Mafia dallohet edhe nga luksi. Policia kontroll makinave të shtrenjta

Aksioni i Policisë së Tiranës për kontrollin e makinave luksoze është një veprim që duhet përshëndetur, por sidomos duhet çuar deri në fund. Në Tiranë sheh çdo ditë makina që kushtojnë 100, 200 apo edhe 300 mijë euro. Natyrisht, të kesh një makinë të shtrenjtë nuk është krim dhe askush nuk mund të shpallet mafioz vetëm për shkak të automobilit që përdor.

Por kur luksi nuk përputhet me të ardhurat e deklaruara, shteti duhet të pyesë: Ku i gjete paratë? Kjo është pyetja që duhet t’i bëhet kujtdo që ekspozon pasuri marramendëse, ndërkohë që në dokumentet zyrtare nuk rezulton të ketë aktivitet ekonomik apo të ardhura që e justifikojnë atë. Prej vitesh Shqipëria përballet me krimin e organizuar, trafikun ndërkombëtar të drogës dhe pastrimin e parave. Paratë e krimit nuk mbahen gjithmonë të fshehura në kasaforta. Ato shndërrohen në apartamente, vila, biznese, resorte dhe makina superluksoze.

Ndaj kontrolli i këtyre automjeteve nuk duhet të mbetet vetëm te numri i shasisë apo te fakti nëse makina është e vjedhur jashtë vendit. Duhet të kontrollohet pronari real. Duhet të kontrollohet se sa të ardhura deklaron. Duhet të kontrollohet se si është paguar makina: me bankë apo me para në dorë. Duhet të kontrollohet se kush ia ka shitur dhe nëse pas blerjes fshihen persona të tjerë.

Dhe kur një person pa të ardhura të ligjshme të mjaftueshme shfaqet me një makinë 200 mijë euro, atëherë duhet të hyjnë në lojë Hetimi Ekonomik, Prokuroria dhe strukturat kundër pastrimit të parave.

Krimi goditet më fort kur i prek paratë. Sepse trafikanti mund të zëvendësohet, por nëse shteti i sekuestron milionat, pronat, bizneset dhe luksin që ka krijuar nga krimi, goditja është shumë më e rëndë.

Prandaj aksioni i Policisë duhet të vazhdojë. Por pa selektivitet. Pa telefonata nga lart. Pa dallim mes të fortëve dhe të dobëtëve. Kontrolloni makinat 200 mijë euro dhe kërkoni faturën e parave. Nëse paratë janë të ligjshme, pronari nuk ka pse shqetësohet. Nëse nuk janë, atëherë aty duhet të fillojë hetimi. Sepse mafia nuk dallohet vetëm nga dosjet penale. Makinat e luksit në shumicën e rastëve shërbejnë për krime të nivelit të lartë. Shpesh mafia parakalon çdo ditë para syve tanë, mes luksit të pajustifikuar.