej 178 milionë eurosh për fabrikat e përpunimit të mbeturinave, firmosur kur ishte ministër.

Jamarbër Malltezi, anëtari Kryesisë së PD-së, ka postuar status fill pas botimit të deklaratës së Lefter Kokës, ku nuk pranon të djeg mandatin e deputetit.

Përmes një postimi në Facebook, Jamarbër Malltezi shprehet se firma që Lefter Koka ka hedhur në aferën 178 milionë euro të inceneratorëve, në atë kohë minister Mjedisi, e detyron të hedhë tani “vallen e Ramës” siç e quan ai.

“Shembulli tipik i qeverisjes: Blerja ose shantazhi. Këtij hallexhiut i deklarova 14 muaj më parë “Pendohu, bëhu dëshmitar i drejtësisë” lidhur me aferën kriminale të inceneratorëve ku Rama-Ahmetaj po përlajnë 178 milionë euro, por Teri ka firmos për këtë aferë dhe tani do hedhë vallen sipas Ramës. 14 muaj që qeveria i fshihet debatit për inceneratorët! Çfare halli i madh i ka zanë?”, shkruan në Facebook Jamarbër Malltezi.

Në fakt inceneratorët kanë qenë problem i madh publik dhe afera korruptive, ku opozita ka akuzuar se pastrohen miliona euro nga mafia.