LSI prezanton programin: Bujqësia-turizmi janë shtylla e zhvillimit

Kryetari i LSI Petrit Vasili dhe Monika Kryemadhi, Zv. Kryetarja e kësaj force politike në fjalën e tyre gjatë prezantimit të programit u shprehen se plani i LSI është një plan për të pasur një punë të mirëpaguar si dhe një jetë më të sigurt.

Në fjalën e mbajtur në këtë aktivitet, Petrit Vasili i bëri një prezantim të zgjeruar të fushave ku bazohet programi ekonomik i LSI-së. Sipas Vasilit ky program ka në themelin e tij punësimin dhe veçanërisht të të rinjve në mënyrë që ata ta shohin të ardhmen e tyre në Shqipëri duke u mundësuar një punë të denjë dhe të mirëpaguar.

“Pasi pa një përgjigje të fortë, motivuese e cila çon vendin përpara, motivon fort të rinjtë, motivon fort gratë, pra të gjitha ato shtresa që kanë potenciale të jashtëzakonshme, por janë potenciale tërësisht të pashfrytëzuara dhe të demotivuara, pa një plan të tillë ne nuk mund të kemi atë optimizëm të domosdoshëm e të nevojshëm të shoqërisë sonë e cila vuan sot nga demotivimi dhe nga humbja e shumë arsyeve për të jetuar në këtë vend ku në radhë të parë të rinjtë kanë në mendjen e tyre braktisjen e tij.

Ndaj ky plan rikthen optimizmin. Ky plan i bën të rinjtë që të gjejnë arsye të mëdha për ta ndërtuar të ardhmen e tyre këtu pasi po e them të parë dhe mbi të gjitha, një premtim thellësisht të bazuar dhe të menduar, që ka të bëj me punësimin e tyre, e ku nga 170 mijë vende të reja të pune të planifikuar dhe të programuar me shumë saktësi në planin tonë, 100 mijë vende të reja pune të mirë-paguara janë menduar dhe orientuar vetëm për të rinjtë”,- u shpreh Kryetari i LSI-së- dhe me pas insistoi se “Dy sektorët kryesore të cilët do të mundësojnë zhvillimin ekonomik të vend do të jenë bujqësia dhe turizmit. Sipas këtij programi, parashikohet që mbështetja financiare për bujqësinë të shkoi në 250 milion dollar nga ku do të mundësohet dyfishimi i të ardhurave në bujqësi nga 2 miliard euro në 4 miliard euro. Veç kësaj, në program është parashikuar që tatimi mbi fitimin në bujqësi të jetë 0%.”.

Kurse Monika Kryemadhi theksoi se “Ne sot prezantojmë planin e LSI-së. Ky është plani, një plan real e jo i rastësishëm elektoral dhe as premtimesh. Ai është thjesht themeli i garancisë që LSI i ofron çdo të riu, të reje e çdo shqiptari një shans për të pasur një punë të mirëpaguar, për të pasur një jetë më të sigurt, një arsim më të mirë, një shëndetësisë të drejtpërdrejtë tek qytetarët, një infrastrukturë më të mirë dhe për të pasur një sistem taksash më të lehtësuar dhe më të arritur për sistemin tonë. Projekti ynë i jep shansin çdo të punësuari aktual faktikisht për të lehtësuar taksimin mbi ta dhe për të kthyer ekonominë nga një ekonomi informale në formale sepse çdo taksim i tillë i padrejtë i çon ata drejt informalitetit.

Ky plan i jep shansin biznesit për taksimin e vërtetë dhe realë dhe për ta kthyer në një marrëdhënie midis shtetit dhe biznesit si partner dhe jo si armiq duke luftuar njëri-tjetrin. Vetëm në këtë mënyrë ne do të kemi mundësinë për të krijuar shans për bizneset, për të paguar më pak taksa, për të mbledhur më shumë të ardhura dhe për ta kthyer këtë në një sistem që funksionon për të pasur një buxhet më të realizuar.

Projekti ynë synon pikërisht mbarëvajtjen e marrëdhënieve shtet-biznes dhe jo që njëri të fitojë në kurriz të tjetrit si jo rrallë herë ka ndodhur kjo dhe për shkak të preferencave politike siç kemi parë shpeshherë. Ky është një plan i vërtetë dhe i prekshëm për këdo që jeton në Shqipëri, por ky plan do t’ju ofroj mundësinë çdo shqiptari që ka dëshirë të rikthehet në vendin e tij dhe për të rihapur jo vetëm biznesin e tij por për të jetuar jetën e tij në atdhe.

Ky nuk është një plan elektoral, por është një projekt i vërtetë që LSI ka përgatitur dhe do të realizoj. Ne do të kërkojmë votën e shqiptarëve pikërisht për këtë fakt sepse dimë të pranojmë gabimet dhe dimë t’i rregullojmë ato dhe mbi të gjitha dimë të mbajmë premtimet që ne japim ndaj qytetarëve tanë. Ne sot angazhohemi se do të ulim taksat mbi të ardhurat personale sepse e shohim këtë si një mënyrë përfundimtare për të formalizuar ekonominë për të pasur shifra reale dhe jo për të pasur shifra fiktive të cilat jemi mësuar rëndomë t’i shohim tashmë.

Ne duhet të ndërtojmë një sistem fiskal i cili duhet të jetë i besueshëm dhe i pranueshëm nga individët dhe biznesi sepse vetëm në këtë mënyrë ne do të kemi sa më pak shmangie nga sistemi fiskal. Plani ynë i vërtetë është një shans për të fuqizuar ekonominë shqiptare, bujqësinë, shëndetësinë, arsimin, turizmin dhe çdo fushë tjetër të Shqipërisë. Ajo për të cilën ne kemi projektet tona të cilat janë jo vetëm projekte të realizueshme, por mbi të gjitha janë projekte që aplikohen shumë kollaj dhe janë të mirëaplikueshme në Shqipëri.

Çdo projekt i yni mban seriozitetin maksimal dhe mbi të gjitha mbart premtimin dhe angazhimin tonë si një forcë politike. Punësimi i të rinjve është një nga prioritetet tona më të mëdha sepse duke nxjerrë LSI-në forcë të parë e duke votuar LSI-në, shqiptarët do t’i japin mundësi të rinjve që të kenë jo vetëm punë të mirëpaguar, por edhe një punë të garantuar dhe të sigurt.

Vetëm në këtë mënyrë, ne garantojmë të ardhmen e vendit tonë, një ekonomi më të mirë, begati për vendin tonë dhe mbi të gjitha ajo që është më e rëndësishme, garantojmë Integrimin Evropian të vendit tonë me të cilën e përfshin Shqipërinë në BE. Ajo çka dua të them është që ky plan nuk është plan vetëm për ata që të votojnë LSI-në, por ky është një plan i cili do t’ju shërbejë të gjithë shqiptarëve pa dallim bindjeve të tyre politike.

Mendoj që është një shans për të ardhmen, mendoj që është një shans për të gjitha familjet dhe mund të them që është një nga programet më të mira të prezantuara ndonjëherë për të gjithë gratë dhe vajzat shqiptare”