E përditshme e pavarur

Lista e të dyshuarve për terrorizëm, reagon Komuniteti Mysliman

Kryesore E Martë, 20 Prill 2021 09:28

Dje dhe sot në mediat online ka qarkulluar një liste “sekret” me emrat e disa personave, imamë dhe besimtarë myslimanë, që dyshoheshin se përbënin rrezik për nxitje të terrorizmit. Dokumenti i datës 17 shkurt 2015, mbante simbolet e Komuniteti Mysliman Shqiptar dhe ishte klasifikuar “Sekret”. Emrat e përmendur në dokument i dërgoheshin Prokurorisë së Krimeve të Rënda.Në dokument i rekomandohej Prokurorit të Krimeve të Rënda të asaj kohe Eugen Beci që “Të merren në vëzhgim këto shtetas që ushtrojnë veprimtari të dhënies së mësimeve fetare të pakontrolluara në Republikën e Shqipërisë dhe përbëjnë rrezik për terrorizëm”.

Sot Komuniteti Mysliman Shqiptar në një njoftim për mediat deklaron se lista që po qarkullon në media është e falsifikuar. “KMSH, sqaron opinion publik se dokumenti që qarkullon në media dhe në rrjetet sociale, është i falsifikuar. Ky dokument i cili pretendon se Komuniteti Mysliman kërkon hetimin e personave të caktuar, nuk është i vërtetë dhe dallohet qartazi që është i falsifikuar dhe nuk ka dalë nga institucioni i Komunitetit Mysliman”,-thuhet në njoftim.