Maxhoranca miraton me 83 vota buxhetin. Erion Braçe nuk voton pr.ligjin për taksat vendore

Maxhoranca socialiste ka miratuar me 83 vota 9 projektligje të rendit të ditës që kanë të bëjnë me buxhetin e vitit të ardhshëm, paqen fiskale dhe rivlerësimin e pasurive.

Seanca maratona zgjati rreth 16 orë dhe u shoqërua me debate të ashpra mes shumicës dhe opozitës.

Gjatë votimit ra në sy fakti që deputeti Erion Braçe nuk mori pjesë në votimin e projektligjit “Për sistemin e taksave vendore”, ndërsa deputeti Vullnet Sinaj nuk votoi dy projektligjet “Për marrëveshjen e paqes fiskale” dhe “Për fshirjen, shuarjen dhe pagesën e detyrimeve tatimore ndaj administratës tatimore qendrore e të detyrimeve të pagueshme në doganë”.

Kryeministri Rama mbrojti buxhetin dhe investimet e parashikuara për vitin e ardhshëm, ndërkohë që opozita protestoi në mënyrë simbolike duke i kthyer kurrizin.

Në këtë seancë, u rikthye edhe zv.kryeministrja Belinda Balluku e cila foli për herë të parë pas marrjes si e pandehur nga SPAK për tunelin e Llogarasë.

Ajo nuk bëri të qartë nëse do të vazhdonte detyrën e saj, apo do të jepte dorëheqjen, por tha se nuk do të flasë kundër kurrë drejtësisë.

Balluku i drejtoi gishtin opozitës kur tha se flasin me dy standarde, por nuk dha asnjë shpjegim për akuzën e SPAK për shkeljen e barazisë në tendera, ku akuzohet se ka anuluar tenderin e parë me vlerën 140 milionë euro dhe ka diktuar fituesin e tenderit të dytë që shkoi 190 milionë euro.

Votimi

Projektligji “Për disa ndryshime dhe shtesa në ligjin nr. 9920, datë 19.5.2008, “Për procedurat tatimore në Republikën e Shqipërisë”, të ndryshuar.

Votimi: 83 pro, 31 kundër

Projektligji “Për disa ndryshime në ligjin nr. 92/2014, “Për tatimin mbi vlerën e shtuar në Republikën e Shqipërisë”

Votimi: 83 pro, 32 kundër

Projektligji “Për disa ndryshime dhe shtesa në ligjin nr. 29, datë 30.3.2023, “Për tatimin mbi të ardhurat”

Votimi: 83 pro, 32 kundër

Projektligji “Për disa shtesa në ligjin nr. 9632, datë 30.10.2006, “Për sistemin e taksave vendore”, të ndryshuar

Votimi: 82 pro, 32 kundër (Braçe nuk voton)

Projektligji “Për faturën dhe sistemin e monitorimit të qarkullimit”, të ndryshuar

Votimi: 83 pro, 32 kundër

Projektligji “Për marrëveshjen e paqes fiskale”

Votimi: 82 pro, 32 kundër (Sinaj nuk voton)

Projektligji “Për rivlerësimin e pasurisë së paluajtshme”

Votimi: 83 pro, 31 kundër

Projektligji “Për fshirjen, shuarjen dhe pagesën e detyrimeve tatimore ndaj administratës tatimore qendrore e të detyrimeve të pagueshme në doganë”

Votimi: 82 pro, 30 kundër (Sinaj nuk voton)

Projektligji “Për buxhetin e vitit 2026”

Votimi: 83 pro, 32 kundër